އެޗްޑީސީގެ ޑެޕިއުޓީ މެނޭޖިން ޑިރެކްޓަރަކަށް ފަޔާޒު

އަހުމަދު ނިހާން

05 ޖެނުއަރީ 2025 - 19:27

0 comments

ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ޑެޕިއުޓީ މެނޭޖިން ޑިރެކްޓަރަކަށް ފަޔާޒް މަންސޫރު އައްޔަންކޮށްފި އެވެ.

ފަޔާޒަކީ އިމާރާތްކުރުމުގެ ދާއިރާއަށް ޚާއްސަ އާކިޓެކްޓެކެވެ. އޭނާ ވަނީ 1996ވަނަ އަހަރު، އޮސްޓްރޭލިއާގެ ކުއީންސްލޭންޑް ޔުނިވާސިޓީ އޮފް ޓެކްނޮލޮޖީއިން ކުއަންޓިޓީ ސާވެއިންއިން ޑިގްރީ ހާސިލްކުރައްވައިފައެވެ.

އަދި 2000ވަނަ އަހަރު، ނިއު ޒިލޭންޑުގެ ވިކްޓޯރިއާ ޔުނިވާސިޓީ އޮފް ވެލިންގްޓަނުން ބިލްޑިން ސައިންސުން މާސްޓާޒް ހާސިލްކުރައްވައިފައެވެ.

ފަޔާޒު ވަނީ ހުޅުމާލޭ ހިއްކި ދުވަސްވަރު އެ މަސައްކަތުގައި މުހިންމު ދައުރެއް އަދައިކުރައްވައިފައެވެ.

އެޗްޑީސީއަށް ޑެޕިއުޓީ މެނޭޖިން ޑިރެކްޓަރެއް އައްޔަންކޮށްފައިވާއިރު، އުސޫލުން ބޭރުން ހުޅުމާލޭން ބިމާއި ފްލެޓު ދޫކުރި ކަމަށް ބުނާ މައްސަލަތަކެއް ފެންމަތިވެ، ތަހުގީގުކުރަން ވަނީ ފަށާފަ އެވެ.

އެ މައްސަލައާ ގުޅިގެން އެޗްޑީސީގެ މެނޭޖިން ޑިރެކްޓަރު ކަމުގައި ހުންނެވި އިބްރާހިމް ފަޒުލް ރަޝީދު މަގާމުގެ މަސްއޫލިއްޔަތުތަކުން އެކަހެރިކޮށްފައި ހުއްޓައި އޭނާ ވަނީ އިސްތިއުފާ ދެއްވާފަ އެވެ. އެއާ އެކު، އެ މަގާމަށް ކުރީގެ ކޮންސްޓްރަކްޝަން މިނިސްޓަރު މުހައްމަދު މައުރޫފް ޖަމީލް ވަނީ އައްޔަންކޮށްފަ އެވެ.