ބައެއް ގައުމުތަކުން އަންނަ ޓޫރިސްޓުންގެ އަދަދު ދަށަށް!

އައިމިނަތު ޝިޔާޒާ

26 އޭޕްރީލް 2026 - 10:59

0 comments

މި މަހު ރާއްޖެ އަށް އައި ޓޫރިސްޓުންގެ އަދަދު 27 ޕަސެންޓަށް ދަށަށް ގޮސް އަދި ބައެއް ގައުމުތަކުން އަންނަ ޓޫރިސްޓުންގެ އަދަދު ދަށަށް ވެސް ހިނގައްޖެ އެވެ.

ޓޫރިޒަމް މިނިސްޓްރީން އާންމުކޮށްފައިވާ ފަތުރުވެރިކަމުގެ އެންމެ ފަހުގެ ތަފާސްހިސާބުތަކަށް ބަލާއިރު، މި މަހުގެ 22 ވަނަ ދުވަހުގެ ނިޔަލަށް މި އަހަރު ތެރޭ ރާއްޖެ އައިސްފައިވަނީ 758،753 ފަތުރުވެރިންނެވެ. މިދިޔަ އަހަރުގެ އެ މުއްދަތުގައި 791،368 ފަތުރުވެރިން ވަނީ އައިސްފަ އެވެ.

މިހާރު އެވްރެޖުކޮށް ދުވާލެއްގެ މައްޗަށް 6،775 ޓޫރިސްޓުން ރާއްޖެ ޒިޔާރަތްކުރާ ކަމަށް މިނިސްޓްރީން އާންމުކޮށްފައިވާ ހިސާބުތަކުން ދައްކަ އެވެ.

ޓޫރިސްޓުންގެ އަދަދު ދަށަށް ދިޔަ ބައެއް ގައުމުތައް - އެޕްރީލް 22 ގެ ނިޔަލަށް

އިނގިރޭސިވިލާތް - 2026: 70،288| 2025: 84،191 - 16.5 ޕަސެންޓް ދަށަށް
އިޓަލީ - 2026: 63،144 | 2025: 71،517 - 11.7 ޕަސެންޓް ދަށަށް
ޖަރުމަނު - 2026: 51،113 | 2025: 61،149 - 16.4 ޕަސެންޓް ދަށަށް
އިންޑިއާ - 2026: 33،593 | 2025: 39،534 - 15 ޕަސެންޓް ދަށަށް
ފްރާންސް - 2026: 25،131 | 2025: 30،424 - 17.3 ޕަސެންޓް ދަށަށް
އެމެރިކާ - 2026: 19،502| 2025: 25،219 - 22.6 ޕަސެންޓް ދަށަށް
ސްވިޓްޒަލޭންޑް - 2026: 18،010 | 2025: 18،907 - 4.7 ޕަސެންޓް ދަށަށް

ޓޫރިޒަމް މިނިސްޓްރީގެ ތަފާސްހިސާބުތަކަށް ބަލާއިރު ޖުމްލަ ފަތުރުވެރިންގެ 69.4 ޕަސެންޓް ޗުއްޓީ ހޭދަކުރީ ރިސޯޓުތަކުގަ އެވެ. އެއީ 516،255 ފަތުރުވެރިންނެވެ.

މެދުއިރުމަތީގެ ހަނގުރާމައިގެ ސަބަބުން އެ ސަރަހައްދުގެ ގިނަ އެއާލައިންތަކެއްގެ ދަތުރުތައް ވަނީ މަދުކޮށްފަ އެވެ. ބައެއް އެއާލައިންތަކުގެ ދަތުރުތައް ހުއްޓާލާފައި އޮތްއިރު، ޔޫރަޕާއި އެމެރިކާ ސަރަހައްދުގެ ގިނަ ގައުމުތަކުން ރާއްޖެ އަންނަ ފަތުރުވެރިންގެ ބޮޑު އިންސައްތައެއް އަންނަނީ މެދުއިރުމަތީގެ އެއާލައިންތަކުގަ އެވެ.

ސަރުކާރުގެ އަމާޒަކީ މި އަހަރު ނިމޭއިރު ރާއްޖެއަށް ޖުމްލަ 2.5 މިލިއަން ޓޫރިސްޓުން ގެނައުމެވެ. ހަނގުރާމައިގެ ސަބަބުން ފަތުރުވެރިކަމަށާއި ދުނިޔޭގެ ވައިގެ ދަތުރުފަތުރަށް ކުރިމަތިވެފައިވާ ގޮންޖެހުންތަކާ އެކު މި އަމާޒަށް ވާސިލްވެވިދާނެ ކަމާ މެދު މިހާރު އޮތީ ސުވާލު އުފެދިފަ އެވެ.