މުއައްސަސާތަކުގެ މުސާރަ ކުޑަކުރަން ގާނޫނު އިސްލާހު ކުރަން ހުށަހަޅަން އެދިއްޖެ

އައިމިނަތު ޝިޔާޒާ

18 ފެބުރުއަރީ 2025 - 14:13

0 comments

މިނިވަން މުއައްސަސާތަކުގެ ވެރިންގެ މުސާރަ ކުޑަކުރަން ފޮނުވި ނަމަވެސް ގާނޫނު ބަދަލުކޮށްގެން ނޫން ގޮތަކަށް އެކަން މި ވަގުތު ކުރެވެން ނެތްކަން ރައީސް ޑރ. މުހައްމަދު މުއިއްޒަށް ލަފާ ދޭން މަޖިލީހުގެ މާލިއްޔަތު ކޮމިޓީން މިއަދު ފާސްކޮށްފި އެވެ.

އިޤްތިޞާދީ އިޞްލާޙީ އެޖެންޑާގެ ދަށުން ދައުލަތުގެ ޚަރަދުތައް ކުޑަކުރުމުގެ ތެރެއިން ކުރިއަށް އޮތް 2 އަހަރު ދުވަހަށް، މިނިވަން މުޢައްސާސާތަކުގެ އިސްވެރިންގެ މުސާރައިގެ ތެރެއިން 12،000 ރުފިޔާއަށް ވުރެ މަތިން ލިބޭ މުޢައްސާތަކުގެ އިސްވެރިންގެ އަސާސީ މުސާރައިން 10 އިންސައްތަ އުނިކުރުމަށް ވަނީ ނިންމަވާފައެވެ. އަދި މަޖިލީހަށް ފެނިވަޑައިގަންނަވާނަމަ ރައްޔިތުންގެ މަޖިލީހުގެ މެންބަރުންނާއި ޝަރުޢީ ދާއިރާގެ އިސްވެރިންގެ މުސާރައިން 10 އިންސައްތަ އުނިކުރުމަށް ވަނީ ނިންމާފައެވެ. މިކަމާއި މެދު ރައްޔިތުންގެ މަޖިލީހުން ގޮތެއް ނިންމުމަށް ރައީސުލްޖުމްހޫރިއްޔާ ވަނީ މަޖިލީހަށް ހުށަހަޅުއްވާފައެވެ.

މިމައްސަލަ ރައްޔިތުންގެ މަޖިލީހުގެ މާލިއްޔަތު ކޮމެޓީން ދިރާސާކުރެއްވިއިރު، ކޮމެޓީން ނިންމެވި ގޮތުގެ ރިޕޯޓު ވަނީ ކޮމެޓީ ބައްދަލުވުމުގައި ހުށަހަޅާފައެވެ. މި ރިޕޯޓުގައިވާ ގޮތުން، ގިނަ މިނިވަން މުޢައްސާސާތަކުގެ މުސާރައާއި އިނާޔަތަށް ބަދަލު ގެނެވެނީ ޤާނޫނުތަކަށް އިސްލާހު ހުށަހަޅައިގެން ކަމަށެވެ. އަދި އެއް ގިންތިއެއްގެ މުސާރައާޢި އިނާޔަތްތައް އުނިކުރަން ޖެހޭނީ އެއްހަމައެއްގެ މަތިން ކަމަށްވުމާއެކު މިފަދަ ގޮތަކަށް ނިންމުމަކީ އިންސާފުވެރި އަދި އަދުލުވެރި ގޮތެއް ނޫން ކަމާށް ވަނީ ހުށަހަޅާފައެވެ. އެހެންކަމުން މިވަގުތު މުސާރައިން އުނިކުރުމަށް ނުފެންނަ ކަމަށް ރިޕޯޓުގައި ވެއެވެ.

މާލިއްޔަތު ކޮމެޓީގައި ވާހަކަ ދައްކަވަމުން އެ ކޮމެޓީގެ މުޤައްރިރު ޤާސިމް އިބްރާހިމް ވިދާޅުވީ، މި އިސްލާހުތައް ނުގެނެސް މުސާރަ ކުޑަކުރެވޭނީ މަޖިލިސް މެންބަރުންނާއި، އޮޑިޓް އޮފީހާއި ޖުޑީޝަރީގެ އެކަނި ކަމަށެވެ. އަދި މިއީ އެންމެ 14 މިލިޔަން ރުފިޔާ ކަމަށުގައި މުޤައްރިރު ފާހަގަކުރެއްވިއެވެ.

މިއަދު ކުރިއަށް ދިޔަ ކޮމިޓީ ބައްދަލުވުމުގައި ފުނަދޫ ދާއިރާގެ ޕީއެންސީ މެމްބަރު މުހައްމަދު މަމްދޫހު ހުށަހެޅުއްވީ ގާނޫނުތަކަށް ބަދަލުތައް ގެނައުމަށް ފަހު ހުރިހާ ކޮމިޝަންތަކުގެ މުސާރާ ކުޑަކުރުމަށް ފެންނަ ކަމަށް ރައީސް މުއިއްޒު އަށް ލަފާ ދިނުމަށެވެ.

އޭނަގެ އެ ހުށަހެޅުން ފާސްވީ ކޮމިޓީގައި ބައިވެރިވެވަޑައިގެންނެވި ހުރިހާ މެންބަރުންގެ އިއްތިފާގުންނެވެ.

މާލިއްޔަތު ކޮމިޓީގައި ވާހަކަދައްކަވަމުން އިއްޔެ މަޖިލީހުގެ ނައިބު ރައީސް އަހުމަދު ނާޒިމް ވެސް ވަނީ އެ ކަންބޮޑުވުން ފާޅުކުރައްވާފައެވެ.

އޭނާ ވިދާޅުވީ، މާލީ ހާލަތު ވަރަށް ބޮޑަށް ގޯސްވެފައިވާ ކަމަށާއި މިދިޔަ މަހު ވެސް ދައުލަތަށް ލިބުނު އާމްދަނީ ވަރަށް ބޮޑަށް ދަށްވެފައިވާ ކަމަށެވެ. އަދި، ޚަރަދު ވެސް ކުޑަވާތަން ނުފެންނަކަން ފާހަގަކުރައްވައި އޭނާ ވެސް ވަނީ ކަންބޮޑުވުން ފާޅުކޮށްފައެވެ.

ސަރުކާރުން ވަނީ ޚަރަދުތައް ކުޑަކޮށް، މާލީ އިސްލާހީ ފިޔަވަޅުތަކާ އެކު އިގުތިސާދީ ހާލަތު ރަނގަޅުވާނެ ކަމަށް ތަކުރާރުކޮށް ބުނެފައެވެ.