ޑޮކްޓަރު ލިޔެދޭ ބޭސް ސިޓީގައި ހުންނަ ގިނަ ބޭސްތައް ހޯރަފުށިން ނުލިބޭ ކަމުގެ ޝަކުވާ

އަހުމަދު ނިހާން

16 މާޗް 2025 - 11:47

4 comments

ޑޮކްޓަރު ލިޔެދޭ ބޭސް ސިޓީގައި ހުންނަ ގިނަ ބޭސްތައް އާސަންދައިން ލިބެން ނުހުރުމާއި އާސަންދައިން ލިބެން ޖެހޭ ބައެއް ބޭސްތައް ވެސް ހޯރަފުށީގެ ފާމަސީތަކުން އާސަންދަ ދަށުން ދޫނުކުރާ ކަމުގެ ޝަކުވާ މި ފަހުން ވަރަށް ބޮޑުވެއްޖެ ކަމަށް "ހޯރަ އޮންލައިން" އަށް މައުލޫމާތު ލިބިއްޖެ އެވެ.

ހއ. ހޯރަފުށީ ސިއްހީ މަރުކަޒުން ފަރުވާ ހޯދި ބަލި މީހެއްގެ އެހީތެރިއަކު "ހޯރަ އޮންލައިން" އަށް ބުނީ ހޯރަފުށީ ސިއްހީ މަރުކަޒުން ޑޮކްޓަރު ލިޔެ ދެއްވާ ބޭސް ރަށުން ނުލިބިގެން އެ ބޭސް ހޯދުމަށް ހދ. ކުޅުދުއްފުށި ނޫނީ ހއ. ދިއްދޫ އަށް ދަތުރުކުރުން މިހާރު އާންމު ކަމަކަށް ވެއްޖެ ކަމަށާއި މިކަމަށް އަވަސް ހައްލެއް ލިބޭނެ ދުވަހެއް ހޯރަފުށީގެ ރައްޔިތުންނަށް ސާފު ނޫން ކަމަށެވެ.

އެކަން ބޮޑުވީ، މީގެ ކުރިން އާސަންދައިން ލިބުނު ބޭސްތައް އެ ސްކީމުގެ ދަށުން ދޫކުރާ ނަމަ ބޭސްފިހާރައަށް ގެއްލުންވާ ކަމަށް ބުނެ، ބައެއް ބޭސްފިހާރަތަކުން އާސަންދައިން އެ ބޭސްތައް ދޫކުރުން ހުއްޓާލުމުން ކަމަށް ބެލެވެ އެވެ.

އަސާސީ ބޭސްތައް ހޯދުމުގެ މަސައްކަތް ފުރިހަމަކޮށް، އޭގެ ތެރެއިން ގިނަ ބޭސް މި މަހު ރާއްޖެ ގެނެސް، އެ ތަކެތި ރަށްރަށަށް ފޮނުވުމުގެ މަސައްކަތް ފަށާފައިވާ ކަމަށާއި ރާއްޖެއަށް ބޭނުންވާ އަސާސީ ބޭސް "ސޯސް" ކުރުމުގެ މަސައްކަތް ފަށައިފި ކަމަށް އެސްޓީއޯ އިން މިއަދު ވަނީ ބުނެފަ އެވެ.

ސިއްހީ ދާއިރާގެ ކަމާ ގުޅުން ހުރި މުއައްސަސާތަކާއި ޑޮކްޓަރުންގެ އިރުޝާދާއި ލަފާގެ މަތިން، އަސާސީ ބޭސްތަކުގެ އިތުރުން ރާއްޖެއަށް އެންމެ މުހިންމު އަދި ބޭނުންތެރި ބޭސްތައް ދެނެގަތުމުގެ މަސައްކަތް ސަރުކާރުން އަންނަނީ ކުރަމުންނެވެ.

ރާއްޖޭގެ ގިނަ ބޭސް ފިހާރަތަކުން ބޭސް ނުލިބޭ މައްސަލަ ބޮޑުވެފައިވާތީ، އަންނަ މަހު 15 އިން ފެށިގެން ހުރިހާ ބޭހެއް އަގުހެޔޮކޮށް ލިބޭނެ އިންތިޒާމް ހަމަޖައްސަވާނެ ކަމަށް ރައީސް މުހައްމަދު މުއިއްޒު މިދިޔަ މަހު 24ގައި ވިދާޅުވެފައިވެ އެވެ.

އަދި ބޭހުގެ ފެންވަރު ރަނގަޅު ކުރުމުގެ ގޮތުން އިންޑިއާ އިން އެކަނި ބޭސް އެތެރެ ކުރުން ހުއްޓާލައި ސީދާ ޔޫރަޕުން ބޭސް ގެނައުމުގެ މަސައްކަތް ކުރަމުންދާ ކަމަށް ވެސް ރައީސް ވަނީ ވިދާޅުވެފަ އެވެ.