ހަނިމާދޫއާއި ބެންގަލޫރާ ދެމެދު ސީދާ ދަތުރުތައް ފަށައިފި

މަރިޔަމް އަނާ

17 މެއި 2025 - 10:42

0 comments

ރާއްޖޭގެ އުތުރުން، ހަނިމާދޫ އިންޓަނޭޝަނަލް އެއާޕޯޓުން އިންޑިއާގެ ބެންގަލޫރަށް ސީދާ ދަތުރުތައް ފަށައިފި އެވެ.

މޯލްޑިވިއަން އިން މައުލޫމާތު ދިން ގޮތުގައި މި ދަތުރުތައް ކުރިއަށް ގެންދާނީ ހަފްތާއަކު ދެ ދުވަހު އެވެ. އެއީ އާދީއްތަ އަދި ބުރާސްފަތި ދުވަހު އެވެ.

މި ދަތުރުތަކުގެ ސަބަބުން އުތުރުގެ އަތޮޅުތަކުގެ ރައްޔިތުންނަށް މާލެއަށް ނައިސް ސީދާ ހަނިމާދޫއިން ބެންގަލޫރަށް ދަތުރުކުރެވޭނެ އެވެ. އަދި ކުރިން މާލެ އިން ބެންގަލޫރަށް ކުރި ދަތުރަށް ވުރެ ހަނިމާދޫ އިން ކުރާ ދަތުރުގައި ހޭދަވާ ވަގުތުވެސް މަދުވެގެންދާނެ އެވެ.

ބައިނަލްއަގުވާމީ ގޮތުން މުހިންމު މަންޒިލްތަކާ ރާއްޖެ ގުޅުވާލުމަށް މޯލްޑިވިއަންއިން ކުރަމުންދާ މަސައްކަތްތަކުގެ ތެރެއިން، ބެންގަލޫރަށް ފަށާ ފްލައިޓްތަކުގެ ސަބަބުން ދެ ގައުމުގެ ދެމެދުގައި އިގުތިސާދީ އަދި ސަގާފީ ގުޅުންތައް އިތުރަށް ބަދަހިވެ، ފަސިންޖަރުންނަށް އެންމެ ކަމުދާނެ ދަތުރުތައް ހިޔާރު ކުރުމުގެ ފުރުސަތު ފުޅާވާނެ ކަމަށް މޯލްޑިވިއަނުން ބުންޏެވެ.

މި ވަގުތު މޯލްޑިވިއަންގެ ފްލީޓުގައި 13 ބޯޓު އެބައޮތެވެ. އޭގެ ތެރޭގައި އެއާބަސް އޭ320 މަރުކާގެ އެއް ބޯޓާއި އޭޓީއާރްގެ ހަތަރު ބޯޓު ހިމެނެއެވެ. ބާކީ ހުރީ ޑޭޝް މަރުކާގެ ބޯޓުތަކެކެވެ. ބޭރު ދަތުރުތައް ކުރުމުގައި ގެންގުޅެނީ އެއާބަސް އޭ320 މަރުކާގެ ބޯޓެވެ.

މޯލްޑިވިއަނުން މި ވަގުތު ދަތުރުކުރަނީ ރާއްޖޭގެ 16 މަންޒިލަކާއި އިންޑިއާގެ ތިން ސަރަހައްދަކާއި ބަންގްލަދޭޝަށެވެ.

މޯލްޑިވިއަން އިން އިތުރަށް ބުނީ ކުރިއަށް އޮތް ދުވަސްތަކުގައި އެ ކުންފުނީގެ ބޯޓުތައް އާ މަންޒިލްތަކަށް ދަތުރުތައް ފެށުމުގެ މަސައްކަތް ކުރަމުންދާ ކަމަށެވެ.