މާލެ ސަރަހައްދުގެ 4 ހޮސްޕިޓަލުގެ އޯޕީޑީ މިއަދު ބަންދުވާނެ

އަލީ ރާޒީ

02 މާޗް 2025 - 12:36

0 comments

މޫސުން ގޯސްވެ، މާލެ ސަރަހައްދުގައި ފެންބޮޑުވުމުގެ ސަބަބުން އައިޖީއެމްއެޗާއި، ދަރުމަވަންތަ ހޮސްޕިޓަލް އަދި ހުޅުމާލެ ހޮސްޕިޓަލްގެ އޯޕީޑީ މިއަދު ބަންދުކޮށްފި އެވެ.

އެ ހަތަރު ހޮސްޕިޓަލްގެ އޯޕީޑީ ހިދުމަތް މިއަދު ބަންދުކަން އަންގައި އައިޖީއެމްއެޗުން މިއަދު ވަނީ ބަޔާނެއް ނެރެފަ އެވެ.

އެ ބަޔާނުގައިވާ ގޮތުން، އެ ހޮސްޕިޓަލުތަކުގެ އޯޕީޑީ ބަންދުކުރަން ނިންމީ ވިއްސާރައިގެ ސަބަބުން މިއަދަކީ ސަރުކާރު ބަންދު ދުވަހެއްގެ ގޮތުގައި ކަނޑައަޅާފައިވުމާ އަދި ހޮސްޕިޓަލް ސަރަހައްދުގައި ފެންބޮޑުވުމުގެ ސަބަބުން ބަލިމީހުންނަށް ހޮސްޕިޓަލަށް ދަތުރުކުރުމުގައި ތަކުލީފަކަށް ވާނެތީ ކަމަށެވެ.

އެ ހޮސްޕިޓަލުތަކުގެ އޯޕީޑީ ބަންދުވި ނަމަވެސް، އިން-ޕޭޝަންޓް (އައިޕީޑީ) އަދި އިމަޖެންސީ ހިދުމަތްތައް މެދުނުކެނޑި ކުރިއަށްދާނެ އެވެ.

އިތުރު މައުލޫމާތު ހޯދަމަށް ގުޅާނީ 3335335 އަށެވެ.

މޫސުން ގޯސްވެ، ރެއާއި އިއްޔެ ކުރި ވިއްސާރައިގައި މާލޭގައި ފެންބޮޑުވެ، ގެތަކުން ނަޖިސް ބޭރުވުމާ ގުޅިގެން ހަތަރު ގެއަކުން 40 މީހަކަށް ވަގުތީ ބޯހިޔާވަހިކަން ވެސް ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ވަނީ ފޯރުކޮށްދީފައެވެ. މާލޭގެ އިތުރުން އަތޮޅުތެރޭގެ ވަރަށް ގިނަ ރަށްތަކުގައި ވެސް އިއްޔެ ވަނީ ފެންބޮޑުވެފަ އެވެ.

ކުރިއަށް އޮތް ދެތިން ދުވަހު މޫސުން ގޯސްވާނެ ކަމަށް މެޓުން މިދިޔަ ބުރާސްފަތި ދުވަހު ވަނީ ލަފާކޮށްފައެވެ. މޫސުން އަލިވާނެ ކަމަށް މެޓުން ލަފާކުރަނީ މާދަމާއަށެވެ.

ފާހަގަކޮށްލެވޭ ގޮތުގައި ރޭ މޫސުން ގޯސްވެ، މެދުރާއްޖެތެރެއަށް މޫސުމާ ބެހޭ ގައުމީ އިދާރާއިން އޮރެންޖު ސަމާލު ވެސް ނެރުނެވެ.