ޒުވާނުންގެ އާބާދީ ބޮޑު ހޯރަފުށީގައި ވަޒީފާއެއް ނެތް!

އަލީ އާމިރު

20 އޮކްޓޫބަރ 2025 - 09:49

0 comments

ދުނިޔެއަށް ކުރިމަތިވެފައިވާ ގޮންޖެހުންތަކުން އަރައިގަނެ ދެމެހެއްޓެނިވި ތަރައްގީގެ ލަނޑުދަނޑިތައް ހާސިލްކުރުމުގައި ޒުވާނުންގެ އާބާދީގެ ދައުރަކީ މުޅި ދުނިޔެއަށްވެސް ވަރަށް މުހިއްމު ދައުރެކެވެ. އަދި އެ ޒުވާނުންނަށް ސަރުކާރާއި ކުންފުނިތަކުގައި މަސައްކަތް ކުރުމުގެ ފަހި ފުރުސަތު ފަހިވެގެން ދިއުމަކީ ގައުމެއްގެ ތަރައްގީގައި މުހިންމު ފިޔަވަޅެކެވެ. އަދި ވަކިން ހާއްސަކޮށް އަމިއްލަ ތަފާތު މަސައްކަތްތެރިކަމުގެ ހުނަރު ދެއްކުމުގެ ވެށީގައި ޒުވާނުން ގިނަ ވެއްޖެ ނަމަ އެގައުމަކަށް އޮތީ އިގްތިސޯދީ އާރޯ ކަމެވެ.

ދުނިޔޭގެ ގިނަ ގައުމުތައް ހިމެނޭހެން މުޅި ރާއްޖޭގެ ޒުވާނުންނަށް ވެސް މިއަދު ކުރިމަތިވެފައިވާ އެންމެ ބޮޑު ކަންބޮޑުވުމަކީ ވަޒީފާގެ ފުރުސަތު މަދުވުމެވެ. މީ ރާއްޖެ ފަދަ ވަސީލަތްތަކާއި އާބާދީ ކުޑަ ގައުމެއްގެ އިގުތިސާދީ އިޖުތިމާއީ ގޮންޖެހުންތަކަށް އޮތް އެންމެ ބޮޑު ހުރަހެވެ. ރާއްޖޭގެ ވަޒީފާގެ ބާޒާރުގެ ހާލަތާއި ވަޒީފާ ބޭނުންވެފައި ތިބި ޒުވާނުންނާ ގުޅޭ ގޮތުން ކަމާ ބެހޭ ފަރާތްތަކުން ވެސް ފުންކޮށް ވިސްނަން މަޖުބޫރު ވެއްޖެ އެވެ.

ޒުވާނުންގެ އާބާދީ ބޮޑު ހޯރަފުށީގައި ވަޒީފާއެއް ނެތް!

މީ މިއަދު ހޯރަފުށީގެ މުސްތަގުބަލާ މެދު ވިސްނާ ކޮންމެ މީހެއްގެ ވެސް ކަންބޮޑުވުމެކެވެ. ޒުވާނުންގެ އާބާދީ ބޮޑު ހޯރަފުށިން މި ރިޕޯޓަށް ވާހަކަ ދެއްކި ޑިގްރީ އަށް ކިޔަވައިގެން ހުރި އަދި މިހާރު ވަޒީފާއެއް ހޯދަމުން އަންނަ ޒުވާނަކު ބުނިގޮތުގައި، މި ފަހުން ވެސް އޭނާ ވަޒީފާއަކަށް ކުރިމަތިލި އެވެ. އެކަމަކު އެއީ މާކުރިން "އެހެން މީހަކަށް ދީފައި" އޮތް ވަޒީފާއެއްކަން އެނގި ހުރެ ވެސް އެ މަގާމަށް ކުރިމަތިލީ ވަޒީފާއެއް ބޭނުންވެފައި ހުރިލެއް ބޮޑުކަމުންނެވެ.

އޭނާގެ ކަންބޮޑުވުމަކީ މަގާމަށް ޝަރުތު ހަމަވާއިރު ވެސް "ނުކިޔަވައި" ހުރި މީހަކަށް ބޮޑު މުސާރައެއް ލިބޭ އެ މަގާމު ލިބުމެވެ. އެހެންވެ، ވަޒީފާގެ މާހައުލަށް އޮތް ޝައުގުވެރިކަން ގެއްލިފައިވާ ކަމަށް ބުންޏެވެ.

މި ޒުވާނާ މި ފާޅުކުރެއްވި ކަންބޮޑުވުން ސޯޝަލް މީޑިއާގައި ވެސް ގިނަ ދާއިރާތަކުގައި މަސައްކަތް ކުރަން ބޭނުންވެފައި ތިބި ޒުވާނުންގެ އޮވެ އެވެ. މާމައްޗަށް ކިޔަވައިގެން ތިއްބަސް އެ މީހުންނަށް ފުރުސަތު ނުލިބި "އިހަށް ދުވަހު ސިޔާސީ ދާއިރާއަށް ފުންމާލާ" މީހާ އަށް ބޮޑެތި މަގާމުތައް ލިބުމަކީ މުޖުތަމައުގައި އޮތް ނުތަނަވަސް ކަމެކެވެ.

ކޮންމެ އަހަރަކު ވެސް އެތައް ހާސް ދަރިވަރުންނެއް ރާއްޖޭގެ ކޮލެޖުތަކާއި ޔުނިވާސިޓީތަކުން ގްރެޖުއޭޓް ވަމުން އަންނައިރު ވަޒީފާގެ ފުރުސަތުތައް ވެސް އިތުރުކޮށްދޭން ޖެހެ އެވެ. މިކަމަށް ގެނެވޭނެ އެންމެ ބޮޑު ހައްލަކީ ރާއްޖޭގައި އެކި ދާއިރާތަކުން ހުނަރު ހުރި ފަރާތްތަކަށް ކުރާ އިންވެސްޓްމަންޓް އިތުރުކުރުމެވެ. ހިތާމަ އަކީ މިއަދު ހޯރަފުށިން ބަލާނަމަ މުޅި ދާއިރާ އޮތީ އިގްތިޞާދީ ހަރަކާތްތައް ހުއްޓި، ވަޒީފާގެ ފުރުސަތު ބަންދުވެފައި..! އެވެ.

ރާއްޖޭގައި އެންމެ ފަހުން 2022 ވަނަ އަހަރުގައި ނެގި ބޯހިމެނުމުގެ ތަފާސްހިސާބުތަަކަށް ޖެހިލަމާ ހިނގާށެވެ. ޒުވާނުން ވަޒީފާ އަށް ބޭނުންވެފައި ތިބި ވަރު އެ ހިސާބުތަކުން ވަރަށް ރަނގަޅަށް ސާފުކޮށްދެ އެވެ. ވަޒީފާ އަދާނުކުރާ ކޮންމެ ތިން މީހަކުން އެކަކީ ޒުވާނެކެވެ. އެއީ އުމުރުން 15-24 އަހަރާ ދެމެދުގެ ޒުވާނުންގެ ތެރެއިންނެވެ.

އެ ހިސާބުތަކުގައިވާ ގޮތުން އުމުރުން 15-24 އަހަރާ ދެމެދުގެ ޒުވާނުންގެ ތެރެއިން 12 ޕަސެންޓަކީ ވަޒީފާ ނެތް ޒުވާނުންނެވެ. މިއީ އުމުރުން 25 އަހަރުން މަތީގައި ވަޒީފާ ނެތް މީހުންގެ ހިސާބުތަކާ ބަލާއިރު ތިން ގުނަ އިތުރު އަދަދެކެވެ.

މޯލްޑިވްސް ސްޓެޓިސްޓިކް ބިއުރޯ އިން ނެރެފައިވާ އެ ހިސާބުތަކުގައިވާ ގޮތުން ނަމަ އުމުރުން 18 އަހަރާއި 35 އަހަަރާ ދެމެދުގެ މީހުންގެ ތެރެއިން ވަޒީފާ ނެތީ 6.1 ޕަސެންޓް މީހުންގެ އެވެ.

ތަފާސްހިސާބުތައް ދައްކާ ގޮތުން ޑިގްރީ އާއި އެ އަށް ވުރެ މަތީ ފެންވަރަށް ކިޔަވައިގެން ތިބޭ މީހުންގެ ހަތް ޕަސެންޓް އަދި މަތީ ސާނަވީ ފެންވަރުގެ ފަސް ޕަސެންޓަކީ ވަޒީފާ ނެތް މީހުންނެވެ.

ކިޔަވައިގެން ތިބި ރަނގަޅު އެތައް ޒުވާނުންނެއް އެ ގެންދަނީ ވަޒީފާގެ ފަހަތުން ދުވަމުންނެވެ. އިންޓަވިއުތަކަށް ދިޔަ ނަމަވެސް ލިބެނީ މާޔޫސްވާ ކަހަލަ ނަތީޖާތަކެކެވެ. މުޅި ހޯރަފުށިން ވެސް މިއަދު ފެންނަނީ ހަމަ މި މަންޒަރެވެ. މުޅި ހޯރަފުށީ ދާއިރާގެ ރައްޔިތުން ހާއްސަކޮށް ޒުވާނުންގެ މިއަދުގެ ގޮވާލުމަކީ ސިޔާސީ ބޮޑުންގެ ގޭ ދޮށުގައި މުގޯލި އަޅަން ނުޖެހި "ވަޒީފާގެ ފުރުސަތު" ރަށުން ތަނަވަސް ކޮށްދިނުމެވެ. އަދި ސަރުކާރުން ވަޒީފާގެ ބިރު ދެއްކުން ހުއްޓާލުމަށެވެ.

ރާއްޖޭގެ އާބާދީގެ ދެބައިކުޅަ އެއްބަޔަކީ ޒުވާނުންނެވެ. ތަރައްގީގެ ކޮންމެ މަރުހަލާއެއްގައި ވެސް އެ މީހުން ޝާމިލުކުރުމަކީ ނުހަނު ބޭނުންތެރި ކަމެކެވެ. ރާއްޖޭގެ ތަރައްގީގެ މަސައްކަތުގައި، ޒުވާން އާބާދީ އަދާކުރާ ދައުރަކީ ވަރަށް މުހިންމު ދައުރެކެވެ. ގައުމެއްގެ މުސްތަގުބަލަށްޓަކައި އެންމެ މުހިއްމު ކަމަކީ ޒުވާނުން ބާރުވެރިކުރުވުމެވެ. ޒުވާނުންނަށް ތައުލީމާއި ތަމްރީންގެ ފުރުސަތުތައް ހޯދައިދީ ޒުވާނުންނަކީ ގާބިލް ބަޔަކަށް ހެދުމެވެ. މި މަސައްކަތުގައި ސިޔާސީ ވިސްނުން އެއް ކިބާކޮށް އެކުގައި މަސައްކަތް ކުރަން ޖެހެ އެވެ. ސިޔާސީ ބޭނުމަށް ވަޒީފާގެ ބިރު ދައްކައި، ވަޒީފާ އިން ވަކިކުރުން ފަދަ ކަންކަމަށް ރާއްޖެ "މިންޖުވާން" ވެއްޖެ އެވެ.

ހޯރަފުށީ ޒުވާނުން ހިމެނޭހެން ޖުމްލަކޮށް މުޅި ރާއްޖޭގެ ޒުވާނުން އެދޭ އެދުމަކީ ރަށުން ވަޒީފާގެ ފުރުސަތު ފަހިވުމެވެ. އަދި ވަޒީފާގެ ބިރުން މިންޖުވުމެވެ. ހޯރަފުށިން މިފަހުން ވަނީ އެރަށުގައި ބިއްލޫރި ފުޅީގައި ފެން ބަންދުކުރަން ހަދަމުން އަންނަ ބޮޓްލިން ޕްލާންޓުގެ މަސައްކަތް ހުއްޓާލާ އެތަނުގެ މަސައްކަތް ކުރަމުން އަންނަ 15 މުވައްޒަފުން ކުއްލިއަކަށް ވަޒީފާއިން ވަކިކޮށްފައި އެވެ. އެކަމާއި ގިނަ ޒުވާނުން ތިބީ ވަރަށް ބޮޑަށް ނުރުހިފަ އެވެ. ރުޅި އައިސްފަ އެވެ. ދެރަވެފަ އެވެ. ސިޔާސީ ވިސްނުން ތަފާތުވުމުން ވަޒީފާއިން ވަކިކުރަން ނުޖެހޭ ކަމަށް އެ ޒުވާނުން ގަބޫލުކުރެ އެވެ.