ފަޅު ރަށަކުން މަސްތުވާތަކެއްޗާއެކު، އަންހެނަކާއި 8 ފިރިހެނުން ހައްޔަރުކޮށްފި

އަލީ ރާޒީ

17 ފެބުރުއަރީ 2025 - 14:24

0 comments

ފަޅުރަށެއް ކަމަށްވާ ބ. މާރިކިލުގައި ހިންގި މަސްތުވާތަކެތީގެ އޮޕަރޭޝަނެއްގައި ނުވަ މީހުން ހައްޔަރުކޮށްފި އެވެ.

ފުލުހުން މިއަދު ބުނީ، ކައުންޓާ ނާކޮޓިކްސް އިންޓެލިޖެންސަށް ލިބުނު މައުލޫމާތަކާ ގުޅިގެން މިދިޔަ ހޮނިހިރު ދުވަހު ބ. މާރިކިލުގައި މަސްތުވާތަކެތީގެ އޮޕަރޭޝަނެއް ހިންގައިފައިވާ ކަމަށެވެ. އެގޮތުން އެ އޮޕަރޭޝަން ކުރިއަށްގެންދިޔައީ މާރިކިލުގައި މަސްތުވާތަކެތި ބޭނުންކޮށް ގެންގުޅުމާއި މަސްތުވާތަކެތީގެ ވިޔަފާރިކުރުމުގެ ތުހުމަތުގައި ކަމަށް އެ މުއައްސަސާފައިން ބުންޏެވެ.

އެ އޮޕަރޭޝަން ކުރިއަށްގެންދިޔައީ ކައުންޓާ ނާކޮޓިކްސް އިންޓެލިޖެންސާއި ޑްރަގް އެންފޯސްމަންޓާއި ބ. އަތޮޅު ފުލުހުން ގުޅިގެންނެވެ.

ފުލުހުން ވަނީ އެ އޮޕަރޭޝަނުގައި ހައްޔަރުކޮށްފައިވާ މީހުންގެ ވަނަވަރު ހާމަކޮށްފައެވެ. އޭގެ ތެރޭގައި ހިމެނެނީ ތިން ދިވެހީންނާއި ހަ ބިދޭސީން ހިމެނެއެވެ. އެއީ:

މ. ޖަވާހިރުވާދީ، އަލްޙާން ރަޝީދު ޙުސައިން (49އ)

ޏ. ފުވައްމުލައް/ ދިގުވާނޑު، ހޮލެންޑް، މަރްޔަމް ރިފާޢު (25އ)

ރ. އިނގުރައިދޫ، ވަފާ، ޢަބްދުލް މުޙްސިން ޙަސަން (65އ)

ކުމަރެސަން ޗިންނައިއަ، އިންޑިއާ (20އ)

ދިނޭޝް ސައްމިޔައްޕަން، އިންޑިއާ (29އ)

އެލަވެންޑަން ސިވަގުނަނަ ސަންޑަރަމް، ސްރީލަންކާ (39އ)

ކަނަގަރާޖު ޕޮންނައްޔަ ސުޕައްޔަ، ސްރީލަންކާ (46އ)

މުޙައްމަދު މައްސޫދު، ބަނގުލަދޭޝް (46އ)

ސަބެޝަން ނަހާރަޖަ، ސްރީލަންކާ (31އ)

އެ އެންމެން ވެސް ހައްޔަރުކޮށްފައިވަނީ ކޯޓު އަމުރުގެ ދަށުން ކަމަށް ފުލުހުން ބުންޏެވެ.

އެ މުއައްސަސާއިން ބުނީ އެ ނުވަ މީހުން ހައްޔަރުކޮށް ބަލައިފާސްކުރިއިރު 162 ބަނގުރާ ދަޅާއި ފަސް ބަނގުރާ ފުޅިއާއި މަސްތުވާތަކެތި ކަމަށް ބެލެވޭ ތަކެތި ފެނިފައިވާ ކަމަށެވެ. އެގޮތުން ފެނުނު މަސްތުވާތަކެތީގެ ވަގުތީ ބަރުދަނަކީ 12.8 ގުރާމް ކަމަށް ފުލުހުން ބުންޏެވެ.

މި މައްސަލައާ ގުޅިގެން ހައްޔަރުކުރި ނުވަ މީހުންގެ ބަންދާ މެދު ގޮތެއް ނިންމުމަށް ކޯޓަށް ހާޒިރުކުރުމުން އޭގެ ތެރެއިން ވަފާ ޝަރުތުކުރުމަށް ފަހު ދޫކޮށްލައި އަދި ދެންތިބި އަށް މީހުންގެ ބަންދަށް 15 ދުވަސް ޖަހާފައިވެ އެވެ.

މި މައްސަލަ ފުލުހުން އަންނަނީ އިތުރަށް ތަހުގީގު ކުރަމުންނެވެ.