އިންތިހާބުތަކާ ގުޅިގެން ދޫކޮށްލި ގައިދީން އަނބުރާ ޖަލަށް ގެންނަނީ

އިބްރާހިމް އިމާދު

05 މާޗް 2026 - 12:10

0 comments

ހޯމް މިނިސްޓަރު އަލީ އިހުސާން

މިދިޔަ ރިޔާސީ އިންތިހާބާ ދިމާކޮށް ކުރީ ސަރުކާރުން މިނިވަންކުރި ގައިދީންގެ ތެރެއިން އަލުން ބަންދުކުރަން ޖެހޭ މީހުން އަނބުރާ ޖަލަށް ގެނައުމުގެ މަސައްކަތް ކުރަމުންދާ ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެ އެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި، މިނިސްޓަރު އިހްސާން ވިދާޅުވީ ކުރީ ސަރުކާރުން މާލޭ ޖަލު ސްކޫލަކާ އިންވެގެން ހުންނާތީ އުވާލާފައިވާ ކަމަށެވެ. ކަސްޓޯޑިއަލް ފެސިލިޓީވެސް ތަޅާލައި 450 މީހުންގެ ޖާގަ މުޅިން ގެއްލުނު ކަމަށެވެ.

"އެކީ ޖުމްލަ 450 ގައިދު ކުރެވޭނެ ޖާގަ މުޅި ކަރެކްޝަންސްގެ ކަސްޓޯޑިއަލް އިންފްރާސްޓްރަކްޗާގެ ތެރެއިން ވަނީ ދުއްވާލާފައި. މި ގެއްލުނު ޖާގަތަކުގައި ތިބި ގައިދީން ވަނީ ދޫކޮށްލާފައި އިންތިހާބުތަކާ ގުޅިގެން،" މިނިސްޓަރު ވިދާޅުވި އެވެ.

އިންތިހާބާ ދިމާކޮށް ދޫކޮށްލި މީހުންގެ ތެރެއިން އަނބުރާ ޖަލަށް ގެންނަން ޖެހޭ މީހުންނާއި އަދި މުޖުތަމައުގައި އެކި ގޮތްގޮތުން ދޫވެފައި ތިބި މީހުން އެކަހެރިކޮށް، ޖަލަށް ގެނައުމަށް ކުރާ މަސައްކަތަށް އަންނަ އެންމެ ބޮޑު ލޮޅުމަކީ އެ އިންފްރާސްޓްރަކްޗާ ނެތުން ކަމަށް އިހުސާން ވިދާޅުވި އެވެ.

އެހެންނަމަވެސް މިހާރު ކަރެކްޝަނަލް ސާވިސް އާއި ގައިދީން ގުޅިގެން ކުރި މަސައްކަތުން، ފާއިތުވި ދެ އަހަރެއްގާ ދުވަސްތެރޭ 400 އެއްހާ ޖާގަ ޖަލަށް އިތުރު ކުރެވިފައިވާކަންވެސް އޭނާ ފާހަގަކުރެއްވި އެވެ. އަދި ވިދާޅުވީ އެ ޖާގަތައް ފުލްވާވަރަށް މީހުން ބަންދުކޮށްފައި އެބަތިިބި ކަމަށެވެ.

މިނިސްޓަރު ވިދާޅުވީ، ކަރެކްޝަންސްގެ އިދާރީ ހިދުމަަތްތައް ޑިޖިޓަލައިޒްކޮށް، މާފުށީ ޖަލުގެ ސެކިއުރިޓީ ހަރުދަނާކުރުމަށް، އެތަނުގައި ބޮޑީ ސްކޭނަރުވެސް މުޅިން އަލަށް ބަހައްޓާފައިވާ ކަމަށާއި އެކަމުގެ ސަބަބުން ޖަލަށް މަނާތަކެތި ވައްދާ ނަމަ އެނގޭނެ ކަމަށެވެ.

މިނިސްޓަރު އިތުރަށް ވިދާޅުވީ، ހާއްސަ ގޮތެއްގައި ޖަލުން ކުރާ ސްކޭމް ކޯލްތައް އެކަމުގެ ސަބަބުން މަދުވާނެ ކަމަށެވެ.