ޗައިނާއިން ކުޅިވަރު ސާމާނު ހަދިޔާކޮށްފި

ހުނައިދާ ޔާސިރު

09 ޖުލައި 2026 - 10:27

0 comments

ޗައިނާގެ ޔުނާން ޕްރޮވިންސުން ދިވެހިރާއްޖެއަށް ގިނަ އަދަދެއްގެ ކުޅިވަރު ސާމާނު އިއްޔެ ހަދިޔާކޮށްފި އެވެ.

މި ތަކެތި ހަވާލު ކުރުމުގެ އެއްބަސްވުމުގައި ސޮއިކުރުން އޮތީ ޔޫތު ހަބްގައި ބޭއްވި ރަސްމިއްޔާތެއްގަ އެވެ.

އެއްބަސްވުމުގައި ދިވެހި ސަރުކާރުގެ ފަރާތުން ސޮއި ކުރެއްވީ ޔޫތު މިނިސްޓަރު އަބްދުﷲ ރާފިއު އެވެ. ޗައިނާ ސަރުކާރުގެ ފަރާތުން ސޮއި ކުރެއްވީ ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ކޮންގް ޝިއަންހުއާ އެވެ.

މި ރަސްމިއްޔާތުގައި ޔޫތު މިނިސްޓަރުގެ އިތުރުން ފޮރިން މިނިސްޓަރު އިރުތިޝާމް އާދަމް ވެސް ބައިވެރިވެވަޑައިގެންނެވި އެވެ.

ޔުނާން ޕްރޮވިންސުން ހަދިޔާކުރި މި ސާމާނުތަކުގެ ތެރޭގައި ޒުވާނުންގެ މެދުގައި ބޮޑު މަގުބޫލުކަމެއް އޮންނަ ފުޓްބޯޅަ، ބާސްކެޓްބޯޅަ އަދި ބެޑްމިންޓަން ރެކެޓް ފަދަ ކުޅިވަރުތަކަށް ބޭނުންވާ ސާމާނު ހިމެނެ އެވެ.

ޗައިނާ ސަފީރު ވިދާޅުވި ގޮތުގައި މި އެހީއަކީ ދެ ޤައުމުގެ ދެމެދުގައި އޮތް ގާތް ގުޅުމުގެ ރަމްޒެކެވެ. އަދި މިއީ ފާއިތުވި އެއް އަހަރު ތެރޭގައި ޔުނާން ޕްރޮވިންސުން ރާއްޖެއަށް އެހީތެރިކަން ފޯރުކޮށްދިން ދެވަނަ ފަހަރުކަންވެސް ސަފީރު ފާހަގަކުރެއްވި އެވެ.

މީގެ ކުރިންވެސް އެކި ފަހަރުމަތިން ޗައިނާ ސަރުކާރުން ވަނީ ކުޅިވަރުކުޅޭ އެކި ސާމާނު ދިވެހި ސަރުކާރަށް ހަދިޔާކުރައްވާފަ އެވެ.