ބަންކަރިން ހިދުމަތުން އިހަވަންދިއްޕޮޅު ސަރަހައްދަށް ލިބުނީ މި ފޮޓޯގަނޑު އެކަނި!

އަހުމަދު ނިހާން

02 އޯގަސްޓް 2025 - 10:31

0 comments

ބަންކަރިންގެ ހިދުމަތް ފައްޓަވައިދެއްވީ ހއ. އަށް ނިސްބަތްވެވަޑައިގަންނަވާ މަޖިލިސް ފަސް މެންބަރުން

ރާއްޖޭގެ އެންމެ އުތުރުން، އިހަވަންދިއްޕޮޅުގައި ބަންކަރިންގެ ހިދުމަތް, ރަސްމީކޮށް ފެށީ މީގެ 11 މަސް ކުރިން 19 ސެޕްޓެމްބަރު 2024 ގައި އެވެ.

ހއ. ހޯރަފުށީގައި އެކަމަށް ހާއްސަކޮށް ބޭއްވި ރަސްމިއްޔާތެއްގައި ބަންކަރިންގެ ހިދުމަތް އިފުތިތާހު ކޮށްދެއްވީ އިކޮނޮމިކް މިނިސްޓަރު މުހައްމަދު ސައީދާއި އެ އަތޮޅަށް ނިސްބަތްވެވަޑައިގަންނަވާ މަޖިލީހުގެ ފަސް މެންބަރުންނެވެ.

ބަންކަރިންގެ ހިދުމަތް ފެށިއިރު، އެންމެ ފުރަތަމަ ހިދުމަތް ދީފައި ވަނީ އެސްޓީއޯގެ ސަބްސިޑަރީ ކުންފުނި، މޯލްޑިވްސް ސްޓޭޓް ޝިޕިން (އެމްއެސްއެސް) އިން އޮޕަރޭޓު ކުރާ ވައިސީ ބެރިއާ އަށެވެ. އެ ބޯޓު މީގެ ކުރިން ބަންކަރިންގެ ހިދުމަތް ހޯދަމުން ދިޔައީ ކޮލަމްބޯއިންނެވެ. 1100 ކޮންޓޭނަރު އުފުލުމުގެ ގާބިލުކަން ހުންނަ އެ ބޯޓުން މަހެއްގެ މައްޗަށް 200 ޓަނުގެ ތެޔޮ ބޭނުން ކުރާ ކަމަށް އެސްޓީއޯއިން ބުންޏެވެ.

ރާއްޖޭގައި ފްލޯޓިން ބަންކަރިންގެ ހިދުމަތް ދޭން ފެށީ 3258 ޓަނުގެ އެމްޓީ އޭންޖަލް އާއި 3939 ޓަނުގެ އެމްޓީ މެރިން ބެލާ ބޭނުން ކޮށްގެންނެވެ.

އެ ދެ ބޯޓަކީ ބަންކަރިން ހިދުމަތް ދިނުމަށް ހާއްސަކޮށް ފަރުމާކޮށް ބަނދެފައިވާ ދެ ބޯޓު ކަމަށް އެސްޓީއޯއިން ބުންޏެވެ. އެ ކުންފުނިން ބުނީ އެ ދެ ބޯޓު ވެސް ބެއާ ބޯޓު ޗާޓާ ކޮންސެޕްޓުގެ ތެރެއިން އެއްކޮށް މިލްކުވާނެ ކަމަށެވެ.

މުއިއްޒު ސަރުކާރުން ފެށި ބަންކަރިންގެ ހިދުމަތުގެ ތެރެއިން، ބޯޓުފަހަރަށް ތެޔޮ އަޅައިދިނުމުގެ އިތުރުން، ފަޅުވެރިން ބަދަލު ކުރުމުގެ ހިދުމަތާއި ބޯޓުފަހަރަށް ބޭނުންވާ ސްޕެއާ ފަދަ ސާމާނު ފޯރުކޮށްދިނުމާއި މަރާމާތު ކޮށްދިނުމުގެ އިތުރުން ސާފު ބޯފެން ވެސް ފޯރުކޮށްދޭނެ އެވެ.

ބަންކަރިންގެ ހިދުމަތް ރާއްޖޭގައި ދޭނީ ސިންގަޕޫރާއި ޔޫއޭއީގެ އިތުރުން މޮރިޝަސްގައި ވެސް ބަންކަރިންގެ ހިދުމަތް ދެމުންދާ ވިޓޯލް އާއި އެސްޓީއޯ ގުޅިގެންނެވެ. އެގޮތުން ބަންކަރުތަކަށް ތެޔޮ ފޯރުކޮށްދިނުމާއި ބަންކަރިން ހަބު އިޝްތިހާރުކުރުމަކީ ވިޓޯލްއާ ހަވާލުކުރެވިފައިވާ މަސައްކަތެކެވެ.

ސަރުކާރުގެ އަމާޒަކީ މި ހިދުމަތް ފުޅާކޮށް އިތުރު ހިދުމަތްތައް މި ސަރަހައްދުގައި ގާއިމްކުރުމާއިއެކު ރާއްޖޭގެ އިގްތިސޯދަށް ގިނަގުނަ މަންފާކޮށް އިހަވަންދިއްޕޮޅު އޮންނަ ސަރަހައްދުގައި ވަޒީފާގެ ގިނަ ފުރުސަރު ތަކެއް ތައާރަފް ކުރުމެވެ.

ނަމަވެސް ހިތާމައަކީ ރާއްޖޭގެ އެންމެ އުތުރުން، އިހަވަންދިއްޕޮޅުގައި ބަންކަރިންގެ ހިދުމަތް ފެށުނު ފަހުން ހަ މަސް ދުވަސް ފާއިތުވެގެން ދިޔައިރު އުފެދުނު ވަޒީފާތަކެއް ނުފެނުމެވެ. އަދި ބަންކަރިންގެ ހިދުމަތް ފެށުމަށް ހާއްސަ ރަސްމިއްޔާތު ބޭއްވި ހއ. ހޯރަފުށީގައި މި އަދާ ހަމައަށް "ބަންކަރިންގެ ހިދުމަތުން" އުފެދުނު "އެންމެ ވަޒީފާ އެއް" ވެސް ނެތުމެވެ.

ދެރައީ ރާއްޖޭގެ އުތުރުން ދަތުރުކުރާ 300 އާއި 450 އެއްހާ ބޯޓަށް ހިދުމަތް ދިނުމަށް ފެށި ބަންކަރިން ހިދުމަތުން އުންމީދުކުރި ވަޒީފާތައް އުފަން ނުވުމެވެ. ވާނީ ވެސް އެހެންތާ އެވެ. ރާއްޖޭގައި ބަންކަރިންގެ ހިދުމަތް ފެށިތާ ހަ މަސް ވެފައިވާއިރު 8 ޑިގްރީ ޗެނަލުން ދަތުރުކުރާ ބޭރުގެ ބޯޓުތަަށް ދޭ ހިދުމަތެއް ނުފެނެ އެވެ. ހިދުމަތެއް ހޯދަން ހޯރަފުށި ސަރަހައްދުގައި މަޑުކޮށްލާ އާގު ބޯޓެއް ނުފެނެ އެވެ.

ހޯރަފުށީ ދާއިރާ ހިމެނޭހެން ރާއްޖޭގެ ގިނަ ދާއިރާ ތަކުގައި ޒުވާނުންނަށް ވަޒީފާގެ ފުރުސަތު މަދުކަމުގެ ޝަކުވާ އަންނަނީ އިތުރު ވަމުން ނެވެ. ހޯރަފުށި ސަރަހައްދުގައި ބަންކަރިން ފެށިގެން ވަޒީފާ ލިބުމަށް ހައްލެއް އަންނާނެ ކަމަށް ބުނި ނަމަވެސް ވަޒީފާ އެއް އަދި އެއް ނުލިބެ އެވެ. އެސްޓީއޯ އިން 15-20 މިލިއަން ޑޮލަރާ ދެމެދުގެ އަދަދެއް އިންވެސްޓްކުރި ކަމަށް މިނިސްޓަރު ސައީދު ވިދާޅުވާ ހިދުމަތުން އިހަވަންދިއްޕޮޅު ސަރަހައްދަށް ލިބުނީ ރަސްމިއްޔާތު ފެށި ދުވަހު، ހއ. އަށް ނިސްބަތްވެވަޑައިގަންނަވާ މަޖިލިސް ފަސް މެންބަރުން އެކުގައި ނެންގެވި ފޮޓޯ ގަނޑު އެކަންނެވެ.

ބަންކަރިންގެ ހިދުމަތާއެކު އިހަވަންދިއްޕޮޅު ހުޅުވައިލެވުނީ ބައިނަލްއަގްވާމީ ބޮޑު ވިޔަފާރިއަކަށް ކަމަށް ސަރުކާރަށް ގަބޫލުކުރެވުނު ނަމަވެސް އެ ސަރަހައްދުގެ ރައްޔިތުންނަށް އަދި ލިބުނު މޮޅެއް ނެތެވެ. ވިއްޔާ ވީ ގެއްލުމެވެ. އެއީ މަސްރޫއު އިފްތިތާހު ކުރަން ހޯރަފުށީގައި ބޭއްވި ރަސްމިއްޔާތައް އެ ރަށު ހޭޅިން ރުއްގަސްތަކެއް ކަނޑާލުމެވެ.

ދެރަ އަދި ދުރު ވިސްނުމެއް ނެތި ސިޔާސީ ވަކި ކުއްލި މުއްސަދި ކަމަކަށް ފައިސާ ހޯދަން ކުރި މަސައްކަތުގެ އަދުގެ ހިތި ނަތީޖާ އަކީ ހޯރަފުށީ ދާއިރާގެ ތުރާކުނުން ފެންނަ އިގްތިސޯދީ ހަގީގަތަކީ މި ސަރުކާރުން ފެށި ވޯޓަރ ބަންކަރިންގެ ހިދުމަތަށް ބޭނުން ކުރަން ހެދި ބާޖު މިހާރު ތުރާކުނަކު ނެތުމެވެ، ރާއްޖޭގައި ފްލޯޓިން ބަންކަރިންގެ ހިދުމަތް ދޭން އުތުރުގައި ބާއްވާފައި އޮތް ދެ ބޯޓު މާލޭ ސަރަހައްދަށް އައިސް ބަނދަރުކޮށްފި އެވެ. ތުރާކުނުން ފެންނަން އިނީ ބާޖު އައްސާނެ ތިން މުޑި..! އެވެ.

އިހަވަންދިއްޕޮޅު ނުވަތަ މޯލްޑިވްސް އިކޮނޮމިކް ގޭޓްވޭގައި އިންޓަނޭޝަނަލް ބަންކަރިން ފެސިލިޓީއެއް އެޅުމަށް އެސްޓީއޯ އިން ނެދަލޭންޑްސްގެ ކުންފުންޏެއް ކަމަށްވާ "ވިޓޯލް"އާ އެކު އެއްބަސްވުމުގައި ސޮއިކޮށް ފެށި އިގްތިސޯދީ ބޮޑު ހަރަކާތުން ހޯރަފުށި ދާއިރާއަށް އަދި ލިބުނު މަންފާ އެއް ނެތެވެ. ރާއްޖެ އޮންނަ ސަރަހައްދުގެ ގޮތުން އިހަވަންދިއްޕޮޅު ކައިރިން ދުވާލަކު 300 އަށް ވުރެ ގިނަ އާގު ބޯޓު ދަތުރުކުރާ ކަމަށް ސަރުކާރުން ބުނި ނަމަވެސް ފެނެއް އަދި ތެލެއް ބަރުކުރަން މަޑުކުރާ ބޯޓެއް އެ ސަރަހައްދުން ނުފެނި އިކޮނޮމިކް މިނިސްޓަރު ސައީދު އަށް ވަނީ ބޮޑު ފާޑުކިޔުމެއް ކުރިމަތިވެފަ އެވެ.

މިނިސްޓަރު ސައީދު ބެއްލެވުމުގެ ދަށުން ރާއްޖޭގައި ފުރަތަމަ ފަހަރަށް ހުޅުވި ޑިވެލޮޕްމަންޓް ބޭންކްގެ ހިދުމަތް ތޮޅިއަށް ދިޔަ ފަދައިން ރާއްޖޭގެ އިގުތިސާދަށް ބޮޑު ފައިދާއެއް ވާނެ ކަމަށް އަންދާޒާ ކޮށް މުޅިން އަލަށް ރާއްޖޭގައި ފެށީ ބަންކަރިންގެ ހިދުމަތް ވެސް މިވީ ބިލާހަކަށެވެ.

ހޯރަފުށި ސަރަހައްދުގައި ބަންކަރިން ފެށިގެން ވަޒީފާ ލިބުމަށް ހައްލެއް އަންނާނެ ކަމަށް ބުނި ނަމަވެސް ވަޒީފާ އެއް އަދި ލިބުނު މީހަކުނެތެވެ. "ފެން" ބަންކަރިން އަށް ހެދި ބާޖު ފަދައިން ހޯރަފުށީ ދާއިރާގައި އިގްތިސޯދީ ހަރަކާތްތައް ހުއްޓި، ވަޒީފާގެ ފުރުސަތު ވެސް އޮތީ "ފެން" ވެފަ އެވެ. ފެންނަން އޮތީ މި ފޮޓޯގަނޑެވެ. މިނިސްޓަރު ސައީދު ދުރުގައި އެހުންނެވީ އަތްޖައްސަވާށެވެ. ނަމަވެސް ޖައްސަވާ ހިސާބެއް ދިމަލެއް ނުވެ އެވެ.