ސްޓެލްކޯގެ ކަސްޓަމާ ސާވިސް ޕޯޓަލް ވަށަނި އިފްތިތާހުކޮށްފި

އަހުމަދު ނަޖީބު

05 މާޗް 2026 - 16:01

0 comments

ޒަމާނީ ފަސޭހަތަކާއެކު، ސްޓެލްކޯގެ ކަރަންޓާއި ގުޅުންހުރި ހުރިހާ ހިދުމަތަކަށް އެދެވޭގޮތަށް ފަރުމާކޮށްފައިވާ، އެ ކުންފުނީގެ ކަސްޓަމަރު ސާވިސް ޕޯޓަލް "ވަށަނި" އިފްތިތާހުކޮށްފި އެވެ.

އެ ޕޯޓަލް އިފްތިތާހު ކޮށްދެއްވީ ސްޓެލްކޯގައި ބޭއްވި ހާއްސަ ރަސްމިއްޔާތެއްގައި، އެ ކުންފުނި ހިންގުމާ ވަގުތީ ގޮތުން ހަވާލުވެ ހުންނެވި، ޑެޕިއުޓީ މެނޭޖިން ޑިރެކްޓަރު ޑރ. އަލީ އަޒްވަރު އެވެ.

އެ ރަސްމިއްޔާތުގައި އަޒްވަރު ވިދާޅުވީ "ވަށަނި" ޕޯޓަލްއަކީ ރައީސް ޑރ. މުހައްމަދު މުއިއްޒުގެ 2.0 އަދި ރާއްޖޭގެ ހުރިހާ އިދާރާތަކެއް ޑިޖިޓަލް ކުރުމަށް ފަށާފައިވާ ޕްރޮޖެކްޓުގެ ދަށުން ކުރި މަސައްކަތެއް ކަމަށެވެ.

މިއަދަކީ ސްޓެލްކޯގެ ހަޔާތުގައި ފާހަގަ ކޮށްލެވޭ ދުވަހެއްކަން ފާހަގަ ކުރައްވައި، އަޒްވަރު ވިދާޅުވީ އެއީ ވަށަނި ޕޯޓަލަކީ ކުންފުނީގެ ވަރަށް ގިނަ މުވައްޒަފުން ވަރަށް ގިނަ ދުވަސް ވަންދެން މަސައްކަތްކޮށް، ނިންމި ވަރަށް މުހިންމު މަސައްކަތެއް ކަމަށެވެ.

"ވަށާ ޖެހޭ ހިދުމަތެއް. އަޅުގަނޑުމެންގެ ހިދުމަތް އޮންލައިން ކުރެވި ޕޭޕަރލެސް ސިސްޓަމަކަށް ވެގެން މިދިޔައީ. މިއީ އަޅުގަނޑުމެން ދުވަސްތަކެއް ވަންދެން ކުރަމުން އައި އުއްމީދެއްގެ ނިމުން. އެހެންވީމަ މިއަދަކީ ވަރަށް ފާހަގަކޮށްލެވޭ، ކުންފުނީގެ ޙަޔާތުގައި މުހިއްމު ދުވަހެއް ކަމަށް އަޅުގަނޑު ދެކެނީ." އަޒުވަރު ވިދާޅުވި އެވެ.

އަޒުވަރު އިތުރަށް ވިދާޅުވީ، މި ޚިދުމަތަކީ އާންމުން ބަލައިގަންނާނެ އަދި އެ ކުންފުނީގެ ފަރާތުން ފޯރުކޮށްދޭ ޚިދުމަތްތައް މިހާރަށްވުރެ ބޮޑަށް ލުއިފަސޭހަކަމާއެކު ލިބިގެންދާނެ ހިދުމަތެއް ކަމަށެވެ. އަދި މި އިންޑަސްޓްރީގައި އޮންލައިންކޮށް މި ހިދުމަތް ދިނުމުގައި އެހެން ހަރުފަތަކަށް ގެންގޮސްދޭ މަސައްކަތަކަށް މިކަން ވާނެކަމަށާއި ސްޓެލްކޯގެ ޚިދުމަތްތަކަކީ 24 ގަޑިއިރު ދޭ ޚިދުމަތަކަށްވުމުން، އެ ފަސޭހަވެސް ކަސްޓަމަރުންނަށް ލިބިގެންދާނެކަމަށް އަޒުވަރު ވިދާޅުވި އެވެ.