ސުވާލެއް؛ މުއިއްޒު ވެރިކަމުގައި ހޯރަފުށީ ހޮސްޕިޓަލް ހުޅުވޭނެ ތަ؟

އިސްމާއިލް ރިޒާ

18 ސެޕްޓެމްބަރ 2025 - 10:28

1 comments

ހޯރަފުށި ހޮސްޕިޓަލް އިމާރާތުގެ ކޮންކްރީޓް ތަބުތަކުގެ މަސައްކަތް ކުރިއަށް ދަނީ

ހއ. ހޯރަފުށީ ހޮސްޕިޓަލް އާ އިމާރާތް ކުރުމުގެ މަސައްކަތް ބަޔަކާއި ހަވާލުކުރީ ނިމުނު އެމްޑީޕީގެ ވެރިކަމުގައި އެވެ.

މިނިސްޓްރީ އޮފް ހެލްތުން ކުރިން ބުނީ އެ މަސައްކަތް ކޮންޓްރެކްޓްކޮށްފައި ވަނީ ޕީޓީ ސިޓްރަމަސް ހެވީ އިންޑަސްޓްރީސް އިން ޖޮއިންޓް ވެންޗާ ވިތު ފްލެކްސިންގް ޕްރައިވެޓް ލިމިޓެޑާއި ކަމަށެވެ.

ހއ. ހޯރަފުށީ ހޮސްޕިޓަލް އާ އިމާރާތުގެ އެއްބަސްވުމުގެ ދަށުން ކުރުމަށް ހަމަޖެހިފައިވާ މަސައްކަތުގެ ޖުމްލަ އަގަކީ 85,736,587.55 ރ (އަށްޑިހަ ފަސްމިލިއަން ހަތްސަތޭކަ ތިރީސްހަހާސް ފަސްސަތޭކަ އަށްޑިހަ ހަތް ރުފިޔާ ފަންސާސް ފަސް ލާރި) އެވެ.

އެ މަސައްކަތް ހަވާލުކޮށްފައި ވަނީ 540 (ފަސްސަތޭކަ ސާޅީސް) ދުވަހުގެ ތެރޭގައި ނިންމާގޮތަށެވެ.

ނަމަވެސް އެ މަސައްކަތް ކޮންޓްރެކްޓަރާއި ހަވާލުކުރިތާ ދެ އަހަރު ވެގެން ދިޔައިރު އަދި ވެސް ކުރިއަށްދަނީ ކޮންކްރީޓް ތަބުތަކުގެ މަސައްކަތެވެ.

ހޯރަފުށި އަދި އެ ދާއިރާގެ ރައްޔިތުންގެ އުންމީދާ ގުޅިފައިވާ މި މަސައްކަތް ލަސްވެ ދިއުމަކީ ރައްޔިތުންގެ ކަންބޮޑުވުން އޮތް މައްސަލައެކެވެ.

ހއ. ހޯރަފުށީ ސިއްހީ ފަރުވާ ރަނގަޅުކޮށްދިނުމަކީ 2023 ގެ ރިޔާސީ އިންތިހާބުގެ ކެމްޕެއިންގައި ޑރ. މުއިއްޒު ވެވަޑައިގެންނެވި ވައުދެކެވެ. ނަމަވެސް ރައީސް މުއިއްޒުގެ ސަރުކާރަށް ދެ އަހަރުވާން ދާއިރު ވެސް ހޯރަފުށީގެ ސިއްހީ ނިޒާމް އޮތީ ރައްޔިތުން "އިތުބާރު" ނުކުރާ ހިސާބެއްގައި އެވެ.

ސުވާލަކީ ރައީސް މުއިއްޒު ވެރިކަމުގައި ހޯރަފުށީ ހޮސްޕިޓަލްގެ މަސައްކަތް ނިންމާ ހިދުމަތް ދެވޭވަރު ވާނެ ބާ އެވެ؟!؟!؟!؟