ބްރޯޑްކޮމްގެ އެސްޖީ ސަސްޕެންޑުކޮށްފި

އަލީ ރާޒީ

20 މެއި 2025 - 17:51

0 comments

ބްރޯޑްކާސްޓިން ކޮމިޝަން (ބްރޯޑްކޮމް)ގެ ސެކްރެޓަރީ ޖެނެރަލް މަރްޔަމް ޒީނިޔާ އެ ކޮމިޝަނުންގެ ނިންމުންތައް ތަންފީޒުކުރަން އެއްބާރުލުން ނުދޭތީ އޭނާ ތިން ދުވަހަށް ސަސްޕެންޑުކޮށްފަ އެވެ.

އޭނަ ސަސްޕެންޑްކުރީ މާދަމާއިން ފެށިގެން ތިން ދުވަހަށެވެ. އަދި އެ މުއްދަތުގައި ލިޔުމުން ޖަވާބުދާރީވުމަށް ޒީނިއާ އަށް އަންގައިފައިވެ އެވެ.

އޭނާ ސަސްޕެންޑުކުރި ސަބަބުތަކުގެ ތެރޭގައި ބްރޯޑްކޮމްގެ ގާނޫނުން ލާޒިމްކުރާ ޒިންމާ އަދާ ކުރުމުގައިއާއި ކޮމިޝަން ހިންގުމުގައި އިހުމާލުވެ، ބްރޯޑްކޮމްގެ ނިންމުންތައް ތަންފީޒު ކުރުމުގައި އެއްބާރުލުން ނުދިނުމާއި ނިންމުންތަކަށް އިޙުތިރާމު ކުޑަކުރުން ހިމެނެ އެވެ.

ބްރޯޑްކޮމްގެ ސެކްރެޓަރީ ޖެނެރަލް ސަސްޕެންޑުކޮށްފައި މިވަނީ އެ ކޮމިޝަންގެ މެންބަރުން ނުފޫޒާއި އުނދަގުލާ ހެދި މަސައްކަތް ކުރަން ދަތިވާ ކަމަށް ބުނެ ކޮމިޝަންގެ ގިނަ އަދަދެއްގެ މެންބަރުން ސޮއި ކުރައްވައި ރައްޔިތުންގެ މަޖިލީހަށް ޕެޓިޝަނެއް ހުށަހަޅާފައި ވަނިކޮށެވެ.

ކުރީގެ ރައީސް އަބްދުﷲ ޔާމީންގެ ވެރިކަމުގައި ނެޝަނަލް އިންޓެގްރިޓީ ކޮމިޝަން (އެންއައިސީ)ގެ މެންބަރު ކަމަށް ޒީނިޔާ އައްޔަންކުރުމަށްޓަކައި ރައްޔިތުންގެ މަޖިލީހުގެ ރުހުން ހޯދަން ހުށަހެޅި އެވެ. ނަމަވެސް ސަރުކާރުން ފަހުން ވަނީ ޒީނިޔާގެ ނަން އަނބުރާ ގެންގޮސްފަ އެވެ.