މިހާރު އެމްޓީސީސީގެ މަޝްރޫއުތަކުގެ އަޕްޑޭޓް ރިއަލް-ޓައިމް ބަލައިލެވޭނެ

މަރިޔަމް އަނާ

08 ޖެނުއަރީ 2025 - 14:32

0 comments

އެމްޓީސީސީން ކުރިއަށްގެންދާ ހުރިހާ މަޝްރޫޢެއްގެ އެންމެ ފަހުގެ މަޢުލޫމާތު ވަގުތުން ބަލައިލެވޭނެ ޕްރޮޖެކްޓް ޑޭޝްބޯޑެއް އެ ކުންފުނިން ތަޢާރަފުކޮށްފިއެވެ.

އެމްޓީސީސީން އެކަމަށް ހާއްސަ ވެބް ޕޭޖެއް ހަދާފައި ވާއިރު، އެ ކުންފުނިން މިހާރު ހިންގަމުން އަންނަ ޕްރޮޖެކްޓްތަކާއި ހުއްޓިފައި އަދި ހަވާލުކޮށްފައިވާ އަދި މަސައްކަތް ނުފަށާ ހުރި ޕްރޮޖެކްޓްތަކުގެ ތަފްސީލު ވެސް ފެނެ އެވެ.

އެމްޓީސީސީން އާންމުކުރި މައުލޫމާތުން އެނގޭ ގޮތުން މި ވަގުތު އެ ކުންފުނިން، 61 ޕްރޮޖެކްޓެއް 17 އަތޮޅެއްގައި އަންނަނީ ހިންގަމުންނެވެ. އެމްޓީސީސީއަށް ހަވާލުކޮށްފައިވާ ޕްރޮޖެކްޓްތަކުގެ ތެރެއިން މަސައްކަތް ނުފަށާ، 43 ޕްރޮޖެކްޓެއް އެބަ އޮތެވެ. އަދި މަސައްކަތް މިވަގުތު ހުއްޓިފައި އޮތް 48 ޕްރޮޖެކްޓެއް ވެސް އެބައޮތެވެ.

މި ޑޭޝްބޯޑަކީ ކޮންމެ ތަނެއްގައި ހުރެގެން ވެސް ވަގުތުން ވަގުތަށް ޕްރޮޖެކްޓުތަކުގެ އަޕްޑޭޓު ބަލާލެވޭނެ މަގު އާންމުންނަށް ފަހިކޮށް ދިނުމަށް ކުންފުނީގެ މެނޭޖިން ޑިރެކްޓަރު އަހްމަދު ސައުދީގެ އިސްނެންގެވުމަށް ތައާރަފް ކުރި ޑޭޝްބޯޑެއް ކަމަށް އެމްޓީސީސީން ބުންޏެވެ.

ރާއްޖޭގައި ހިންގާ އުމްރާނީ ތަރައްގީގެ މަޝްރޫއުތައް އެންމެ ގިނައިން ހިންގާ އެއް ކުންފުންޏަކީ އެމްޓީސީސީއެވެ.