އައިސީސީއާ ދެކޮޅަށް ޓްރަމްޕް ސަރުކާރުން ދަތިކުރުމުގެ ފިޔަވަޅު އަޅައިފި

ހަސަން ހަލީމް

07 ފެބުރުއަރީ 2025 - 21:38

0 comments

ބައިނަލްއަގްވާމީ ޖިނާއީ ކޯޓުގެ މައި އިމާރާތް ދަ ހޭގްގައި.

ފަލަސްތީނުގެ ޣައްޒާގައި އިޒްރޭލުން ހިންގަމުން ދިޔަ ލާއިންސާނީ އަމަލުތަކުގެ މައްސަލައިގައި އިޒްރޭލުގެ ވެރިން ހައްޔަރުކުރުމަށް އަމުރު ނެރުނު އިންޓަނޭޝަނަލް ކްރިމިނަލް ކޯޓް (އައިސީސީ) އާ ދެކޮޅަށް އެމެރިކާގެ ރައީސް ޑޮނަލްޑް ޓްރަމް ދަތިކުރުމުގެ ފިޔަވަޅު އަޅައިފި އެވެ.

އެ ކަމަށް އަމުރު ކުރައްވައި ރިޔާސީ ގަރާރުގައި ސޮއިކުރެއްވުމަށް ފަހު ޓްރަމްޕް ވިދާޅުވީ، އެ ކޯޓުން ވަނީ އެމެރިކާއާއި އިސްރާއީލަށް އަމާޒުކޮށް ޢައިރު ޤާނޫނީ އަދި އެއްވެސް އަސާސެއް ނެތް އަމަލުތަކެއް ހިންގާފައި ކަމަށެވެ.

ޓްރަމްޕް ވަނީ އައިސީސީގެ އޮފިޝަލުންނާއި މުވައްޒަފުންނާއި އެ މީހުންގެ އާއިލާގެ މެންބަރުންގެ އިތުރުން އެ ކޯޓަށް އެހީތެރިވި ކަމަށް ބެލެވޭ މީހުންނަށް މާލީ ގޮތުން ފިޔަވަޅު އަޅައި، ވިސާގެ ހުރަސްތައް އެކަށައަޅައި ދަތުރުކުރަން މަނާކުރަން އަމުރުކުރައްވާފައެވެ.

ޓްރަމްޕް އެ ފިޔަވަޅު އަޅުއްވާފައިވަނީ އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އެމެރިކާއަށް ދަތުރުކުރައްވައި، އެ މަނިކުފާނާ ބައްދަލުކުރައްވާފައިވާ ދަނޑިވަޅެއްގަ އެވެ.

އިޒްރޭލާއި އެމެރިކާ އަކީ ވެސް އައިސީސީގެ މެންބަރުންނެއް ނޫނެވެ.

އައިސީސީން އެމެރިކާގެ މި ނިންމުމާ މެދު އެއްޗެއް ބުނުމުގެ ކުރިން، އެ ކޯޓު ހުންނަ ނެދަލެންޑްސް އިން ވަނީ އެ ނިންމުމާ މެދު ހިތާމަކުރާ ކަމަށް ބުނެފަ އެވެ.

އިޒްރޭލުގެ ބޮޑުވަޒީރު ނަތަންޔާހޫ އާއި ކުރީގެ ޑިފެންސް މިނިސްޓަރު ޔޯވް ގަލަންޓް އަދި ހަމާސްގެ އަސްކަރީ ވެރިޔާ މުހައްމަދު ޟައީފް ހައްޔަރުކުރަން އައިސީސީން އަމުރު ނެރުނީ މިދިޔަ އަހަރުގެ ނޮވެމްބަރު މަހުގެ 21 ވަނަ ދުވަހު އެވެ.

"އިންސާނިއްޔަތާ ހިލާފް ޖަރީމާތައް ހިންގުމާއި ހަނގުރާމައިގެ ކުށްތައް 8 އޮކްޓޫބަރު 2023 އިން، މި މީހުން ހައްޔަރުކުރުމުގެ އަމުރަށް އެދި ޕްރޮސިކިއުޓަރުން މައްސަލަ ހުށަހެޅި ތާރީހު ކަމަށްވާ 20 މެއި 2024 އަށް ހިންގާފައި ވާތީ ބެންޖަމިން ނަތަންޔާހޫ އާއި ޔޯވް ގަލަންޓާއި ދެ މީހުން ހައްޔަރުކުރުމަށް އަމުރު ނެރެން،" ދަ ހޭގްގައި ހުންނަ އައިސީސީން ނެރުނު ބަޔާނުގައި ބުންޏެވެ.

އައި.ސީ.ސީއަކީ ދުނިޔޭގެ ކޯޓެކެވެ. އެމެރިކާ އަދި އިސްރާއީލް މި ކޯޓުގެ މެންބަރުން ކަމުގައި ނުވިނަމަވެސް، ނަސްލު ފޮހެލުމާއި، އިންސާނިއްޔަތާ ދެކޮޅު ކުށްތަކާއި، ހަނގުރާމަވެރި ކުށްތަކުގެ ދައުވާ އުފުލުމުގެ ބާރު މި ކޯޓަށް ލިބިގެންވެއެވެ.