ގާސިމްގެ ހަރަދުގައި މާމިގިލީ ޕޮލިސް ސްޓޭޝަން ހަދަން ހުށަހަޅައިފި

މަރިޔަމް އަނާ

20 ފެބުރުއަރީ 2025 - 12:21

0 comments

ގާސިމް ވިލާ އިންޓަނޭޝަނަލް އެއާޕޯޓުގައި ގާސިމް މަޑުކޮށްލައްވައިގެން

އދ. މާމިގިލީގައި އިމާރާތްކުރަން ނިންމާފައިވާ ފުލުހުންގެ އިމާރާތް އެ ދާއިރާގެ މެންބަރު ގާސިމް އިބްރާހީމްގެ ވިލާ ފައުންޑޭޝަންގެ ހަރަދުގައި އިމާރާތްކުރަން ގާސިމް ހުށަހަޅުއްވައިފި އެވެ.

އެ ހުއްދައަށް އެދިވަޑައިގެން ސީޕީއަށް އެޑްރެސްކުރައްވައި އިއްޔެ ވަނީ ސިޓީއެއް ފޮނުއްވާފަ އެވެ.

ސިޓީގައި ވަނީ ފާއިތުވި ފަސް އަހަރުވެސް ދައުލަތުގެ ބަޖެޓުގައި މާމިގިލީގައި ފުލުހުންގެ އިމާރާތެއް އެޅުމަށް ހިމެނިކަން ފާހަގަކުރައްވާފަ އެވެ.

އެކަމުގައި "އުޅެމުންދާ ދަތި ހާލު" ވަޒަން ކުރެވޭ ކަމަށް ވިދާޅުވެ އުފަން ރަށް މާމިގިލީގެ ފުލުހުންގެ އިމާރާތުގެ މަސައްކަތް ވިލާ ފައުންޑޭޝަންގެ ސްޕޮންސާޝިޕްގައި ކުރަން ނިންމަވާފައިވާކަން ގާސިމް ހާމަކުރެއްވި އެވެ.

"ކޮމިޝަނާ އޮފް ޕޮލިސް ހުއްދަ ދެއްވައިފި ނަމަ މާމިގިލީގައި އެޅުމަށް ހަމަޖެހިފައިވާ ފުލުހުންގެ މަރުކަޒު ވިލާ ފައުންޑޭޝަންގެ ސްޕޮންސާޝިޕްގެ ދަށުން އިމާރާތް ހެދުމަށް އަޅުގަނޑު ނިންމާފައިވާ ވާހަކަ ދެންނެވީމެވެ. ވީމާ އިމާރާތް ކުރުމަށް ބޭނުންވާ ކުރެހުމާއި އިމާރާތް ހެދުމަށް ސްޕޮންސަޝިޕް ގަބޫލުކުރި ކަމުގެ ލިޔުން ލިބޭނެ ގޮތް ހަމަޖައްވައި ދެއްވުން އެދެމެވެ،" ގާސިމްގެ ސިޓީގައިވެ އެވެ.

ފުލުހުންގެ ތަފާސްހިސާބަށް އަލިއަލުވައިލައްވަމުން ގާސިމް ވިދާޅުވި ގޮތުގައި އދ. އަތޮޅުގައި ކުށްކުރުން އެންމެ ގިނައީ ވެސް މާމިގިލީގަ އެވެ. އެހެންވެ، ފުލުހުންގެ ހިދުމަތް ދިނުމަށް ރީޖަނަލް ފެންވަރުގެ ސްޓޭޝަނެއް ގާއިމް ކުރުމަށް އެކި ފަހަރު މަތިން ވާހަކަތައް ދެއްކެވިފައިވާ ކަމަށް އޭނާ ވިދާޅުވި އެވެ.