ރައީސް ބައްލަވަނީ ކޮރަޕްޝަން ހިންގި މީހާއަކަށް ނޫން: އަބްދުއްރަހީމް

މަރިޔަމް އަނާ

02 ޖެނުއަރީ 2025 - 12:50

0 comments

ކޮރަޕްޝަންގެ މައްސަލަތައް ތަހުގީގު ކުރުމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ބައްލަވަނީ އެކަން ކުރި މީހާއަށް ނޫން ކަމަށާއި އެ މީހަކު ކުރި އަމަލަށް ކަމުގައި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ.

ޕީއެސްއެމްގެ "ރާއްޖެ މިއަދު" ޕްރޮގްރާމްގައި އަބްދުއްރަހީމް ވިދާޅުވީ، ކޮރަޕްޝަންގެ މައްސަލަތަކުގައި ފިޔަވަޅު އަޅާއިރު، އެއީ ކުރީ ސަރުކާރުގެ އިސްބޭފުޅެއްތޯ ނުވަތަ އެއީ އެ ވަގުތަކު ވެރިކަމުގައި ހުންނެވި ބޭފުޅެއްގެ އަރިސް މީހެއްތޯ ބަލާކަށް ނުޖެހޭ ކަމަަށެވެ.

"ކަން ކުރި މީހާއަކަށް ނޫން ބަލަންވީ، ކުރި ކަމަށް ބަލަންވީ. އަޅުގަނޑުމެންނަށް ވަރަށް ގިނަ ފަހަރު ވާ ގޮތެއް މިއީ ކަން ކުރި މީހާ އަށް ބަލައިގެން ކަންކަން ބަލަން އުޅުން. އެހެން އުޅެން ހަދައިގެން އަޅުގަނޑު މި ދެންނެވި ގޮތަށް އެ ފައިސާތައް ނުހޯދި މިހާ ގިނަ ދުވަސްވީ،" ކޮރަޕްޝަނާއި އެހެނިހެން ކަންކަމުގެ ތެރޭގައި ދައުލަތުން ގެއްލިފައިވާ ފައިސާތައް ހޯދުމަކީ ރައީސް މުއިއްޒު ވަރަށް އިސްކަން ދެއްވާ ކަމެއް ކަން ފާހަގަކުރައްވަމުން އަބްދުއްރަހީމް ވިދާޅުވި އެވެ.

"ރައީސް ޑރ. މުހައްމަދު މުއިއްޒުގެ އަމާޒަކީ އެކަން ކުރީ ކާކުތޯ ބެލުމެއް ނޫން. އެ ކުރީ ކޮން ކަމެއްތޯ އެކަން ކުރީ ހަމައިންތޯ ނަހަމައިންތޯ ގާނޫނާ އެއްގޮތަށްތޯ ގާނޫނާ ހިލާފަށްތޯ މާލިއްޔަތު ގާނޫނުން އެކަން ކުރަން ތަންދޭތޯ ނުދޭތޯ އޭގައި ދައުލަތަށް ވަނީ ކިހާވަރެއްގެ ގެއްލުމެއްތޯ އެ ގެއްލުންވީ ކާކުގެ ސަބަބުންތޯ؟ އެ ހިސާބުން ކާކު މި ތަނަށް އަންނަނީ،".

އަބްދުއްރަހީމް ވިދާޅުވީ ކޮރަޕްޝަން ހުއްޓުވުމަށް އެއްވެސް ސަރުކާރަކުން މަސައްކަތް ނުކުރާ ވަރަށް މި ސަރުކާރުން މަސައްކަތް ކުރާނެ ކަމަށް ރައީސް މުއިއްޒު ވިދާޅުވެފައިވާ ކަމަށާއި ދައުލަތުން ގެއްލިފައިވާ ފައިސާ ހޯދުމަކީ ރައީސްގެ ވައުދެއް ކަމަށެވެ.

މަޖިލީހުގެ ރައީސް ފާހަގަކުރެއްވި އަނެއްކަމަކީ ސަރުކާރުގެ ވެރިން މަގާމުތަކަށް އައްޔަންކުރައްވާފައި ތިއްބެވީ ރައީސްގެ ޒިންމާތައް އަދާކުރެއްވުމުގައި އެމަނިކުފާނަށް އެހީތެރިވުމަށްކަން ހަނދުމަފުޅުކޮށްދެއްވައި އެއްވެސް ބޭފުޅަކު ގާނޫނާ ހިލާފަށް އަދި ގަވާއިދުގެ ބޭރުން އަމަލެއް ހިންގަވައިފިނަމަ ގާނޫނީ ފިޔަވަޅު އަޅުއްވާނެކަން ރައީސް މުއިއްޒު އަންގަވާފައިވާ ކަމެވެ.

ސަރުކާރު ކުންފުނިތަކުގެ ސީއީއޯއިންނާއި އެމްޑީން ތިއްބަވާ ވަޓްސްއަޕް ގުރޫޕަކަށް ފޮނުއްވި މެސެޖެއްގައި ރައީސްވަނީ ބޭއިންސާފުން ބަޔަކަށް ކަމެއް މަގުފަހިކޮށްދީ، ކޮރަޕްޝަނުގެ އަމަލެއް ނުވަތަ ގާނޫނާއި ގަވާއިދުގެ އިމުން ބޭރުން އެއްވެސް ބޭފުޅަކު ކަމެއް ކުރެއްވިކަން އެނގިވަޑައިގެންފިނަމަ ފިޔަވަޅު އަޅުއްވާނެކަމަށް ވިދާޅުވެފަ އެވެ.

އޭގެ ފަހުން ނޫސްވެރިންނާ ވާހަކަދައްކަވަމުން ރައީސްވަނީ ގާނޫނުއަސާސީގެ ދަށުން މަގާމުތަކަށް ބޭފުޅުން އައްޔަންކުރައްވަނީ ކޮރަޕްޝަނުގެ އަމަލުތައް ހިންގެވުމަށް ނޫންކަމަށާއި ރައްޔިތުންނަށް ހިދުމަތްކުރުމަށް ކަމުގައި ވިދާޅުވެ، ކޮރަޕްޝަނުގެ އަމަލުތައް ބެލުމުގެ މިނިވަންކަން ކަމާ ގުޅުންހުރި އިދާރާތަކަށް ފުރިހަމައަށް ދެއްވާނެކަމުގެ ޔަގީންކަން ރައްޔިތުންނަށް ދެއްވާފަ އެވެ.

"ސަރުކާރުގެ އެއްވެސް ތަނެއް [އިދާރާއެއް] ގައި އަޅުގަނޑު ބޭނުމެއް ނޫން ގަވާއިދާ ހިލާފު އެއްވެސް ކަމެއް ހިނގާކަށް،" ރައީސް ވިދާޅުވި އެވެ.