މިދިޔަ އަހަރު އެސްޑީއެފްސީން 2.78 ބިލިއަންގެ ލޯނު ދޫކުރި

އަހުމަދު ނިހާން

17 މެއި 2025 - 11:04

0 comments

ކުދި ފަންތިއާއި މެދުފަންތީގެ ވިޔަފާރިތައް ކުރިއެރުވުމަށް ސަރުކާރުން އުފައްދާފައިވާ، އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން، އެސްޑީއެފްސީން މިދިޔަ އަހަރު 2.78 ބިލިޔަން ރުފިޔާގެ ލޯނު ދޫކޮށްފައިވާކަމަށް އެކޯޕަރޭޝަނުން ހާމަކޮށްފި އެވެ.

އެ ކުންފުނީގެ ހަވަނަ އަހަރީ އާންމު ޖަލްސާގައި އާންމުކުރި ތަފާސްހިސާބުތަކަށް ބަލާއިރު މިދިޔަ އަހަރު 2.78 ބިލިއަން ރުފިޔާގެ ލޯނުގެ ދޫކޮށްފައިވެ އެވެ. އެ ލޯންތަކުގެ ތެރޭގައި ކެޕިޓަލް ލޯނު ޕޯޓްފޯލިއޯއި ން ދޫކޮށްފައިވާ 1.736 ބިލިޔަން ރުފިޔާ އާއި އެޑްމިނިސްޓާޑް ލޯނު ޕޯޓްފޯލިއޯ އިން ދޫކޮށްފައިވާ 1.045 ބިލިއަން ރުފިޔާގެ ލޯނު ހިމެނެ އެވެ.

ކެޕިޓަލް ލޯނު ޕޯޓްފޯލި އޯއިން ފާއިތުބި ފަސް އަހަރުގެ ތެރޭގައި ދޫކުރި ލޯނުތަކަށް ބަލާ އިރު، އެންމެ ގިނަ ލޯނު ދޫކޮށްފައި ވަނީ ޓޫރިޒަމް ދާއިރާއަށެވެ. އެއީ 521 މިލިއަން ރުފިޔާ އެވެ.

އެޑްމިނިސްޓްރޭޓިވް ލޯނު ޕޯޓްފޯލިއޯ އިން އެންމެ ގިނައިން ލޯނު ދޫކުރީ މަސްވެރިކަމުގެ ސިނާއަތަށެވެ. އެއީ 647 މިލިއަން ރުފިޔާ އެވެ.

އެސްޑީއެފްސީގެ ޕޯޓްފޯލިއޯ 180 ރަށަކަށް ފުޅާކޮށްފައިވާއިރު މިދިޔަ އަހަރު ނިމުނުއިރު އެޑްމިނިސްޓާޑް ކޮށްފައިވާ ލޯނު ހިމެނޭހެން 1.13 ބިލިއަން ރުފިޔާ ޖުމްލަ ޕޯޓްފޯލިއޯގެ 44 އިންސައްތަ ދޫކޮށްފައިވަނީ އަތޮޅު ތެރެއަށެވެ.

އެސްޑީއެފްސީއަކީ ރައީސް އިބްރާހީމް މުހައްމަދު ސޯލިހްގެ ވެރިކަމުގައި 2019 ވަނަ އަހަރު އުފެއްދި ކުންފުންޏެކެވެ.

އެސްޑީއެފްސީ އުފެއްދި މަގުސަދަކީ ކުދި އަދި މެދު ފަންތީގެ ވިޔަފާރިތައް އަލަށް ފެށުމަށާއި، ހިނގަމުންދާ ވިޔަފާރިތައް ދެމެހެއްޓެނިވި ގޮތެއްގައި ކުރިއަށް ގެންދިއުމަށާއި އަދި އެފަދަ ވިޔަފާރިތައް އިތުރަށް ތަރައްގީކޮށް ފުޅާކުރުމަށް ބޭނުންވާ މާލީ އެހީތެރިކަން ދިނުމަށެވެ.