ބޯކޮށް ވާރޭވެހި އުދަ އެރުމުގެ ސަބަބުން ހަ ރަށެއްގައި ފެންބޮޑުވެއްޖެ

އަލީ ރާޒީ

03 ޖެނުއަރީ 2025 - 19:23

0 comments

ބޯކޮށް ވާރޭވެހި އުދައެރުމުން ގެއްލުންވެ 6 ރަށަކުން ރިޕޯޓްކޮށްފި -- ފޮޓޯ/ އެންޑީއެމްއޭ

ރާއްޖެއަށް މިހާރު ކުރަމުންދާ ވިއްސާރައިގައި ބޯކޮށް ވާރޭ ވެހި، އުދަ އެރުމުގެ ސަބަބުން ހަ ރަށެއްގައި ފެންބޮޑުވެއްޖެ އެވެ.

ފެންބޮޑުވި ރަށްތަކުން ފެން ހިންދުމުގެ މަސައްކަތް މިހާރު ކުރަމުންދާ ކަމަށް ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެ އެވެ.

އެންޑީއެމްއޭއިން ބުނީ ބޯކޮށް ވާރޭވެހި ފެންބޮޑުވެގެން ރިޕޯޓު ލިބުނީ ދ. ކުޑަހުވަދޫ، ދ. މީދޫ، ފ. ނިލަންދޫ އަދި ފ. މަގޫދޫއިން ކަމަށާއި އުދަ އެރުމުގެ ސަބަބުން ފެންބޮޑުވެގެން ރިޕޯޓު ލިބުނީ ށ. ނަރުދޫގެ އިތުރުން ރ. އިނގުރައިދޫއިން ކަމަށެވެ.

އެމްއެންޑީއެފްއިން ބުނީ ފ. ނިލަންދޫ އަދި ދ. ކުޑަހުވަދޫގެ އިތުރުން އދ. މާމިގިއްޔަށް ބޯކޮށް ވާރޭވެހި ފެންބޮޑުވެ ގޭގެއަށް ފެން ވަނުމުގެ ސަބަބުން އެހީތެރިކަން ފޯރުކޮށްދެމުންދާ ކަމަށެވެ.

ރާއްޖެ އަށް މޫސުން ގޯސްވެފައި ވަނީ ސްރީ ލަންކާގެ އިރުދެކުނުގައި އުފެދިފައިވާ ކޮޅިގަނޑާއި، އެ ކޮޅިގަނޑާއި ގުޅިފައިވާ ގުޅިފައިވާ ލޯ ޕްރެޝާ ޓްރަފުގެ ސަބަބުން ކަމަށް މެޓް އޮފީހުން ބުނެ އެވެ.

މޫސުން ގޯސްވެފައިވާތީ މެޓް އޮފީހުން ވަނީ ހުރިހާ ފަރާތްތަކަކުން ވެސް މޫސުމަށް ސަމާލުވުމަށް އިލްތިމާސްކޮށްފަ އެވެ.

މި ދުވަސްވަރު ރާއްޖޭގެ ބޮޑު ސަރަހައްދަށް ވަރަށް ބޮޑަށް މޫސުން ގޯހެވެ. މޫސުން ގޯސްވުމުގެ ސަބަބުން ބައެއް ރަށްރަށުގައި ފެންބޮޑުވުމާއި އުދައެރުމުގެ ހާދިސާތައް ވަނީ ހިނގައިފަ އެވެ. އަދި ދަތުރުފަތުރަށް ވެސް ވަނީ ބުރޫއަރައިފަ އެވެ.