މެންދުރުފަހު ވެހުނު ވާރެއިން މާލެ ފެނު އަޑީގައި، ފުލުހުންނާއި ސިފައިން އެހީތެރިވަނީ

މަރިޔަމް އަނާ

03 ޖެނުއަރީ 2025 - 19:26

0 comments

މާލޭގެ މަގުތަކުން ފެން ހިންދުމުގެ މަސައްކަތުގައި ސިފައިން ހަރަކާތްތެރިވަނީ. -- ފޮޓޯ: އެމްއެންޑީއެފް

މިއަދު މެންދުރުފަހު އޮއްސާލި ބޯ ވާރޭގައި މާލޭގެ މަގުތަކުގައި ފެންބޮޑުވެ، ހިނގާބިނގާވެ އުޅެން ދަތިވެއްޖެ އެވެ.

މަޖީދީ މަގާއި އަމީނީ މަގާ އެކު މާލޭގެ ހުރިހާ މަގެއްގައި ކަހަލަ ގޮތަކަށް ފެންބޮޑުވެ ހިނގާ މީހުންނާއި ދުއްވާ އެއްޗިއްސަށް ވަނީ ދަތިތަކަކާ ކުރިމަތިލާން ޖެހިފަ އެވެ. ވިއްސާރައިގައި އެންމެ ބޮޑަށް ފެންބޮޑުވާ މަގުތަކުގެ ތެރެއިން، ކަނބާއައިސާރަނި ހިނގުމާއި އިއްޒުންދީން މަގުގެ ބައެއް ގެތަކަށް ވަނީ ވަރަށް ބޮޑަށް ފެންވަދެފަ އެވެ.

ފުލުހުންނާއި ސިފައިން އަންނަނީ މާލޭގައި ފެންހިންދައި، އާއްމުންނަށް އެހީތެރިކަން ފޯރުކޮށްދެމުންނެވެ.

މާލެއަށް ދަނީ ރެކޯޑު މިންވަރަކަށް ވާރޭ ވެހެމުންނެވެ. އެއް ގަޑިއިރު ތެރޭގައި މާލެ ސަރަހައްދަށް ވަނީ 60 މިލިލީޓަރުގެ ވާރޭ ވެހިފަ އެވެ. އަދި 24 ގަޑިއިރު ތެރޭގައި 140 މިލިލީޓަރުގެ ވާރޭ ވަނީ ވެހިފަ އެވެ. އަދި ކުރިއަށް އޮތް ގަޑިއިރުތަކުގައި ވެސް ވާރޭ ވެހޭނެ ކަމަށް މެޓު އޮފީހުން ބުނެ އެވެ.