ނިލަންދޫ ނަރުދަމާއިން ނަޖިސް ބޭރުވާ މައްސަލައެއް

އިސްމާއިލް ރިޒާ

02 އޭޕްރީލް 2025 - 13:06

0 comments

ފ. ނިލަންދޫގެ ނަރުދަމާ ނިޒާމުން ނަޖިސް އެރުން -- ފޮޓޯ: އަމީން ފައިސަލް

ފ. ނިލަންދޫގެ ނަރުދަމާ ނިޒާމަށް ދިމާވެފައިވާ މައްސަލަތައް ހައްލުކުރުމަށްޓަކައި އެ ނިޒާމު އަޕްގްރޭޑްކުރުމުގެ މަސައްކަތް އަންނަ މޭ މަހު ފެށޭނެ ކަމަށް މޯލްޑިވްސް ވޯޓަރ އެންޑް ސުވަރޭޖް ކޮމްޕެނީ (އެމްޑަބްލިއުއެސްސީ)ގެ މެނޭޖިންގ ޑިރެކްޓަރ ޢަބްދުލްމަޠީން މުޙައްމަދު ވިދާޅުވެއްޖެ އެވެ.

"އެކްސް"ގައި ހައިކޯޓުގެ އިންފޮމޭޝަން އޮފިސަރު އަމީން ފައިސަލް ކުރެއްވި ޕޯސްޓެއްގައި ވަނީ ނިލަންދޫގެ ނަރުދަމާ ނިޒާމު ފެއިލްވެ ރަށުގެ އެކި ތަންތަނުން ނަޖިސް އަރާތާ އެތައް ދުވަހެއް ވެފައިވާ ކަމަށާއި، މުޅި ރަށް ނަޖިިިހުން ތަޣައްޔަރު ވެފައިވާ ކަމަށް ވިދާޅުވެފައެވެ. އަދި އެކަން ހައްލުކޮށްދިނުމަށް ވަނީ އެދިފަ އެވެ.

އޭނާ ވަނީ އެ ރަށުގެ މަގުގެ ހާލަތު ދައްކުވައިދޭ ފޮޓޯތަކެއް ވެސް ހިއްސާކޮށްފަ އެވެ.

ނިލަންދޫގައި ނަރުދަމާ އިން ނަޖިސް ބޭރުވާތީ އެ ރަށުގެ ރައްޔިތުން ކަންބޮޑުވުން ފާޅުކުރުމުން އެކްސް ގައި މަތީނު ކުރެއްވި ޕޯސްޓެއްގައި ވިދާޅުވީ މިހާރު ބޭނުން ކުރާ ނަރުދަމާގެ ނިޒާމު ހުއްޓުމަކަށް ނުގެނެސް އެހެން ނިޒާމެއް ގާއިމް ކުރެވޭނީ އަންނަ އަހަރުގެ ފަހުކޮޅު ކަމަށެވެ.

"މިހާރު ރަށުގައި އަޅާފައިވާ ވެކިއުމް ނިޒާމުގެ ހިދުމަތް މެދުނުކެނޑޭނެ ގޮތަކަށް މުޅިން އައު ގްރެވިޓީ ނިޒާމެއް ގާއިމްކުރުމަކީ ގޮން ޖެހުންތަކަކާއި ކުރިމަތިވާނެ މަސައްކަތެއް ކަމަށް ވުމާއެކު އައު ނަރުދަމާ ނިޒާމުގެ މަސައްކަތް މުޅިން ނިންމާލެވޭނެ ކަމަށް ލަފާކުރެވެނީ 2026 ގެ ފަހުކޮޅު،" މަތީނު ވިދާޅުވި އެވެ.

ވެކިއުމް ނަރުދަމާގެ ނިޒާމުތަކުގައި ބޭނުންވާ ހިސާބަކަށް ނަޖިސް ދުއްވަނީ ވައިގެ ޕްރެޝަރު ބޭނުންކޮށްގެންނެވެ. އެއާ ހިލާފަށް ގްރެވިޓީ ނިޒާމެއްގައި އެ މަސައްކަތް ކުރާނީ ގްރެވިޓީގެ ބާރު ބޭނުންކޮށްގެންނެވެ.

މަތީނު ވިދާޅުވީ ނިލަންދޫގައި މިހާރު ގާއިމުކޮށްފައިވާ ނަރުދަމާ ޑިޒައިން ކުރީ 15 އަހަރަށް ބަލާފައި ކަމަށެވެ. އެކަމަކު މިހާރު ވެސް އެ ނިޒާމަށް 18 އަހަރުވެފައިވާ ކަމަށް އޭނާ ވިދާޅުވި އެވެ. އާ ނަރުދަމާ ނިޒާމުގެ މަސައްކަތް މި އަހަރު ފެށޭނެ ކަމަށް ވެސް މަތީނު ވިދާޅުވި އެވެ.

ނިލަންދޫގެ ނަރުދަމާ ނިޒާމު ބެލެހެއްޓުމުގެ މަސައްކަތް މިހާރު ކުރަމުން އަންނަނީ ފެނަކަ ކޯޕަރޭޝަނުންނެވެ. އެ ކުންފުންޏާ އެ ޒިންމާ ހަވާލުކުރީ 2019 ގަ އެވެ. ނިލަންދޫގެ ނަރުދަމާގެ ނިޒާމު އަޕްގްރޭޑް ކުރުމުގެ މަސައްކަތް 2023 ގައި އޭރު އޮތް އެމްޑީޕީ ސަރުކާރުން 42.3 މިލިއަން ރުފިޔާއަށް ފެނަކައާ ހަވާލުކުރި އެވެ.

ނަމަވެސް މި ސަރުކާރުން ނިލަންދޫ ނަރުދަމާއަށް ދާއިމީ ހައްލެއް ހޯދުމަށް މިދިޔަ ނޮވެމްބަރު 16، ގައި އެ މަސައްކަތް 540 ދުވަސް ތެރޭގައި ނިންމުމަށް ކަމަށް ބުނެ އެމްޑަބްލިއުއެސްސީއާ ވަނީ ހަވާލުކޮށްފަ އެވެ.