ހޫދު ދޫކޮށްލި ގޮތް ގޯސް: ހައިކޯޓު

ހަސަން ހަލީމް

07 ޖެނުއަރީ 2025 - 13:37

0 comments

ހޫދު މީގެކުރީގެ ކޯޓު އަޑުއެހުމެއްގައި

ޓެރަރިސްޓް ޖަމާއަތް، އިސްލާމިކް ސްޓޭޓް (އައިއެސް)ގެ މީޑިއާ ކެމްޕޭނުތައް ހިންގުމުގައި އިސްކޮށް ހަރަކާތްތެރިވާ ކަމަށް ތުހުމަތުވާ ހޫދު މުހައްމަދު ޒާހިރު ބަންދުން ދޫކޮށްލަން ކްރިމިނަލް ކޯޓުން ނެރުނު އަމުރު ބާތިލްކުރަން ހައި ކޯޓުން އިއްޔެ ހުކުމްކޮށްފި އެވެ.

ކްރިމިނަލް ކޯޓުގައި މައްސަލައިގެ ޝަރީއަތް ކުރިއަށް ގެންދާއިރު، އޭޕްރީލް 19، 2022 އިން ފެށިގެން އޭނާ ހުރީ ޝަރީއަތް ނިމެންދެން ބަންދު ކޮށްފަ އެވެ. ނަމަވެސް މިދިޔަ އަހަރުގެ އޮކްޓޯބަރު މަހުގެ ތެރޭގައި ކްރިމިނަލް ކޯޓުން ވަނީ ޝަރީއަތް ނިމެންދެން އޭނާ ބަންދު ކުރަން ކޮށްފައިވާ އަމުރު 60 ދުވަހަށް ސަސްޕެންޑް ކޮށްފަ އެވެ. އެ މުއްދަތު ހަމަވެ، ސަސްޕެންޝަން އިތުރުކޮށްދޭން މިދިޔަ އަހަރުގެ ޑިސެމްބަރު މަހު ހުށަހެޅި އެވެ.

އެ ހުށަހެޅުމުގައި އެދުނު ގޮތަށް ކްރިމިނަލް ކޯޓުން ވަނީ އިތުރު 60 ދުވަހަށް ހޫދު ބަންދު ކުރަން ނެރެފައިވާ އަމުރު ސަސްޕެންޑް ކުރަން ނިންމައިފަ އެވެ. އެކަމަކު، އެ ނިންމުމާ މެދު ހިތްހަމަނުޖެހޭތީ، ދައުލަތުން އެ މައްސަލަ ހައި ކޯޓުގައި އިސްތިއުނާފުކުރީ އެވެ.

ހޫދު ދޫކޮށްލި މައްސަލައިގައި ހައިކޯޓުގެ ހުކުމްގައި ބުނީ ހޫދުގެ ޝަރީއަތް ނިމެންދެން ބަންދުކޮށްފައިވަނީ ޓެރަރިޒަމްގެ ގާނޫނުގެ ދަށުން ކަމަށެވެ. ނަމަވެސް ބަންދު މުރާޖައާ ކޮށްފައިވަނީ ޖިނާއީ އިޖުރާއަތުގެ ގާނޫނުގެ ދަށުންނެވެ. އެހެންކަމުން ހޫދުގެ ބަންދު މުރާޖައާ ކޮށްފައިވަނީ ރަނގަޅު އިޖުރާއަތެއްގެ ތެރެއިން ނޫން ކަމަށް ހައި ކޯޓުގައި މައްސަލަ ބެއްލެވި ތިން ފަނޑިޔާރުންގެ އިއްތިފާގުން ހުކުމްކުރި އެވެ.

ހޫދަކީ 2015 ވަނަ އަހަރުން ފެށިގެން އައިސިސްގެ ޕްރޮޕަގެންޑާ ފަތުރަމުން ދިޔަ މީހެއް ކަމަށާއި އެކަން ކޮށްފައިވަނީ ޓެލެގްރާމާއި އެ ނޫންވެސް އެންކްރިޕްޓް ކޮށްފައިވާ މެސެޖިން ޕްލެޓްފޯމްތަކުގައި ކަމަށް ފުލުހުން ބުނެފައިވެ އެވެ. އެކަމަކު ކޯޓުގައި ހޫދު ބުނީ އޭނާ އަކީ "ކޮމްޕިއުޓަ ސައިންސް އެނގޭ މީހެއް ނޫން" ކަމަށެވެ.

ހޫދަކީ އައިއެސް ޖަމާއަތުގެ ހަބަރު ފަތުރާ މީޑިއާ އޮޕަރޭޓްކުރާ މެންބަރެއްގެ ހައިސިއްޔަތުން މަސައްކަތްކުރާ މީހެއް ކަމަށް ދައުލަތުން ބުނެ އެވެ. ސޯޝަލް މީޑިއާގެ އެކި ޕްލެޓްފޯމްތަކުގައި އެކި އެކައުންޓްތަކުން އައިއެސް ޖަމާއަތައް ތާއީދުކޮށް، އެ ޖަމާއަތުގެ ލިޔެކިއުންތަކާއި ފޮޓޯއާއި ވީޑިއޯ، އިންޓަނެޓް މެދުވެރިކޮށް ފަތުރައި ޝާއިއުކޮށް އަދި ޓެރަރިޒަމްގެ އަމަލެއް ރާވައި ހިންގައިފާނެ ކަމުގެ އިންޒާރު ދެމުންދާ ކަމުގެ ތުހުމަތު ހޫދުގެ މައްޗަށް ދައުލަތުން ކުރެ އެވެ.

އެގޮތުން ޓެލެގްރާމް އަދި އެނޫންވެސް އެންކްރިޕްޓް ކޮށްފައިވާ މެސެޖިން ޕްލެޓްފޯމްތަކުގައި "ސްކާމިޝް" އާއި "ސްކާމިޝްކިޑް" ފަދަ ނަންނަމުގައި އެކައުންޓްތައް ހަދައިގެން ހަރުކަށި ފިކުރު ފަތުރާކަމުގެ ތުހުމަތު އޭނާގެ މައްޗަށް ވަނީ ކޮށްފަ އެވެ.

ހޫދު ހައްޔަރު ކުރީ ޖެނުވަރީ 4، 2022ގަ އެވެ. މި މައްސަލައިގެ ތަހުގީގަށް ބޭރުގެ އެކި ގައުމުތަކުގެ އިންޓެލިޖެންސް އޭޖެންސީތަކާއި، ތަހުގީގީ އިދާރާތަކުގެ އެހީތެރިކަން ލިބިފައިވާ ކަމަށް ދައުލަތުން ކުރިން ބުނެފައިވެ އެވެ. އެގޮތުން އެފްބީއައިގެ އިތުރުން އިޓަލީ ފުލުހުންނާއި ޔޫރަޕުގެ އެހެން ގައުމެއްގެ ފުލުހުން މި އޮޕަރޭޝަނުގައި ބައިވެރި ވެފައިވެ އެވެ.