ބިދޭސީ މަސައްކަތްތެރިންނަށް އިހުމާލުވާ ފަރާތްތަކަށް ފިޔަވަޅު އަޅަނީ

އަލީ ރާޒީ

10 ސެޕްޓެމްބަރ 2025 - 13:47

0 comments

ބިދޭންސީން ތަކެއް ކުޑަ ގޮޅިއެއްގައި ބެޑުޖަހާ ނިދަނީ

ބިދޭސީ މަސައްކަތްތެރިންނަށް އިހުމާލުވާ ފަރާތްތަކާމެދު މިމަހުގެ 15 ވަނަ ދުވަހުން ފެށިގެން ފިޔަވަޅު އަޅަން ނިންމައިފި އެވެ.

އެ މިނިސްޓްރީން ކުރި އިއުލާނުގައި ބުނީ ބިދޭސީންނަށް އިހުމާލުވާ ފަރާތްތަކަށް، ވަޒީފާއާބެހޭ ގާނޫނަށް އެންމެ ފަހުން ގެނައި އިސްލާހާ އެއްގޮތަށް ފިޔަވަޅު އަޅައި، އިހުމާލުވާ ކޮންމެ މުވައްޒަފަކަށް 50،000ރ. ގެ މަގުން ޖޫރިމަނާކުރާނެ ކަމަށެވެ.

އެ ގާނޫނަށް މިިދިޔަ އަހަރުގެ އޮގަސްޓު 19 ގައި ގެނައި އިސްލާހުގައިވާ ގޮތުން، ބިދޭސީ މަސައްކަތްތެރިން ރާއްޖެ ގެނައުމަށްފަހު ވަޒީފާ ދިން ފަރާތުން އިހުމާލުވެއްޖެ ނަމަ އެ ފަރާތެއްގެ މައުލޫމާތު އާއްމުކުރަންޖެހެ އެވެ.

މީގެ އިތުރުން ވަޒީފާދޭ ފަރާތުން ޖޫރިމަނާގެ ފައިސާ ދައްކާ ހަލާސް ކުރުމުން މެނުވީ، އެކްސްޕެޓް ސިސްޓަމް މެދުވެރިކޮށް އިތުރު އެއްވެސް ހިދުމަތެއް ފޯރުކޮށް ނުދެވޭނެ ކަމަށްވެސް އެ މިނިސްޓްރީން ބުންޏެވެ.

ވަޒީފާއާބެހޭ ގާނޫނުގެ 7-65 ވަނަ މާއްދާގެ (ހ) ގައިވާ ގޮތުން ރާއްޖޭގައި ވަޒީފާ އަދާކުރުމަށް ބިދޭސީ މުވައްޒަފަކު ގެނައުމަށްފަހު އެފަރާތާމެދު އިހުމާލުވާ ވަޒީފާދޭ ފަރާތްތައް 50،000 ރުފިޔާއިން ޖޫރިމަނާ ކުރެވޭނެ އެވެ. އަދި 7-65 ވަނަ މާއްދާގެ (ށ) ގައި ބަޔާންކޮށްފައިވާ ހާލަތްތަކުގައި ނުހިމެނޭ ކަންކަމުގައި، ގާނޫނުގެ 8-65 ވަނަ މާއްދާގެ (ހ) ގައި ބަޔާންކުރާ ގޮތުގެމަތިން 100،000 ރުފިޔާއަށްވުރެ ބޮޑުނޫން އަދަދަކުން ޖޫރިމަނާ ކުރެވޭނެ އެވެ.

މިނިސްޓްރީން ބުނީ އެކްސްޕެޓް ޕޯޓަލް މެދުވެރިކޮށް، އަންނަ ހޯމަ ދުވަހުން ފެށިގެން އެ ފިޔަވަޅުތައް ތަންފީޒުކުރާނެ ކަމަށެވެ. އަދި ވަޒީފާދޭ ފަރާތުން ޖޫރިމަނާގެ ފައިސާ ދެއްކުމުން ނޫނީ އެ ސިސްޓަމް މެދުވެރިކޮށް އިތުރު އެއްވެސް ހިދުމަތެއް ފޯރުކޮށް ނުދޭނެ ކަމަށް ވެސް ބުންޏެވެ.