އެޗްޑީސީގެ އިސްވެރިންގެ ގޮތުގައި ތިއްބެވި ފާއިދާއި ޔާމީން ވަކިކޮށްފި

ހަސަން ހަލީމް

15 ފެބުރުއަރީ 2025 - 11:19

0 comments

އެޗްޑީސީގެ ޗީފް ޑިވެލޮޕްމަންޓް އޮފިސަރު (ސީއެފްއޯ) އަބްދުﷲ ފާއިދާއި ޗީފް ބިޒްނަސް އޮފިސަރު އަދި މީޑިއާ ޑިޕާޓްމެންޓްގެ ހެޑް އަހްމަދު ޔާމީން ސަސްޕެންޝަންގައި ބޭތިއްބުމަށްފަހު މަގާމުން ވަކިކޮށްފި އެވެ.

ފާއިދާއި ޔާމީން ވަކިކުރި ސަބަބާއި އެ ދެ ބޭފުޅުންގެ މައްޗަށް ކުރާ ތުހުމަތުތަކާ ގުޅޭ ގޮތުން އެޗްޑީސީން މިހާތަނަށް އެއްޗެއް ނުބުނެ އެވެ.

ފާއިދާއި ޔާމީން ސަސްޕެންޑްކުރީ ގެދޮރުވެރިޔާ/ބިންވެރިޔާ ސްކީމާ ގުޅޭ ގޮތުން ބޮޑެތި ތުހުމަތުތަކެއް ކުރެވޭ ކުރީގެ މެނޭޖިން ޑިރެކްޓަރު ފަޒުލް ރަޝީދުގެ މައްސަލަތައް ބަލަން ފެށުމާ އެކު އެވެ. އެކަމަކު އެ މައްސަލައާ އެ ދެބޭފުޅުންނާ ގުޅުން އޮތް ކަމެއް އަދި ސާފެއް ނުވެ އެވެ.

ފާއިދާއި ޔާމީން ހިމެނޭ ގޮތަށް 15 މުވައްޒަފަކު މިދިޔަ އަހަރުގެ ޑިސެމްބަރ މަހު މަގާމުން ވަކިކުރި ނަމަވެސް ވަކި ހިސާބަކުން އެ އެންމެންގެ ވަޒީފާ އަލުން އިޔާދަކުރި އެވެ. އެކަމަކު، މައްސަލަތައް ބަލައި ނިމެންދެން ތިބީ ސަސްޕެންޑްކޮށްފަ އެވެ.

ބިންވެރިޔާ ސްކީމާ ގުޅޭ ތަހުގީގަށް ސަސްޕެންޑްކުރި ބައެއް މީހުންނަށް އެޅި ފިޔަވަޅުތައް އުވާލާފައިވާކަމަށް އެޗްޑީސީން ކުރިން ވަނީ ބުނެފަ އެވެ.

އެޗްޑީސީގެ ޗެއާމަން ފިޔަވައި ބޯޑުގެ ހުރިހާ މެންބަރުންނާއި ބައެއް އިސްވެރިން މިދިޔަ އަހަރު ސަސްޕެންޑް ކުރީ ފޯޖުކޮށްފައިވާ ލިޔުންތަކެއް ބޭނުންކޮށްގެން ބިންވެރިޔާ ސްކީމުގެ ދަށުން ގޯތި ލިބިފައިވާ ކަމަށް ދައްކައިގެން އެ ގޯތި ތަކުގައި އިމާރާތްކުރުމަށް ބޭނުންވެ އެކަމުގެ ހުއްދައަށް އެދުނު މައްސަލައެއް ފަޅާއެރުމުންނެވެ.

ފޯޖުކޮށްފައިވާ ލިޔުންތަކެއް ބޭނުންކޮށްގެން ގޯތި ހޯދަން އުޅުނު މީހުންގެ ތެރޭގައި އެޗްޑީސީގެ މެނޭޖިން ޑިރެކްޓަރު ފަޒުލް ރަޝީދުގެ ބޭބެ ފަޒީލް ރަޝީދުވެސް ހިމެނެ އެވެ.

މައްސަލަ ފެންމަތިވުމާ އެކު ދިފާއުގައި އެތައް ވާހަކައެއް ދެއްކެވުމަށްފަހު ފަޒުލް ވަނީ މަގާމުން އިސްތިއުފާ ދެއްވާފަ އެވެ.