ފަހަތުން އަރައި މޮޅުވެ އާޖެންޓީނާ ކުއާޓާ ފައިނަލަށް ދަތުރުކޮށްފި

ޔޫނުސް އިބްރާހިމް

07 ޖުލައި 2026 - 23:44

0 comments

ދެ ގޯލު ފަހަތުން އަރައި 3-2 އިން މިސްރު ބަލިކޮށް ފީފާ ވޯލްޑް ކަޕްގެ އެންމެ ފަހުގެ ޗެމްޕިއަން، އާޖެންޓީނާ އިން މި ފަަހަރުގެ މުބާރާތުގެ ކުއާޓާ ފައިނަލަށް ދަތުރުކޮށްފި އެވެ.

މިސްރުން މިރޭގެ މެޗުގެ 14 ވަނަ މިނިޓްގައި ވަނީ ލީޑުނަގައިފަ އެވެ. އެ ގޮތުން، މިސްރުގެ މަރްވާން އަޓިއާ ނެގި ހުރަހަކުން މި ލަނޑު ޖެހީ ޔާސީން އިބްރާހިމް އެވެ. މެޗުގެ 21 ވަނަ މިނިޓްގައި އާޖެންޓީނާ އަށް އެއްވަރުކޮށްދޭން ލިއޮނަލް މެސީ އަށް ލިބުނު ޕެނަލްޓީ އަކުން ފޮނުވާލި ބޯޅަ މިސްރުގެ ކީޕަރު، މުސްތަފާ ޝުބޭރު ވަނީ މަަތަކޮށްފަ އެވެ.

އޭގެ ފަހުން، ފުރަަތަމަ ހާފުގައި އާޖެންޓީނާ އިން ނަތީޖާ ހަމަހަމަކުރަން ކުރި މަސައްކަތުގައި ހޫލިއަން އަލްވަރޭޒް އޭރިއާތެރެއިން ޖެހި ޝޮޓާއި، އަލެކްސިސް މެކް އަލިސްޓާ ބޮލުން ފޮނުވާލި ބޯޅަ ކީޕަރު ޝުބޭރު ވަނީ މަތަކޮށްފަ އެވެ.

ދެވަނަ ހާފްގައި އާޖެންޓީނާ އިން ކުރިއަށް ޖެހިލައިގެން މިސްރުގެ ގޯލަށް ނުރައްކާ ކުރަން މަސައްކަތް ކުރަމުންދިޔައިރު، މިސްރުން ދިޔައީ ކައުންޓަ އެޓޭކުތަކުގައި ނުރައްކާ ކުރަމުންނެވެ. އެގޮތުން މެޗުގެ 60 ވަނަ މިނެޓްގައި މިސްރުން ގޯލެއް ކާމިޔާބުކުރި ނަމަވެސް އެ ގޯލު ޖެހުމުގެ ކުރިން މިސްރުގެ ކުޅުންތެރިއަކު އާޖެންޓީނާގެ ޑިފެންޑަރު ލިސަންޑްރޯ މާޓިނޭޒަށް ފައުލްކޮށްފައިވާތީ ވީއޭއާރް ބެލުމަށްފަހު ރެފްރީ ވަނީ އެ ގޯލު ކެންސަލްކޮށްފަ އެވެ.

އެ ގޯލު ކެންސަލް ކުރި ނަމަވެސް މެޗުގެ 67 ވަނަ މިނެޓްގައި އުފެއްދި ކައުންޓަ އެޓޭކެއްގައި މޮސްތަފާ ޒިކޯ ވަނީ މިސްރުގެ ދެވަނަ ގޯލު ކާމިޔާބުކޮށްދީ ކުއާޓާއާ ގާތަށް އެޓީމު ގެންގޮސްދީފަ އެވެ. މި ގޯލާއެކު އާޖެންޓީނާ އިން ބަދަލުތަކެއް ގެނެސްގެން ދިޔައީ ފުލުފުލުގައި ފުރުސަތުތައް ތަނަވަސްކުރަން މަސައްކަތް ކުރަމުންނެވެ. އެގޮތުން މިސްރުގެ އޭރިއާ ތެރެއަށް މެސީ ނަގައިދިން ހުރަހަކަށް އަރައި، ބޮލުން ފޮނުވާލި ހަމަލާއަކުން އާޖެންޓީނާގެ ފުރަތަމަ ގޯލު މެޗުގެ 79 ވަނަ މިނެޓްގައި ކާމިޔާބުކޮށްދީ އެޓީމުގެ ޑިފެންޑަރު ކްރިސްޓިއަން ރޮމޭރޯ އެވެ.

އަދި އޭގެ ހަތަރު މިނެޓް ފަހުން މިސްރުގެ އޭރިއާ ތެރޭ ހުރެ ފޮނުވާލި ބާރު ހަމަލާއެއް ގޯލުގެ މަތީ ކަނަށް އަމާޒުކޮށްލައިގެން މެސީ ވަނީ އާޖެންޓީނާ އަށް ނަތީޖާ އެއްވަރުކޮށްދީފަ އެވެ. މިއީ މި ވޯލްޑް ކަޕްގައި މެސީ ޖެހި އަށްވަނަ ގޯލެވެ.

މެޗުގެ ފުރިހަމަ ވަގުތު ހަމަވެގެން ދެއްކި އިތުރު ވަގުތުގެ 11 މިނެޓްގެތެރެއިން، ދެވަނަ ވަނަ މިނެޓުގައި އާޖެންޓީނާ އިން މެޗުން މޮޅުވި ގޯލު ޖެހި އެވެ. މިސްރުގެ ވަރުބަލިވެފައި އޮތް ޑިފެންސްގެ ފައިދާ ނަގައި، މެޗު ނިމުމުގެ ކުޑަކޮށް ކުރިން އާޖެންޓީނާއަށް މި މެޗު 3-2 އިން ކާމިޔާބުކޮށްދިނީ އެންޒޯ ފެނާންޑޭޒް އެވެ.

މިފަހަރުގެ ވޯލްޑް ކަޕަކީ މިސްރުގެ ފުޓުބޯޅަ ތާރީޚުގައިވެސް އެންމެ ކާމިޔާބު މުބާރާތެވެ. ގްރޫޕް ސްޓޭޖުގައި ބެލްޖިއަމް އަދި އީރާނާ އެއްވަރުވެ، ނިއުޒީލޭންޑް އަތުން ހޯދި މޮޅާއެކު އެޓީމު ވަނީ ތާރީޚީ ގޮތުން ފުރަތަމަ ފަހަރަށް ގަދަ 16 އަށް ދަތުރުކޮށްފައެވެ.

މީގެ އިތުރުން ގަދަ 32 ގެ ބުރުގައި އޮސްޓްރޭލިއާ އަތުން ޕެނަލްޓީ ޖަހައިގެން މޮޅުވެ، މުހައްމަދު ސަލާހު ލީޑުކުރި މިސްރުން ވަނީ ދުނިޔޭގެ ޗެމްޕިއަނުންނާ ދެކޮޅަށް ނުކުމެ ތާރީޚީ ކުޅުމެއް ދައްކާފައެވެ.

ކުއާޓާގައި އާޖެންޓީނާ ބައްދަލުކުރާނީ ގަދަ 16 ގައި މިރޭ ކޮލަމްބިއާ އާއި ސްވިޒަލޭންޑް ބައްދަލުކުރާ މެޗުން މޮޅުވާ ޓީމަކާ އެވެ.