ކަޕް ވިނާސް ކަޕް ފުޓްބޯޅަ މުބާރާތް: ނިއު ރޭޑިއަންޓަށް ރަނގަޅު ފެށުމެއް

އަބްދުﷲ މައުރޫފް

03 އޯގަސްޓް 2026 - 19:21

0 comments

ބުރު ސްޕޯޓްސް ކްލަބް ދެކޮޅަށް މިއަދު ނިއުގެ ކުޅުނު މެޗްގެ ތެރެއިން - ފޮޓޯ: އެފްއޭއެމް

އަށާރަ އަހަރުގެ މެދުކެނޑުމަކަށް ފަހު، ކަޕް ވިނާސް ކަޕް ފުޓްބޯޅަ މުބާރާތް ބާއްވާއިރު، މި ފަަހަރުގެ މުބާރާތުގައި ކުޅުނު ފުރަތަމަ މެޗުން ނިއު ރޭޑިއަންޓް ސްޕޯޓްސް ކްލަބުން 5-0 އިން ބުރު ސްޕޯޓްސް ކްލަބް ބަލިކޮށްފަ އެވެ.

މިއަދު ހަވީރު ކުޅުނު މެޗު ފަށައިގެން 20 ސިކުންތުގެ ތެރޭގައި ނިއު ރޭޑިއަންޓުން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ ބްރެޒިލްގެ ފޯވާޑް ޑޮރިއެލްޓަން ގޯމޭޒް ނަޝިމެންޓޯ (ޑޯރީ) އެވެ. އޭގެ ފަހުން ފުރަތަމަ ހާފުގައި ލަނޑެއް ނުފެނުނު ނަމަވެސް، ދެވަނަ ހާފުގައި ޑޯރީ ވަނީ އިތުރު ލަނޑެއް ޖަހާފައެވެ. މި ލަނޑު އޭނާ ކާމިޔާބުކުރީ މެޗުގެ 60 ވަނަ މިނެޓުގަ އެވެ.

އަދި އޭގެ ތިން މިނެޓު ފަހުން ޑޯރީ ވަނީ މި މެޗުގައި ހެޓްރިކެއް ހަދާފައެވެ. މި މެޗުގައި ޑޯރީ ހެޓްރިކެއް ހެދިއިރު، މިއީ އެ ޓީމާ އަލަށް ގުޅުނު އިތުބާރު ފޯވާޑް ނިއު ރޭޑިއަންޓުގެ ޖާޒީގައި ކުޅުނު ދެ މެޗުގައި ކާމިޔާބުކުރި ފަސްވަނަ ލަނޑެވެ. އެގޮތުން ސީޒަން ހުޅުވަން ކުޅުނު ޗެރިޓީ ޝީލްޑް މެޗުގައި އޭނާ ވަނީ ދެ ލަނޑު ޖަހާފައެވެ.

ނިއު ރޭޑިއަންޓުގެ ހަތަރުވަނަ ލަނޑު މެޗުގެ 68 ވަނަ މިނެޓުގައި ޖެހީ ބަދަލަކަށް ކުޅެން އެރި އަލީ ފާސިރު (ސެންޓޭ) އެވެ.

މެޗުގައި ނިއުގެ ފަހު ލަނޑު ޖެހީ، އަބްދުﷲ ބިލިޓީ އެވެ. ލައިބީރިއާގެ ޓީމަށް ކުޅެފައިވާ ބިލިޓީ އަށް ލިބުނު ފުރުސަތުގައި ވަނީ ތިރިތިރިން ގޯލަށް ބޯޅަ ވައްދާލައިފަ އެވެ.

ރާއްޖޭގެ ފުޓްބޯޅައިގައި ކުރިން ފޯރިގަދަކޮށް ކުރިއަށްގެންދިޔަ އެއް މުބާރާތް ކަމަށްވާ ކަޕް ވިނާސް ކަޕް، އެންމެ ފުރަތަމަ ބޭއްވީ މީގެ 31 އަހަރު ކުރިން، 1995 ވަނަ އަހަރު އެވެ. ކަޕް ވިނާސް ކަޕްގެ 11 މުބާރާތް ބޭއްވުމަށް ފަހު، 2009 އިން ފެށިގެން އެ މުބާރާތް ކުޅެފައިނުވެ އެވެ. އެންމެ ފަހުން، 2008 ވަނަ އަހަރު ބޭއްވި ކަޕް ވިނާސް ކަޕްގެ ޗެމްޕިއަންކަން ހޯދި ނިއު ރޭޑިއަަންޓް ސްޕޯޓްސް ކްލަބުންނެވެ.

ކަޕް ވިނާސް ކަޕުގައި މިރޭ ކުޅޭ މެޗުގައި ބައްދަލުކުރާނީ މާޒިޔާ އާއި އޮޑި ސްޕޯޓްސްއެވެ. މި މަހުގެ 18 ވަނަ ދުވަހުގެ ރެއަށް ތާވަލުކޮށްފައިވާ މި މުބާރާތުގެ ފައިނަލަށް ދަތުރުކުރާނީ، ލީގު ބުރުގެ އެންމެ ކުރީގައި އޮންނަ ދެ ޓީމެވެ.