ޗުއްޓީއަށްފަހު ދެވަނަ ޓާމުގެ ކިޔެވުން ފަށައިފި

ހުސެން ރަޝީދު

02 އޯގަސްޓް 2026 - 09:45

0 comments

ސްކޫލަށް ދަރިވަރުންތަކެއް ވަންނަނީ - ފޮޓޯ: މިހާރު

ފުރަތަމަ ޓާމުގެ ސްކޫލް ޗުއްޓީއަށްފަހު ދެވަނަ ޓާމުގެ ކިޔެވުން މިއަދު ފަށައިފިއެވެ.

ފުރަތަމަ ޓާމުގެ ކިޔެވުން ނިންމާ ދަރިވަރުން ޗުއްޓީއަށް ގޮސްފައިވަނީ މިދިޔަ މަހުގެ 16ވަނަ ދުވަހުއެވެ. އެހެންކަމުން ދެވަނަ ޓާމުގެ ކިޔެވުން މިއަދު ފަށާފައިވަނީ 16 ދުވަހުގެ ޗުއްޓީފަ އެވެ. މިއަދު ފެށުނު ދެވަނަ ޓާމުގެ ކިޔެވުން މިއަހަރުގެ ޑިސެންބަރު މަހުގެ 17 ވަނަ ދުވަހުގެ ނިޔަލަށް ކުރިއަށްދާނެ އެވެ.

މި ދިރާސީ އަހަރު ރާއްޖޭގެ ސަރުކާރުގެ 218 ސްކޫލެއްގައި 77,000 އަށްވުރެ ގިނަ ދަރިވަރުން ތައުލީމު ހާސިލުކުރަމުންދެއެވެ. މީގެ ތެރޭގައި އަލަށް ގްރޭޑް 1 އަށް ވަން 4,790 ދަރިވަރުން ހިމެނެއެވެ. އޭގެ ތެރެއިން މާލެ ސަރަހައްދުގެ ސްކޫލްތަކުން 1,748 ދަރިވަރުންނަށް ޖާގަ ދީފައިވާއިރު، އަތޮޅުތެރޭގެ ސްކޫލްތަކުން 3,042 ދަރިވަރުން ގްރޭޑް 1 އާ އަލަށް ގުޅިފައިވެއެވެ.

ދަރިވަރުންނަށް މި އަހަރުގެ ބޮޑު ޗުއްޓީ ލިބޭނީ ޑިސެންބަރު 18 އިން ފެށިގެން އަންނަ އަހަރުގެ ޖަނަވަރީ 16 އާ ހަމައަށެވެ. އެއީ ޖުމްލަ 30 ދުވަހުގެ ޗުއްޓީއެކެވެ.

ދަރިވަރުންގެ ބޮޑު ޗުއްޓީއަށްފަހު، އަންނަ އަހަރުގެ ދިރާސީ އައު އަހަރުގެ ކިޔެވުން ފަށާނީ ޖަނަވަރީ 17ގައެވެ.