ޝަރުއީ ނިޒާމަށް ރައީސް ނުފޫޒެއް ނުފޯރުވާނެ: ޕީއެންސީ

05 މާޗް 2025 - 18:44

0 comments

މިނިވަން މުއައްސަސާތަކަށް މުސްތަގިއްލުކަމާއެކު އެ މުއައްސަސާތަކާ މަތިކުރެވިފައިވާ ދުއްތޫރީ އަދި ގާނޫނީ ޒިންމާ އަދާކުރުމުގެ ފުރުސަތު ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދެއްވާފައިކަން ފާހަގަކޮށް، ޝަރުއީ ނިޒާމަށް އެމަނިކުފާނު ނުފޫޒު ފޯރުވަމުން ގެންދަވާ ކަމަށް ކުރަމުންދާ ތުހުމަތުތައް ޕީއެންސީން ދޮގުކޮށްފި އެވެ.

ސަސްޕެންޝަނުގައި ހުރި ސުއޫދު އިއްޔެ އޭނާގެ އިސްތިއުފާގެ ސިޓީ އެންމެ ފުރަތަމަ ފޮނުއްވީ ރައީސަށެވެ. އެ ސިޓީ ޖުޑީޝަލް ސާވިސް ކޮމިޝަން (ޖޭއެސްސީ)އަށް ފޮނުވީ ރައީސަށް ފޮނުވި ސިޓީ ބަލައިނުގަންނަ ކަމަށް ބައެއް ނޫސްތަކުގައި ރިޕޯޓުކޮށްފައި ވަނިކޮށެވެ.

މިކަމާ ގުޅިގެން ޕީއެންސީން ނެރުނު ބަޔާނެއްގައި ވަނީ، ތިން ބާރުގެ ތެރެއިން ޝަރުއީ ބާރަކީ ސިޔާސީ ކަންކަމާ ދުރުން ރައްޔިތުންގެ ހައްގުތައް ކަށަވަރުކޮށްދިނުމުގެ ޒިންމާ ހަވާލުވެފައިވާ ބާރުކަމަށްވާއިރު، އެ ބާރަށް އޮންނަ އިތުބާރުގެ އެއް އަސާސަކީ ސިޔާސީ ކަންކަމުގެ ތެރެއަށް ނުވަނުން ކަމަށެވެ.

ނަމަވެސް، ސުއޫދު ފަނޑިޔާރުކަމުގައި ވެސް ގެންގުޅުއްވީ އެ މަގާމަށް ވަޑައިގަތުމުގެ ކުރިން ވެސް ގެންގުޅުއްވި އެކްޓިވިޒަމްގެ އުސޫލުތައް ކަން، އިއްޔެ އިސްތިއުފާދިނުމުގައި އަމަލުކުރެއްވި ގޮތުން ސާފުވެފައިވާކަމަށް އެ ބަޔާނުގައި ވެއެވެ.

ޕީއެންސީގެ ބަޔާނުގައި ބުނީ ފަނޑިޔާރުންނާ ގުޅޭގޮތުން ހުށަހެޅޭ މައްސަލަތައް ބަލައި ގޮތެއް ނިންމުމުގައި ވަކި ކޯޓެއްގެ ފަނޑިޔާރަކަށް ވީތީ ނުވަތަ ވަކި މައްސަލައެއް ބަލަމުން ދާތީ ތަފާތު ނުކުރެވޭނެ ކަމަށެވެ. އެގޮތުން ފަނޑިޔާރަކާމެދު ޝަކުވާއެއް ނުވަތަ މައްސަލައެއް މިނިވަން މުއައްސަސާއަކަށް ހުށަހެޅިއްޖެ ނަމަ އެ މައްސަލައެއް ބަލަމުން ދިޔުމަކީ އެ ކޮމިޝަންތަކުގެ މައްޗަށް އޮތް ގާނޫނީ ޒިންމާއެއް ކަމަށް އެ ޕާޓީން ބުންޏެވެ.

އެ ހަމައިން ބަލާއިރު، ސުޕްރީމް ކޯޓުގެ ފަނޑިޔާރުންނާ މެދު މިހާރު ކަން ކުރެވެމުން އެ ދަނީ ވެސް ގާނޫނުއަސާސީ އާއި ގާނޫނުތަކުގައި ވާގޮތުގެ މަތިން ކަމަށް އެ ޕާޓީން ބުންޏެވެ.

"ފަނޑިޔާރު ސުއޫދާމެދު އަދި ސުޕްރީމް ކޯޓުގެ ފަނޑިޔާރުންނާމެދު ވެސް އަމަލު ކުރެވެމުން ދަނީ ގާނޫނުއަސާސީ އާއި ގާނޫނުތަކުގައި އެކަށައެޅިފައިވާ އޮނިގަނޑުގައި ބަޔާންކުރާ އުސޫލުތަކުގެ ތެރެއިންނެވެ،" ޕީއެންސީގެ ބަޔާނުގައި ބުންޏެވެ.

ޕީއެންސީން ބުނީ ސުޕްރީމް ކޯޓުގެ ފަނޑިޔާރުންގެ މައްސަލަތައް ބަލަމުން ދިޔުމުން ހާމަވަނީ ދުސްތޫރީ ނިޒާމު ހިނގަންޖެހޭ ގޮތަށް ރަނގަޅަށް ހިނގަމުން ދާކަން ކަމަށެވެ. އަދި ރާއްޖޭގެ ދުސްތޫރީ ނިޒާމު ހިނގަންޖެހޭ ގޮތަށް ހިނގަމުންދާކަން ކަށަވަރު ކުރެއްވުމަށް ރައީސް މުއިއްޒު ކުރައްވަނީ ނަމޫނާ މަސައްކަތެއް ކަމަށް ވިދާޅުވެ ޕީއެންސީން ވަނީ އެމަނިކުފާނަށް މަރުހަބާ ވެސް ވިދާޅުވެފަ އެވެ.

ރައީސްގެ ދިފާއުގައި ޕީއެންސީން ބަޔާނެއް ނެރުނުއިރު، ސުޕްރީމް ކޯޓުގެ ފަނޑިޔާރުންގެ އަދަދު މަދުކުރަން މަޖިލީހުން ބިލެއް ފާސްކުރުމާއި އެ ކޯޓުގެ ތިން ފަނޑިޔާރުން ސަސްޕެންޑު ކުރުމުގެ އިތުރުން ގާނޫނުއަސާސީ ބަދަލު ކުރުމުން ގިނަ ބަޔަކު އަންނަނީ ރައީސް މުއިއްޒުއަށް ކިޔަމުންނެވެ.