ރާއްޖޭގައި ފާލު ބަލަން އުޅުނު އިންޑިއާގެ މީހުން ޑީޕޯޓުކުރަނީ

އަލީ ރާޒީ

22 ޖެނުއަރީ 2025 - 18:05

0 comments

ރާއްޖެއަށް އައިސް ފާލުބެލުމުގެ ކަންކަން ކުރަމުންދަނިކޮށް އަތުލައިގަތް އިންޑިއާ ތިން މީހުން.

ރާއްޖޭގައި ފާލުބެލުމުގެ ކަންކަން ކުރަމުންދިޔަ އިންޑިއާއަށް ނިސްބަތްވާ ގުރޫޕެއް އިމިގްރޭޝަންގެ ބެލުމުގެ ދަށަށް ގެންގޮސްފި އެވެ.

އިމިގްރޭޝަނުން މިއަދު އެކްސްގައި ކުރި ޕޯސްޓެއްގައި ވަނީ ގަވައިދާ ޚިލާފަށް ފާލު ބެލުމުގެ ހަރަކާތްތަކެއް ކުރިއަށްގެންދިޔަ ތިން ބިދޭސީއަކު އިއްޔެ ހައްޔަރުކޮށްފައިވާ ކަމަށް ބުނެފައެވެ.

އިންޑިއާއަށް ނިސްބަތްވާ އެ ތިން މީހުންނަކީ:

ނަގަރަޖާ ބައިލްޕަޓީ، 39 އަހަރު
ދަނަންޖޭ ބައިލްޕަޓީ، 18 އަހަރު
ސްރީހަރީ ވަނަމް، 25 އަހަރު

މާސްޓާ ދުރްގާ ރާއޯ ގުރޫޖީގެ ނަމުގައި ފޭސްބުކް ޕޭޖެއް މެދުވެރިކޮށް އެ މީހުން ދައުވާ ކުރަނީ އަތާއި މޫނު ބަލައިގެން އަދި ހޮރޮސްކޯޕް މެދުވެރިކޮށް ދިމާވެފައިވާ ހުރިހާ މައްސަލައަކަށް ހައްލު ހޯދައިދޭނެ ކަމަށެވެ.

އެ މީހުންގެ ސެޝަނަކަށް 300ރ. ނަގާއިރު، 'ފަރުވާ' ދެމުންދިޔައީ ހުޅުމާލޭގަ އެވެ.

"ވަރަށް ގިނަ މީހުން މިހާރު ވެސް އެބަ ފަރުވާ ހޯދަން އާދޭ،" ފޭސްބުކް ޕޭޖުގައިވާ ނަންބަރަށް ގުޅުމުން ބުންޏެވެ.