އަންނަ އަހަރު ކަނޑުހުޅުދޫ ބިން ހިއްކައި ރޯ ހައުސް މަޝްރޫއެއް

އަހުމަދު ނިހާން

08 ޖެނުއަރީ 2025 - 19:19

0 comments

ގއ. ކަނޑުހުޅުދޫގެ ތަރައްގީއަށް ގިނަ ކަންތައްތަކެއް ކޮށްދިނުމަށް ރައީސް ޑރ. މުހައްމަދު މުއިއްޒު މިއަދު ވައުދުވެވަޑައިގެންފި އެވެ.

ކަނޑުހުޅުދޫ ރައްޔިތުންނާ ބައްދަލުކުރައްވައި ވާހަކަފުޅުދައްކަވަމުން ރައީސް ވިދާޅުވީ އެ ރަށުގައި އިތުރަށް ހައުސިން ޔުނިޓް އެޅޭނީ ބިން އިތުރުކޮށްގެން ކަމަށާއި ނަމަވެސް މިއަހަރުތެރޭ ބިން ހިއްކުމުގެ މަޝްރޫއު ފެށޭނެ ކަމަށް ނުބެލެވޭ ކަމަށެވެ.

"އެހެން ނަމަވެސް މި އަންނަ އަހަރުގެ ބަޖެޓުގެ ތެރެއިން ބިން ހިއްކުމުގެ މަޝްރޫއެއް ހިންގައިދޭނަން. އަދި ބިން ހިއްކައި ނިމުނީމަ، މި އަންނަ އަހަރު ނުވާނަމަ ދެން ޖެހިގެން އޮންނަ އަހަރު އެންމެ ލަސްވެގެން ރޯ ހައުސްގެ ހައުސިން މަޝްރޫއެއް ހިންގައިދޭނަން،" ރައީސް ވިދާޅުވި އެވެ.

ރައީސް ވިދާޅުވީ މި އަހަރު އެންމެ އިސްކަން ދޭނީ ސިއްހަތާއި ތައުލީމީ ދާއިރާ ތަރައްގީ ކުރުމަށް ކަމަށެވެ. އަދި އެ ރަށު ސިއްހީ މަރުކަޒުން އެދިފައިވާ ގޮތަށް 24 ގަޑިއިރު ހިދުމަތް ދޭ ތަނަކަށް އެތަން ބަދަލުކޮށް ދެއްވާނެ ކަމަށް އެ މަނިކުފާނު ވިދާޅުވި އެވެ.

ކުޅިވަރު ތަރައްގީކުރަން ފުޓްސަލް ދަނޑުގައި ފެންސް ޖެހުމާއި ރޮސްޓްރަމް ޖާގަ އިތުރު ކުރުމާ އެކު، ދަނޑުގެ ޓާފު ބަދަލުކޮށް އެތްލެޓިކްސްއަށް އެތަން ވެސް ބޭނުން ކުރެވޭނެ ގޮތް ހަދައި ދެއްވާނެ ކަމަށް އެމަނިކުފާނު ވިދާޅުވި އެވެ.

އެ ރަސްމިއްޔާތަށްފަހު ބީއެމްއެލް އިން ވަނީ އެރަށުގައި ބަހައްޓާފައިވާ އޭޓީއެމް، ކައުންސިލާ ހަވާލުކޮށްފަ އެވެ.

އެމަނިކުފާނު ފާހަގަކުރެއްވި ގޮތުގައި މިހާރު އަތޮޅުތަކަށް ކުރައްވާ ދަތުރުފުޅުތަކަކީ ރަށްރަށުގެ ރައްޔިތުންނާ ބައްދަލުކުރައްވައި އެ ރަށްރަށުގެ ރައްޔިތުންގެ އަޑުއައްސަވައި އެ ރައްޔިތުންނަށް ބޮޑުވެފައި ހުރި ކަންކަން ބައްލަވައި އެކަންކަމަށް ހައްލު ހޯއްދަވައިދެއްވުމެވެ.