ކަރަންޓު މައްސަލައަށް ހައްލެއް ހޯދަން މެމްބަރުން ފެނަކައަށް

މަރިޔަމް އަނާ

14 ޖެނުއަރީ 2025 - 20:28

0 comments

އައްޑޫ ސިޓީއަށް ދިމާވެފައިވާ ކަރަންޓު މައްސަލައަށް ހައްލެއް ހޯދަން، އައްޑޫގެ އެކި ދާއިރާތައް ތަމްސީލުކުރާ ރައްޔިތުންގެ މަޖިލީހުގެ މެމްބަރުން ފެނަކައިގެ އިސްވެރިންނާ މިއަދު ބައްދަލުކުރައްވައިފި އެވެ.

އައްޑޫ ސިޓީގެ ގުޅިފައިވާ ރަށްތަކުން ކަރަންޓުގެ ޚިދުމަތް ކެނޑޭތާ ހަފުތާއަކަށްވުރެ ގިނަ ދުވަސް ވެފައިވާ ކަމަށާއި އެ މައްސަލައަށް އަދިވެސް ހައްލެއް ލިބިފައި ނުވާކަމަށް އެ ސިޓީގެ ކައުންސިލުން ރޭ ވަނީ ބުނެފަ އެވެ.

އައްޑުއަށް ކަރަންޓުގެ ޚިދުމަތް ފޯރުކޮށްފެމުން އަންނަ ފެނައިން މިއަދު ވަނީ އެ ކުންފުނީގެ މެނޭޖިން ޑިރެކްޓާ މޭޖާ (ރިޓަޔާރޑް) މުޙައްމަދު ނަޖާޙް އަދި ކުންފުނީގެ އިސްވެރިން، އައްޑޫ ސިޓީއަށް ނިސްބަތްވާ މަޖިލީސް މެމްބަރުންނާ ބައްދަލުކޮށްފައި ވާކަމަށް ބުނެފަ އެވެ.

ފެނަކަ އިން ނެރުނު ބަޔާނުގައި ބުނީ އައްޑޫގެ ގުޅިފައިވާ ރަށްތަކަށް ކަރަންޓުގެ މައްސަލަ ދިމާވެފައި ވަނީ ސީޕީއެސް ޖެންސެޓްތަކަކަށް ދިމާވި މައްސަލައަކުން ކަމަށެވެ. އެކަން ހައްލު ކުރަން ސްޕެއާ ޕާޓްސް ހޯދުމުގެ މަސައްކަތް ކުރަމުން އަންނައިރު މިއަދު އެއް ޖެންސެޓްގެ ސްޕެއާ ޕާޓްސް ލިބޭނެ ކަަމަށް ފެނަކައިން ބުންޏެވެ.

އެކަމަކު ބާކީ ޖަނަރޭޓަރުތަކަށް ބޭނުންވާ ސްޕެއާ ޕާޓްސް ލިބޭނެ ވަކި އިރެއް އެ ކުންފުނިން ނުބުނެ އެވެ. އެކަމަކު އެކަން އެއްކޮށް ހައްލު ކުރެވެންދެން ކަރަންޓު ލޯޑު ހިފެހެއްޓުމަށް، އެކި ސަރަހައްދުތަކުން ކަރަންޓު ކެނޑޭނެ ކަމަށް އެ ކުންފުނިން ބުންޏެވެ.