މިޔަންމާ މައްސަލައިގައި ރާއްޖެއިން ލިޔުމުން އޮބްޒަވޭޝަން ހުށަހަޅައިފި

ހަސަން ހަލީމް

05 މާޗް 2025 - 12:55

0 comments

އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ)ގައި މިޔަންމާއާ ދެކޮޅަށް ހުށަހަޅައިގެން ހިނގަމުންދާ މައްސަލައިގެ ތެރެއަށް ރާއްޖޭން ތަދައްހުލްވެ، އެ ކޯޓަށް އޭގެ ލިޔުންތައް ބަންޑާރަ ނައިބުގެ އޮފީހުން މިދިޔަ ހުކުރު ދުވަހު ހުށަހަޅައިފި އެވެ.

މިޔަންމާގައި އާބާދީ މަދު ރޮހިންގާ މުސްލިމުންނާ ދެކޮޅަށް ހިންގާ އަނިޔާވެރި، ލާއިންސާނީ އަމަލުތަކާ ގުޅިގެން އެ ގައުމާ ދެކޮޅަށް އައިސީޖޭއަށް މައްސަލައެއް ހުށަހެޅީ ނޮވެންބަރު 11، 2019ގައެވެ. އެ މައްސަލަ ހުށަހެޅުމުގައި އިސްކޮށް އޮތީ ގެމްބިއާއެވެ.

އެ މައްސަލައަށް ތަދައްޚުލުވާން ރާއްޖެއިން ޑެކްލަރޭޝަން އޮފް އިންޓަވެންޝަން ހުށަހެޅުމުން، މިދިޔަ އަހަރުގެ ޖުލައި މަހުގެ ތިން ވަނަ ދުވަހު އައިސީޖޭއިން ވަނީ އެ ފުރުސަތު ރާއްޖެއަށް ދީފައެވެ.

ބަންޑާރަ ނައިބުގެ އޮފީހުން މިއަދު ނެރުނު ބަޔާނެއްގައި ބުނެފައިވަނީ އެ މައްސަލައަށް ރާއްޖޭން ތަދައްހުލްވުމަށް އެދި ހުށަހެޅި ހުށަހެޅުން އައިސީޖޭން މިދިޔަ މަހު 3 ވަނަ ދުވަހު ބަލައިގެންފައިވާ ކަމަށެވެ. އަދި މިިދިޔަ ހުކުރު ދުވަހު ރާއްޖޭން ހުށަހަޅާ ލިޔުންތައް ހުށަހަޅާފައިވާ ކަމަށް އެ އޮފީހުން ބުންޏެވެ.

މައްސަލައަށް ތަދައްހުލްވާ ފަރާތެއްގެ ދައުރާ އެއްގޮތްވާ ގޮތުގެ މަތިން، ރާއްޖޭގެ އޮބްޒަވޭޝަންސްގައި އަލިއަޅުވާލާފައިވާނީ:

ގަތުލު އާންމުގެ ކުށް ހުއްޓުވުމާއި އަދަބު ދިނުމާ ގުޅޭ މުއާހަދާގެ މާއްދާތަކުގެ މާނަކުރުމަށް
އެ މުއާހަދާގެ ބައެއް މާއްދާތަކުގައި 'ޑިއުޓީ ޓު ޕަނިޝް ޖެނޮސައިޑް' ނުވަތަ ގަތުލްއާންމުގެ ކުށަށް އަދަބު ދިނުމުގެ ޒިންމާ މާނަކޮށްފައިވާ ގޮތަށް

ރޮހިންޖާގެ މުސްލިމުންނަށް އަދުލު އިންސާފު ހޯދައިދިނުމަށާއި، ގަތުލު އާންމުގެ ކުށް ހުއްޓުވުމާއި އަދަބު ދިނުމާ ގުޅޭ މުއާހަދާ ތަންފީޒު ކުރުމަށް ބައިނަލްއަގުވާމީ މައިދާނުގައި ކުރާ މަސައްކަތްތަކަށް ރާއްޖެއިން އަބަދުވެސް އެއްބާރުލުން ދިނުމުގައި ސާބިތުކަމާއެކު ދެމިއޮންނެ ކަމުގެ ޔަގީންކަން ދޭ ކަމަށް އެ އޮފީހުން ބުންޏެވެ.