ދިރާގުން މަމްސް އެއިޑާ ގުޅިގެން 100 އާއިލާއަކަށް އެހީ ދެނީ

މަރިޔަމް އަނާ

18 ފެބުރުއަރީ 2025 - 14:10

0 comments

ދިރާގާއި މަމްސް އެއިޑްގެ އޮފިޝަލުންތަކެއް: ދިރާގުން މަމްސް އެއިޑާ ގުޅިގެން 100 އާއިލާއަށް އެހީ ދެނީ

ދިރާގާއި މަމްސް އެއިޑް ގުޅިގެން މި އަހަރު ވެސް 'ރަމަޟާން އެއިޑް' ކެމްޕެއިންގެ ދަށުން،އެހީއަށް ބޭނުންވެފައިވާ 100 އާއިލާއަކަށް އެހީތެރިކަން ފޯރުކޮށްދޭން ހަމަޖެހިފައިވާ ކަމަށް އެ ކުންފުނިން މިއަދު ބުނެފި އެވެ.

މިއީ ކޮންމެ އަހަރެއްގެ ރޯދަ މަހެއްގައި ވެސް މަމްސް އެއިޑާ ގުޅިގެން ދިރާގުން ކުރިއަށް ގެންދާ ކެމްޕެއިނެކެވެ. "ރަމަޟާން އެއިޑް" އަކީ ރާއްޖޭގެ އެކި ކަންކޮޅުތަކުގައި އެހީއަށް ބޭނުންވެފައިވާ އާއިލާތަކަށް އެހީތެރިކަން ފޯރުކޮށްދޭން ކުރިއަށްގެންދާ މުހިންމު ޕްރޮގްރާމެކެވެ.

އެ ޕްރޮގްރާމްތަކަށް އެހީތެރިކަން ފޯރުކޮށްދިނުމުގެ ފުރުސަތު ވަނީ އާންމުންނަށް ވެސް ހުޅުވާލައިފަ އެވެ.

ރޯދަ މަހު މަމްސް އެއިޑް އިން ކުރިއަށް ގެންދާ އެ ޕްރޮގްރާމުގެ މަގުސަދަކީ، މަމްސް އެއިޑްގެ ކެއާ ލިސްޓުގައި ހިމެނޭ އެކަނިވެރި މައިންނާއި ހާއްސަ އެހީއަށް ބޭނުންވާ މައިންނާއި ހާއްސަ އެހީއަށް ބޭނުންވާ ކުދިންނަށް އަޅާލައި މައިންނަށް ރޯދަ މަހަށް ބޭނުންވާ ޒަރޫރީ ކާބޯތަކެތި ހިމެނޭ ކެއާ ޕެކޭޖްތައް ފޯރުކޮށްދިނުމެވެ.

މަމްސް އެއިޑަކީ އަންހެނުން، ޚާއްޞަކޮށް މަންމައިން، ބާރުވެރިކުރުވައި އެ ފަރާތްތަކަށް އެހީތެރިކަން ފޯރުކޮށްދިނުމުގެ މަގުސަދުގައި މަސައްކަތްކުރާ ޖަމިއްޔާއެކެވެ.