ފަލާހު ގޮވާލެއްވީ އެމްޑީޕީ ލީޑަޝިޕުން އާ ޕާޓީއެއް އުފައްދަން!

މަރިޔަމް އަނާ

24 ފެބުރުއަރީ 2026 - 16:02

0 comments

އެމްޑީޕީ ލީޑަޝިޕުން އާ ޕާޓީއެއް އުފައްދަން ސަރުކާރު ހިންގާ ޕާޓީގެ ޕާލަމެންޓްރީ ގުރޫޕުގެ ލީޑަރު އިބްރާހިމް ފަލާހު ރޭ ގޮވާލައްވައިފި އެވެ.

ފަލާހު ވިދާޅުވީ، އެމްޑީޕީ ދެން އަލުން ކޮޅަށް ޖެހޭނެ ކަމަށް ގަބޫލުނުކުރެއްވޭ ކަމަށެވެ. އެގޮތުން މިދިޔަ އަހަރުވެސް 9 މިލިއަން ރުފިޔާ އެ ޕާޓީއަށް ލިބިފައިވާއިރު، އިންތިހާބާ ދިމާކޮށް ކެންޑިޑޭޓުންގެ ފީވެސް އިލެކްޝަންސް ކޮމިޝަނަށް ދައްކައިދީފައި ނުވާ ކަމަށް އޭނާ ވިދާޅުވިއެވެ. އެހެންކަމުން، ސިޔާސީ މަސައްކަތް ކުރިއަށްގެންދަން ބޭނުންވާ ނަމަ އާ ސިޔާސީ ޕާޓީއެއް އުފެއްދުމަށް އެމްޑީޕީގެ ލީޑަޝިޕަށް އޭނާ ވަނީ ގޮވާލައްވާފަ އެވެ.

"އަޅުގަނޑަށް ގަބޫލު ކުރެވޭ ގޮތުގައި އެެމްޑީޕީ ނަގާ ދެން ކޮޅަކަށް ނުޖެހޭނެ. ދެން އެ ބޭފުޅުންނަށް އެންމެ ރަނގަޅު ގޮތަކަށް ވާނީ އާ ސިޔާސީ ޕާޓީއެއް އުފެއްދުން " ޕީއެންސީ ޓިކެޓުގައި ގދ. ތިނަދު އަށް ވާދަކުރައްވާ ކެންޑިޑޭޓުންގެ މާލޭގެ ކެމްޕެއިން ޖަގަހަ ހުޅުވަން ބޭއްވި ހަފުލާގަައި ފަލާހު ވިދާޅުވި އެވެ.

ފަލާހު ތުހުމަތު ކުރެއްވި ގޮތުގައި "މުޅި އެމްޑީޕީ" ވަނީ ބައިބައިވެ، ފެކްޝަންތައް ހެދިފަ އެވެ. އަދި ވިދާޅުވީ، އެ ޕާޓީން ކުރާ ކަމަކީ ގައުމު ހަލާކުކޮށްލުމުގެ މަސައްކަތްތަކެވެ.

ރައްޔިތުންގެ މަޖިލިހުގެ އިންތިހާބާއި ރިޔާސީ އިންތިހާބު އެއްކޮށްލުމާ އެމްޑީޕީން ދެކޮޅު ހަދާތީ އެކަމާ ގުޅޭ ގޮތުން ވާހަކަ ދައްކަވަމުން ފަލާހު ވިދާޅުވީ، އެ ޕާޓީން އެ ކަންބޮޑުވަނީ މިހާރު ރައްޔިތުންގެ މަޖިލިހުގައި ތިއްބެވި އެމްޑީޕީގެ 12 މެމްބަރުންގެ މުސާރަ ހަ މަސް ދުވަހަށް އުނިވާތީ ކަމަށެވެ.

"ކިހިނެއްތޯ މި ވަރުގެ ބަޔަކާ އެކު މި ގައުމުގެ ރައްޔިތުން އުޅޭނީ؟ މި ދަންނަވަނީ ގައުމަކަށް ލިބެން އޮތް އެތައް ސަތޭކަ މިލިއަން ރުފިޔާއަކާއި އެމްޑީޕީގެ 12 މެމްބަރުންގެ ރައްޔިތުންގެ މަޖިލިސްގެ ހަ މަސް ދުވަހުގެ މުސާރައާ އަޅާ ކިޔާ ވާހަކަ މި ދައްކަނީ. މިއީ މައްސަލައެއް،" ފަލާހު ވިދާޅުވި އެވެ.