ރައީސްގެ ވައުދާ އެއްގޮތަށް ހޯރަފުށިން ލިބޭ ސިއްހީ ފަރުވާ ރަނގަޅުނުކުރެވި ރައްޔިތުންގެ ކަންބޮޑުވުން!

އިސްމާއިލް ރިޒާ

15 ސެޕްޓެމްބަރ 2025 - 10:16

1 comments

ހއ. ހޯރަފުށީ ސިއްހީ ފަރުވާ ރަނގަޅުކޮށްދިނުމަކީ 2023 ގެ ރިޔާސީ އިންތިހާބުގެ ކެމްޕެއިންގައި ޑރ. މުއިއްޒު ވެވަޑައިގެންނެވި ވައުދެކެވެ. ނަމަވެސް ރައީސް މުއިއްޒުގެ ސަރުކާރަށް ދެ އަހަރުވާން ދާއިރު ވެސް ހޯރަފުށީގެ ސިއްހީ ނިޒާމް އޮތީ ރައްޔިތުން ކަންބޮޑުވާ ހިސާބެއްގައި އެވެ.

މިފަހުން ހޯރަފުށީ ހެލްތު ސެންޓަރުން ތުއްތު ކުއްޖަކަށް "އޮޅިގެން" ނުބައި ވެކްސިނެއް ދިން މައްސަލައެއް ވެސް ވަނީ ފެންމަތި ވެފަ އެވެ. އަދި ހއ. ހޯރަފުށީ ހެލްތު ސެންޓަރަށް ގެންދިޔަ ފަސް އަހަރުގެ ކުޑަ ކުއްޖަކަށް ފަރުވާ ދިނުމުގައި އިހުމާލުވި މައްސަލަ އެއް ވެސް ވަނީ ފެންމަތިވެފަ އެވެ.

މީގެ އިތުރުން ޑޮކްޓަރު ލިޔެދޭ ބޭސް ސިޓީގައި ހުންނަ ގިނަ ބޭސްތައް އާސަންދައިން ލިބެން ނުހުރުމާއި އާސަންދައިން ލިބެން ޖެހޭ ބައެއް ބޭސްތައް ވެސް ހޯރަފުށީގެ ފާމަސީތަކުން އާސަންދަ ދަށުން ދޫނުކުރާ ކަމުގެ ޝަކުވާ މި ފަހުން ވަނީ ވަރަށް ބޮޑަށް އިތުރުވެފަ އެވެ.

ނިމުނު ރިޔާސީ އިންތިހާބުގެ ކެމްޕެއިނަށް، ހޯރަފުއްޓަށް ވަޑައިގެން މުއިއްޒު ވިދާޅުވީ އެހެން ރަށްރަށެކޭ އެއްގޮތަށް މި ރަށަށް (ހޯރަފުށި) ބޭނުންވާ ކަންކަން ވެސް އެބަހުރި ކަމަށެވެ. އެގޮތުން، ގެދޮރުވެރިކަމާއި ވަޒީފާގެ ފުރުސަތުތައް އަދި ރަނގަޅު ސިއްހީ ފަރުވާ ލިބޭނެ ގޮތްތައް ހަމަޖައްސަން ޖެހޭ ކަމަށް އޭނާ ވިދާޅުވި އެވެ،

މުއިއްޒު ވިދާޅުވީ ކުރީގެ ސަރުކާރުތަކުން ސިއްހީ ހިދުމަތް ރަނގަޅުކުރުމަށް މަސައްކަތެއް ކޮށްފައިނުވާ ކަމަށެވެ. އެހެންވެ، ރަނގަޅު ފަރުވާ ލިބޭ ހޮސްޕިޓަލަކަށް ހޯރަފުށީ ހެލްތް ސެންޓަރު ހަދައިދިނުމަށް ވައުދުވެވަޑައިގެންނެވި އެވެ.

ނަމަވެސް ކުރީ ސަރުކާރުން ހޯރަފުށީގައި ފެށި ހޯރަފުށީ ހޮސްޕިޓަލްގެ މަސައްކަތް ވެސް މި ސަރުކާރުން ކުރިއަށް ގެންދާ ގޮތުން މި ދައުރުގައި ވެސް އެ ތަނުގެ މަަސައްކަތް ނިމި އެ ހޮސްޕިޓަލް ހުޅުވޭނެ ކަމަކަށް ލަފައެއް ނުކުރެވެ އެވެ.

އަތޮޅު ތެރޭ ހެލްތް ސެންޓަރުތަކުގައި ސިއްހީ ހިދުމަތް ދައްވުމާއި ބޭސް ލިބުމުގައި ހުރި ދަތިތަކުގެ ކަންބޮޑުވުން ގިނަ ރަށްރަށުން އަންނަނީ ކުރަމުން ނެވެ.