ޝީޝާ މަނާކޮށް، ހަކުރު ސަބްސިޑީ ކަނޑާލައި ޓެކްސް ނެގުމުގެ މަޝްވަރާ އެބަކުރަން: ނާޒިމް

އިބްރާހިމް އިމާދު

05 މާޗް 2026 - 16:08

0 comments

ދުޅަހެޔޮ ޖީލެއް ބިނާކުރުމަށް ރާއްޖޭގައި ޝީޝާ މަނާ ކުރުމާއި، ހަކުރު އެކުލެވޭ ބާވަތްތަކުން ޓެކްސް ނެގުމުގެ އިތުރުން ހަކުރަށް ދޭ ސަބްސިޑީ ކަނޑާލުމާ ގުޅޭގޮތުން ސަރުކާރުން މަޝްވަރާ ކުރަން ފަށައިފި އެވެ.

މި ސަރުކާރުން ދުންފަތާ ދެކޮޅަށް ކުރަމުންދާ މަސައްކަތްތަކުގެ ދަށުން 2024ގައި ވަނީ ވޭޕް މަނާކޮށް، ސިނގިރޭޓުން ނަގާ ޓެކްސް ބޮޑުކޮށްފަ އެވެ. އަދި 2007އިން ފެށިގެން އުފަންވެފައިވާ އަދި އެ ތާރީޚުގެ ފަހުން އުފަންވާ ހުރިހާ ކުދިންނަށް ދުންފަތް މަނާ ކުރުމުގެ ގާނޫނު މިދިޔަ ނޮވެންބަރު މަހު ވަނީ ތަންފީޒު ކުރަން ފަށައިފައެވެ.

އެ ފިޔަަވަޅުތަކަށް ތައުރީފުކޮށް، ދިވެހި ޑޮކްޓަރުން ހިމެނޭ ޖަމިއްޔާއިން މިދިޔަ އޮކްޓޫބަރު މަހު ނެރުނު ބަޔާނެއްގައި ވަނީ، ހަކުރު އެކުލެވޭ ބުއިންތަކާ ޕާމް އޮއިލްއާއި ޓްރާންސް ފެޓް ގިނައިން ހުންނަ ކާބޯތަކެއްޗާއި ޕްރޮސެސްކޮށްފައިވާ މަސް ފަދަ އުފެއްދުންތަކުން ނަގާ ޓެކްސް ބޮޑުކުރަން ގޮވާލައިފައެވެ. އަދި އެކި ފްލޭވާތަކުގެ ދުންފަތް އެކުލެވޭ ބާވަތްތަކާއި ޝީޝާ އެއްކޮށް މަނާކުރަން އެ ޖަމިއްޔާއިން ގޮވާލިއެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ހެލްތު މިނިސްޓަރު އަބްދުﷲ ނާޒިމް އިބްރާހިމް ވިދާޅުވީ ދުންފަތުގެ މައްސަލައިގައި އަޅުއްވަން ޖެހޭ ފިޔަވަޅުތައް އަޅުއްވައި ގާނޫނެއް ތަންފީޒުކުރެއްވުމަކީ މި ސަރުކާރުން ކުރިން އެންމެ މުހިންމު އެއް މަސައްކަތް ކަމަށެވެ. އެގޮތުން ވޭޕް މަނާކުރުމާއި ދުންފަތުގެ ޓެކްސް ބޮޑުކުރުން އަދި ޖެނެރޭޝަން ބޭން ފަދަ މަސައްކަތްތަކަކީ ވަރަށް މުހިންމު މަސައްކަތްތަކެއް ކަމަށް ވަޒީރު ފާހަގަކުރެއްވި އެވެ.

"އަޅުގަނޑުމެން އެކި ލެވެލްގައި އެބަ ކުރެވޭ [މަޝްވަރާ]. ކިހާ ހިސާބެއްގައި ތޯ މުޅިން ތަންފީޒުވެގެން ދާނީ، އެއީ ކަންނޭނގެ އުފެދޭނެ ސުވާލަކީ. އެންމެ މުހިއްމު ދަނޑިވަޅުގައި، މުހިއްމު ހާލަތުގައި، މުހިއްމު ވަގުތުގައި އެކަންކުރުން ވަރަށް މުހިއްމު،" އޭނާ ވިދާޅުވި އެވެ.

މިނިސްޓަރު ވިދާޅުވީ ހަކުރު ބާވަތްތަކުން ޓެކްސް ނެގުމާއި ސަބްސިޑީ ކަނޑާލުމަކީ ހަމައެކަނި އެ މިނިސްޓްރީއަށް ނެގޭނެ ނިންމުމެއް ނޫން ކަމަށެވެ. ނަމަވެސް އެ ފިޔަވަޅު އެޅޭނެ ދުވަހަކަށް ހެލްތު ސެކްޓާއިން އިންތިޒާރުކުރާ ކަމަށް ވެސް ނާޒިމް ވިދާޅުވި އެވެ.

އާއްމު ސިއްހަތު ރައްކާތެރި ކުރުމުގައި ބޮޑެތި މަޝްވަރާތަކެއް ކުރަމުން އަންނަ ކަމަށް މިނިސްޓަރު ވިދާޅުވިއިރު، ޑޮކްޓަރުންގެ ޖަމިއްޔާއިން ވެސް ވަނީ ޝީޝާ މަނާކޮށް، ހަކުރު އެކުލެވޭ ބުއިންތަކުން ނަގާ ޓެކްސް އިތުރުކުރަން ގޮވާލައިފަ އެވެ.

ރާއްޖެ އެތެރެކުރާ ކާޑުގެ ބާވަތްތަކުގައި ހިމެނޭ ހަކުރު ހެޔޮ އަގުގައި ފޯރުކޮށްދޭން ވެސް ދައުލަތުން ސަބްސިޑީއަށް ބޮޑު ހޭދައެއް ކުރެ އެވެ.

މިފަދަ ކަންކަމަކީ ރައްޔިތުންގެ ދިރިއުޅުމުގެ ވައްޓަފާޅިއާ ވަރަށް ބޮޑަށް ގުޅި އޭގެ ތެރޭގައި ވަރަށް ބޮޑަށް ލާމެހިގެން އެއާއެކު އުޅެވިފައި ހުރި ކަމަކަށްވާތީ، ވަކި އުސޫލެއްގެ ތެރެއިން ކަންކަން ކުރިއަށް ގެންދިޔުމަކީ މުހިންމު ކަމެއް ކަމަށް ވެސް ނާޒިމް ވިދާޅުވި އެވެ.

މިދިޔަ އަހަރު ސަރުކާރުން ކުރި އެންމެ މުހިންމު އެއް މަސައްކަތަކީ ދުންފަތުގެ މައްސަލައިގައި އަޅުއްވަންޖެހޭ މުހިންމު ފިޔަވަޅުތައް އަޅުއްވައި އެ ގާނޫނު ތަންފީޒު ކުރެއްވިކަން ނާޒިމް ފާހަގަކުރެއްވި އެވެ.

ސަރުކާރުން މިދިޔަ އަހަރު ރާއްޖެއިން ވޭޕް މަނާކޮށް، ދުންފަތުން ޓެކްސް ބޮޑުކުރުމުގެ އިތުރުން ދުންފަތަށް ޖެނެރޭޝަނަލް ބޭންއެއް ވެސް ގެނެސްފައިވެ އެވެ.