އިހުސާންގެ އަނބިކަނބަލުންގެ ވީޑިއޯއެއް ނެގި ކަމުގެ ތުހުމަތު

ހަސަން ހަލީމް

27 ފެބުރުއަރީ 2026 - 14:36

0 comments

އިހުސާން އާންމުކުރެއްވި ސީސީޓީވީ ފޫޓޭޖުގެ ސްކްރީންޝޮޓެއް.

ހޯމް މިނިސްޓަރު އަލީ އިހުސާންގެ އަނބިކަނބަލުންނާއި ދަރިފުޅުގެ ވީޑިއޯއެއް ނެގި ކަމުގެ ތުހުމަތު، އެމްޑީޕީގެ ސަރުކާރުގައި ހައުސިން މިނިސްޓްރީގެ ސްޓޭޓް މިނިސްޓަރަކަށް ހުންނެވި އަކްރަމް ކަމާލުއްދީނާއި އެމްޑީޕީގެ ޑެޕިއުޓީ ޗެއާޕާން، އިބްރާހިމް ވަހީދުގެ މައްޗަށް ކުރައްވައިފި އެވެ.

ކުރު ސީސީޓީވީ ފުޓޭޖަކާ އެކު، މިނިސްޓަރު ރޭ ދަންވަރު ކުރެއްވި ޕޯސްޓުގައި ވަނީ، އިއްޔެ ހަވީރު އިބްރާހިމް ވަހީދާއި އަކްރަމް, އޭނާގެ އަނބިކަނބަލުންނާއި ދިހަ އަހަރުގެ ދަރިފުޅު މަގުމަތިން ދަނިކޮށް ވީޑިއޯކޮށްފައިވާ ކަމަށެވެ.

މިނިސްޓަރު ހާމަކުރެއްވި ވީޑިއޯއިން ފެންނަ ގޮތުގައި، އިބްރާހިމް ވަހީދު ވީޑިއޯއެއް ނަގާއިރު، އަކްރަމް ކައިރީގައި ހުންނަވަ އެވެ. އަދި، އިތުރު މީހަކު އެ ދެމީހުން ކައިރީ ސައިކަލެއްގައި މަޑުކޮށްލައިގެން އިންނަ މަންޒަރު ވީޑިއޯއިން ފެނެ އެވެ.

ކާކުކަން ނޭނގޭ އެކައުންޓަކުން އެ ދެ މީހުން ނެގި ވީޑިއޯ ޕޯސްޓުކޮށްފައިވާ ކަމަށް މިނިސްޓަރު ވަނީ ވިދާޅުވެފަ އެވެ.

ކާކުކަން ނޭނގޭ އެކައުންޓެއްގައި އިހުސާންގެ އަނބިކަނބަލުންނާއި ދަރިފުޅުގެ ވީޑިއޯއެއް ޕޯސްޓުކޮށް ބުނެފައިވަނީ މިނިސްޓަރުގެ އާއިލާ ބޭރުގައި އުޅެނީ ބޮޑީގާޑުންނާ އެކު ކަމަށެވެ. އެހެންވެ، އެކަމަށް ފާޑުކިޔާފައިވެ އެވެ.