މިނިވަން ދުވަހާ ކުރިމަތިލިއިރު ހޯރަފުށީގައި ވަޒީފާގެ ބިރު!

އިސްމާއިލް ރިޒާ

26 ޖުލައި 2025 - 13:21

0 comments

ރާއްޖޭގެ 60ވަނަ މިނިވަން ދުވަހާ މިއަދު ކުރިމަތިލީއިރު، އިގްތިސޯދީ ގޮތުން ދަތި ދުވަސްވަރެއް ހޯރަފުއްޓަށް އައިސް ވަޒީފާގެ ފުރުސަތު ބަންދުވެ ރަށުން ލިބެން ހުރި މަދު ވަޒީފާއިން ވެސް ވަކިކޮށްފާނެ ކަމުގެ ބިރު އެބައޮތް ކަމަށް ހޯރަފުށީ ޒުވާނުން ބުނެފި އެވެ.

"ހޯރަ އޮންލައިން" އަށް މައުލޫމާތު ދެމުން ހޯރަފުށީ ޒުވާނަކު ބުނީ ސުކޫލުނިމި ދެން އަދާ ކުރާނެ ވަޒީފާއެއް ހޯދުމަށް ރަށުން ހުރި ފުރުސަތު ކުޑަކަމުން އެކަމާއި ކަންބޮޑުވާ ކަމަށާއި އެ ކަމަށް މިވަގުތު އޮތް ހައްލަކީ ޒުވާން އުމުރުގައި ރަށާއި އާއިލާ ދޫކޮށް ވެރިރަށް މާލެއަށް ދިއުން ކަމަށެވެ.

"މާލެ ގޮސްގެން ވެސް ވަޒީފާ އެއް ލިބޭނެ ކަމުގެ ޔަގީން ކަމެއްނެތް، ސިޔާސީ ނުވެ ވަޒީފާއެއް ހޯދުމަކީ ނުވާނެ ކަމެއްކަމަށް މިއަދު މީހުން ދެކެން ފަށައިފި، 11 12 ކިޔެވެން ރަށުން ނެތް އިރު މަތީ ތައުލީމަށް ކިޔަވަން މާލެ ގޮސް ޕާޓް ޓައިމް ވަޒީފާ އެއް ހޯދަން ވެސް ގުޅަން މި ޖެހެނީ މަޖިލިސް މެންބަރަށް، މީ ބަލައި ގަނެވޭނެ ކަމަެއް ނޫން، މީ އަޅުވެތިކަން" ޒުވާނާ ބުންޏެވެ.

އިތުރު ޒުވާނަކު ބުނީ ރަށުގައި މިހާރު އަދާ ކުރަމުންދާ ވަޒީފާގައި ވެސް މިހުންނަނީ އަސާސީ މިނިވަންކަން ވެސް ހިފެއްޓިިގެން ކަމަށާއި ސަރުކާރަށް ތާއީދު ކުރާ މީހަކާއި ދިމާލަށް ބަލާލެވޭ ގޮތަކުން ވެސް ވަޒީފާއިން ވަކިކުރި ކަމުގެ ލިޔުން އައުން އެއީ މިހާރު ހޯރަފުށީގައި އާންމު ކަމަކަށް ވެއްޖެ ކަމަށެވެ.

"ހޯރަ އޮންލައިން" އަށް މައުލޫމާތު ދިން އެހެން ޒުވާނަކު ބުނީ ރަށުގައި މިހާރު ވަޒީފާގެ އެއްވެސް އާ ފުރުސަތެއް ނެތް ކަމަށާއި މުޅި ދާއިރާގައި އިގްތިސާދީ ހަރަކާތެއް މިހާރު ނުހިގާ ކަމަށެވެ. އަދި ކުދި އަދި މެދުފަންތީގެ ވިޔަފާރިތައް ވެސް މިހާރު މުޅިން ހުއްޓުމަކަށް އައިސްފަ ވާ ކަމަށެވެ.

"ރަށުގައި ލިބެން ހުރި މަދު ވަޒީފާތައް ވެސް އެހުރީ ސިޔާސީ ނީލަމެއްގައި އޮތް ބާޒާރެއްގައި" ޒުވާނާ ބުންޏެވެ.

ރާއްޖޭގެ މިނިވަން ދުވަސް މިއަދު ފާހަކުރަމުން އަންނައިރު ހޯރަފުށިން އިވެނީ ވަޒީފާ ނެތް ކަމުގެ ޝަކުވާ އެވެ. އަދި ރަށުން ލިބިފައިވާ ވަޒީފާއިން ކޮންމެ ވަގުތަކުވެސް ވަކިކޮށްފާނެ ކަމުގެ ބިރު އޮތް ވާހަކަ އެވެ. އަދި ސިވިލް ސާވިސް މުވައްޒަފުންނަށް ވެސް ސިޔާސީންގެ ވަޒީފާގެ ބިރު ދައްކާ ވާހަކަ އެވެ.

ހޯރަފުށިން މިފަހުން ވަނީ އެރަށުގައި ބިއްލޫރި ފުޅީގައި ފެން ބަންދުކުރަން ހަދަމުން އަންނަ ބޮޓްލިން ޕްލާންޓުގެ މަސައްކަތް ހުއްޓާލާ އެތަނުގެ މަސައްކަތް ކުރަމުން އަންނަ 15 މުވައްޒަފުން ކުއްލިއަކަށް ވަޒީފާއިން ވަކިކޮށްފައި އެވެ.

ފެނަކައިން ދިން ނޯޓިހާއެކު ވަޒީފާއިން ވަކިކުރި މުވައްޒަފުން ބުނީ އެމީހުން ވަޒީފާއިން ވަކިކުރީ ރައީސް ޑރ. މުއިއްޒު އާއި ދާއިރާގެ އެމްޕީ އަލީ މޫސާ އަށް ތާއީދު ނުކުރާ ކަމަށް ބުނެ ކަމަށެވެ. އެމީހުން ބުނީ ރާއްޖޭގެ މިނިވަން ދުވަސް މިއަހަރު ފާހަގަ ކުރާއިރު މިނިވަން ކަމުގެ އިހްސާސް އެމީހުންގެ ހިތުގައި ނުޖަހާ ކަމަށެވެ. އަދި މިއަދު އެމީހުން ތިބެން ޖެހިފައި ވަނީ އަޅުވެތިކަމެއްގެ ދަށުވެ ވަޒީފާ ގެއްލިފަ ކަމަށެވެ. އަދި އެމީހުން އަލުން އަބުރާ މިނިވަންކަން ހޯދާނީ "ވޯޓު ފޮށިން" ކަމަށެވެ.

އިތުރަށް ކިޔާލަން: މިތިބީ ވޯޓު ފޮށި ނުފެނިގެން؛ ހޯރަފުށީ ބޮޓްލިން ޕްލާންޓުން ވަކިކުރި މުވައްޒަފުން

އެމީހުން އިތުރަށް ބުނީ މިނިވަންކަމުގެ 60ވަނަ އަހަރަށް ފަހު 61ވަނަ އަހަރާ ހޯރަފުށީ ގިނަ ރައްޔިތުން ކުރިމަތިލާން ޖެހިފައިމި މިވަނީ އިގްތިސޯދީ ގޮތުން ރަށަށް، ދާއިރާ އަށް ދަތި ދުވަސްވަރެއްގައި ކަމަށެވެ. އަދި އާމްދަނީއެއް ހޯދުމަށް ރަށުން ކުރާނެ މަސައްކަތެއް މިހާރު ފެންނަން ނެތް ކަމަށާއި ރަށުގެ ރައްޔިތުންނަށް ވަނީ "ވަޒީފާގެ ބިރު ދައްކާ" ސިޔާސީ ގޮތުން އަޅުވެތިކޮށްފަ ކަމަށެވެ.

މި ސަރުކާރުގެ ފަސް އަހަރު ނިމިގެންދާއިރު ހޯރަފުށީ ދާއިރާގެ އުމްރާނީ ތަރައްގީގެ ކުރިމަގާއިމެދު ޖަވާބު ބޭނުން ގިނަ ސުވާލުތަކެއް މިހާރު ވަނީ އުފެދިފަ އެވެ. ހާއްސަކޮށް "ހޯރަފުށީ ދާއިރާގައި އިގްތިޞާދީ ހަރަކާތްތައް ހުއްޓި، ވަޒީފާގެ ފުރުސަތު ބަންދުވެފައި..! އޮތުމުން ނެވެ.

އަދި އެއް ވާހަކަ އެވެ.

މުޅި ހޯރަފުށީ ދާއިރާގެ ރައްޔިތުން ހާއްސަކޮށް ޒުވާނުންގެ މިއަދުގެ ގޮވާލުމަކީ ސިޔާސީ ބޮޑުންގެ ގޭ ދޮށުގައި މުގޯލި އަޅަން ނުޖެހި "ވަޒީފާގެ ފުރުސަތު" ރަށުން ތަނަވަސް ކޮށްދިނުމެވެ. އަދި ސަރުކާރުން ވަޒީފާގެ ބިރު ދެއްކުން ހުއްޓާލުމަށެވެ.