އެމްއެމްއޭގެ ޑެޕިއުޓީ ގަވަރުނަރު އިމާދު އިސްތިއުފާދެއްވައިފި

މަރިޔަމް އަނާ

17 މާޗް 2025 - 11:29

0 comments

މަރުކަޒީ ބޭންކް، މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ޑެޕިއުޓީ ގަވަރުނަރު އަހުމަދު އިމާދު މަގާމުން އިސްތިއުފާ ދެއްވައިފި އެވެ.

އެމްއެމްއޭގެ ޑެޕިއުޓީ ގަވަރުނަރުގެ މަގާމުން އިމާދު އިސްތިއުފާ ދެއްވާފައިވަނީ މިއަދު އެވެ.

އޭނާގެ އިސްތިއުފާގެ ސިޓީގައި ބަޔާންކޮށްފައިވަނީ އޭނާގެ ވަޒީފާގެ މަސްއޫލިއްޔަތު އެންމެ ފުރިހަމައަށް އަދާކޮށްފައިވާނެ ކަމަށެވެ.

"ބޭރު ފައިސާގެ ބާޒާރުގެ މުހިއްމު އިސްލާހުތައް ގެނައުމާއި މާލީ ދައިރާގެ ހަމަޖެހުން ދެމެހެއްޓުމުގައި މުހިއްމު ދައުރެއް އަދާކޮށްފައިވާނެ އެވެ. މި ދާއިރާގައި އަޅުގަނޑުގެ ބައިވެރިވުން ފެންނާނެ ކަންކަމުގެ ތެރޭގައި ފަވަރަ ތަރައްގީ ކުރުމާއި މާލީ ބައިވެރިވުން ކުރިއެރުވުމަށް ކުރި މަސައްކަތްތަކާއި ބޭރު ފައިސާއާ ބެހޭ ގާނޫނާއި ގަވައިދު ތަންފީޒު ކުރުމާއި ދެމެހެއްޓެނިވި މާލީ އިސްނެގުންތައް ކުރިއެރުން ހިމެނެއެވެ" އިމާދު ވިދާޅުވެފައިވެ އެވެ.

އެމްއެމްއޭގެ ޑެޕިއުޓީ ގަވަރުނަރުގެ މަގާމަށް އިމާދު އައްޔަންކުރީ 2020 ވަނަ އަހަރު އެވެ. އިމާދު މަގާމުން ވަކިކުރުމުގެ މަސައްކަތް ފެށުމަށް މަޖިލީހުގެ މާލިއްޔަތު ކޮމިޓީން ވަނީ މިދިޔަ ހަފްތާ ފާސްކޮށްފަ އެވެ. އަދި މިއަދުގެ ޖަލްސާގައި އެ މަސައްކަތް ފަށާކަން ތަޅުމުގައި އިއުލާންކުރަން އޮތީ އެޖެންޑާކޮށްފަ އެވެ.

އެމްއެމްއޭގެ ޑެޕިއުޓީ ގަވަރުނަރުގެ މަގާމަށް މީހަކު އައްޔަން ކުރާނީ އަދި ވަކި ކުރާނީ މަޖިލީހުގެ ލަފާގެ މަތިން ރައީސުލްޖުމްހޫރިއްޔާއެވެ.