ދެ އިންތިހާބު އެއްކޮށްލުމުން ލަނޑެއް ލިބިދާނެ: ސޯލިހު

ހުނައިދާ ޔާސިރު

08 މާޗް 2026 - 12:34

0 comments

ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްކޮށްލައިގެން 2028ގައި ރައީސް މުހައްމަދު މުއިއްޒަަށް ބޮޑު ލަނޑެއް ލިިބިދާނެ ކަމަށް ކުރީގެ ރައީސް އިބްރާހިމް މުހައްމަދު ސޯލިހު ރޭ ވިދާޅުވެއްޖެ އެެވެ.

އެމްޑީޕީން ރޭ ކ. މާފުށީގައި ބޭއްވި ކައުންސިލް އިންތިހާބުގެ ކެމްޕޭން ޖަލްސާގައި އެ މަނިކުފާނު ވިދާޅުވީ، ގާނޫނުއަސާސީއަށް ބޭނުންހާ ގޮތަކަށް އިސްލާހުތައް ސަރުކާރުން ގެންނަމުންދާ އިރު، ގާނޫނުއަސާސީ ތަރުތީބުކުރެވިފައި އޮތީ ނުވިސްނައި ނޫން ކަމަށެވެ.

އިބޫ ވިދާޅުވީ ބޮޑު ދެ އިންތިހާބު އެެއްކޮށްލުމަކީ ރައީސް މުއިއްޒުގެ ވައުދެއް ވެސް ނޫން ކަމަށާއި އެކަމަކު މިހާރު އަމިއްލަ ފައިދާއަށް ކަންކަން ކުރަން ހަދައިގެން ބޮޑު ލަނޑެއް ވެސް ލިބިދާނެ ކަމަށެވެ. ދެހާސް އަށެއްގެ ރިޔާސީ އިންތިހާބު އެމްޑީޕީން ކާމިޔާބުކުރި އިރު، އޭރުގެ ރައްޔިތުންގެ މަޖިލިސް ރައީސް މައުމޫން އަބްދުލްގައްޔޫމަށް ކާމިޔާބުވެގެންދިޔަ ގޮތަކީ އެފަދަ މިސާލެއް ކަމަށް އިބޫ ވިދާޅުވި އެވެ.

އެ މަނިކުފާނު ވިދާޅުވީ އޭގެ ކުރިން ގާނޫނުއަސާސީ އަށް އިސްލާހު ގެނައިއިރު މަޖިލީހުގެ ބާބުގައި ގިނަ ބާރުތަކެއް ލިޔުނީ، މަޖިލިސް އިންތިހާބު އެމްޑީޕީއަށް ކާމިޔާބުވާނެ ކަމަށް ބަލައިގެން ކަމަށެވެ.

"ރައީސް މުއިއްޒު މިއަދު އެ ގެންނަވާ އިސްލާހުން ހަމަ ފަހަރުގައި އެ މަނިކުފާނަށްވެސް 2028ގައި ބޮޑު ލަނޑެއް ލިބުމަކީ އެކަށީގެންވާ ކަމެއް،" އިބޫ ވިދާޅުވި އެވެ.

ދެ އިންތިހާބު އެއްކޮށްލުމުގެ ވާހަކައަކީ ރައީސް މުއިއްޒުގެ މެނިފެސްޓޯގައި ވެސް ނެތް އެއްޗެއްކަން ފާހަގަކުރައްވައި ސޯލިހު ވަނީ، "ހަމަ ހިތަަށް އެރުމުން" ކަންކަން ނުކުރައްވާ، އޭގެ ނަތީޖާ އާއި ފައިދާގެ ވާހަކަ ވެސް ރައްޔިތުންނަށް ކިޔައިދިނުމަށް އެދިވަޑައިގެންފަ އެވެ. ސޯލިހު ވިދާޅުވީ 60 މިލިއަން ރުފިޔާ ސަލާމަތްކުރާށޭ ކިޔާފައި ދެ އިންތިހާބު އެއްކޮށްލަން ރައްޔިތުން ބޭނުންނުވާ ކަމަށާއި އެއީ އެއަށް ވުރެ ގެއްލުން ބޮޑު ކަމެއް ކަމަށެވެ.

ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއް ދުވަހު ބޭއްވުމާ މެދު ރައްޔިތުންގެ ހިޔާލު ހުރި ގޮތް ބެލުމުގެ ވޯޓު އޮންނާނީ ކުރިއަށް އޮތް އޭޕްރީލް 4 ވަނަ ދުވަހު އެވެ. އެ ދުވަހު ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގެ އިންތިހާބުގެ ވޯޓުލުންވެސް އޮންނާނެ އެވެ.