ބުލީކުރުން ކުށަކަށް ހަދަން ގާނޫނެއްގެ މަސައްކަތް ފަށަނީ

ހުނައިދާ ޔާސިރު

27 އޭޕްރީލް 2026 - 11:12

0 comments

ރާއްޖޭގައި ބުލީ ކުރުން ހުއްޓުވުމުގެ ގޮތުން، އެންޓި ބުލިޔިން ގާނޫނެއް ހަދައި، ސްކޫލުތަކާއި ތައުލީމު ދޭ އެހެނިހެން ތަންތަނުގައި ކިޔަވާ ދަރިވަރުންނަށްވެސް ފިޔަވަޅު އެޅޭ ގޮތް ހެދުމުގެ މަސައްކަތް ކުރަމުން އަންނަ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

މިދިޔަ ހަފުތާގައި ދަނާލުގައި 18 އަހަރުގެ އަންހެން ކުއްޖަކު މަރުވި މައްސަލައާ ބުލީއާ ގުޅޭ ކަމަށް އަޑު ފެތުރިފައި ވާއިރު އެ މަރަށް ފަހު ބުލީގެ އެކި މައްސަލަތަކުގެ ވާހަކަ އެތައް ބަޔަކު ދައްކާފައިވެ އެވެ.

ކޮންމެ ހޯމަ ދުވަހަކު ރައީސް ބާއްވަވާ ނޫސްވެރިންގެ ބައްދަލުވުން އެ މަނިކުފާނު ފެއްޓެވީ ވެސް ރާއްޖެ އާއި މުޅި ދުނިޔޭގައި ބުލީގެ މައްސަލަ ބޮޑުކަމާއި އެކަމާ ދެކޮޅަށް ފިޔަވަޅުތައް އަޅަންޖެހިފައިވާކަން ފާހަގަކުރައްވަމުންނެވެ.

ރައީސް ވިދާޅުވީ ބުލީ ކުރުމަކީ "ޑީޕް ރޫޓެޑް އިންޓަ ކަނެކްޓެޑް" ވަރަށް ބައިވަރު މައްސަލަތައް ހިމެނޭ މައްސަލައެއް ކަމަށެވެ.

"ސްކޫލްތަކާއި ތައުލީމު ދޭ މަރުކަޒުތަކުގައި ބުލީ ކުރުން ހުއްޓުވުމަށް ހާއްސަ ސިޔާސަތުތައް އެކުލަވައިލުމާއި، ބުލީ ކުރާ ކުދިންނާ ދޭތެރޭ ފިޔަވަޅު އެޅޭނެ ހާއްސަ ނިޒާމެއް އެކުލަވައިލުމާއި، ގަވާއިދުން މިކަމާ ގުޅޭ ގޮތުން ސެންޓްރަލް އެޖެންސީއެއްގައި ރިޕޯޓު ކުރެވޭ ގޮތާއި، ސްކޫލްތަކާ ތައުލީމު އުނގަންނައިދޭ ކޮންމެ މަރުކަޒެއްގެ ރަސްމީ މަންހަޖުގެ ތެރޭގައި މިކަމާ ގުޅޭ ކަންކަން ތަފްސީލުކޮށް ހިމެނިގެން ދިއުމާއި، ދެން މިފަދަ ތަފްސީލީ އިޖުރާއަތްތައް އިރާދަކުރެއްވިއްޔާ އަޅުގަނޑުމެން ގެންނާނަން،" ރައީސް ވިދާޅުވި އެވެ.

ރައީސް ވިދާޅުވީ ބުލީ ކުރުމާއި ފުރައްސާރަ ކުރުން ހުއްޓުވުމާއި، އެކަމަށް އަވަސް މިނެއްގައި ފިޔަވަޅު އެޅޭނެ އިންސާނީ ވަސީލަތްތައްވެސް ހުރިހާ މަރުކަޒުތަކެއްގައި ގާއިމްކުރުމަށްޓަކައި ގާނޫނުގައި ތަފްސީލުތައް ބަޔާންކުރެވި އެކަން ކުރިއަށް ގެންދާނެ ކަމަށެވެ.

"މި މަސައްކަތް މި ފެށީ އަޅުގަނޑު ހިތުން މި ގައުމުގަ އެބަޖެހޭ މިހާރު މި މައްސަލައަށް ވަށައިޖެހޭ ފުރިހަމަ ހައްލެއް ގެންނަން، އެ މަސައްކަތް ކުރަން. އެހެންވީމަ އެކަމުގައި ހުރިހާ ފަރާތްތަކެއްގެ އެއްބާރުލުން އަޅުގަނޑު ވަރަށް ބޮޑަށް ބޭނުން، ސަރުކާރުން ވަރަށް ބޮޑަށް ބޭނުން. މީ ހަމައެކަނި އެންމެ ބައެއްގެ ކަމަކަށް ވެގެން ނުވާނެ، މީ މުޅި މުޖުތަމައުގެ ކަމެއް،" ރައީސް ވިދާޅުވި އެވެ.

އާ ގާނޫނު އެކުލަވާލާނީ ފަންނަނީ މާހިރުންގެ ލަފަޔާއި އަދި ދުނިޔޭގެ ތަޖުރިބާ ހުރި ގައުމުތަކުގައި މިފަދަ ކަންކަން ކުރާ ގޮތަށް ކަމަށްވެސް ރައީސް ވިދާޅުވި އެވެ.

ރާއްޖޭގައި މި ފަހުން ބުލީގެ މައްސަލަތައް އިތުރުވެ، ފުރާނަ ދުއްވައިލުމުގެ ހާދިސާތައް ވެސް ހިނގަމުންދާ އިރު، ހޯމް މިނިސްޓަފު އަލީ އިހްސާން ވެސް މިދިޔަ ހަފުތާގައި ވިދާޅުވީ ބުލީ ކުރިން ޖިނާއީ ކުށަކަށް ހަދައި، އެކަމަށް ހާއްސަ ގާނޫނެއް އެކުލަވާލުމަށްޓަކައި އެޓާނީ ޖެނެރަލް އޮފީހާ އެކު މަސައްކަތްތަކެއް ކުރެވެމުން އަންނަ ކަމަށެވެ.