ކަޕް ވިނާސް ކަޕް ފުޓްބޯޅަ މުބާރާތް: އޮޑި ބަލިކޮށް، މާޒިޔާގެ ފެށުން ރަނގަޅު

އިސްމާއިލް ރިޒާ

04 އޯގަސްޓް 2026 - 09:46

0 comments

އޮޑި ސްޕޯޓްސްގެ މައްޗަށް 2-1 ގެ ނަތީޖާއަކުން މޮޅުވެ. ކަޕް ވިނާސް ކަޕްގައި މާޒިޔާއިން މޮޅަކުން ރޭ ފަށައިފި އެވެ.

މާޒިޔާއިން މެޗުގެ 18 ވަނަ މިނެޓުގައި ލީޑު ނެގި އިރު، އެ ގޯލަކީ އަހުމަދު އައިހަމް (ފަތޯ) ތިރިތިރިން ދުއްވާލި ޕާހަކުން ނައްސާހް އިބްރާހީމް ނާސިރް ފައިން ޖައްސާ ގޯލަށް ވައްދާލައިގެން ޖެހި ގޯލެކެވެ. އޭގެ 10 މިނެޓް ފަހުން އޮޑިން ނަތީޖާ ހަމަހަމަ ކުރިއެވެ. އަރިމަތިން އަހްޒަމް ރަޝީދު (އަހު) ނަގައިދިން ހުރަސް ބޮލުން ގޯލަށް ވައްދާލީ މުޒްދާނެވެ.

ދެވަނަ ހާފުގެ ކުރީކޮޅުގައި އިލާންގެ ހަމަލާއެއް ދަނޑިއަށް އަމާޒުވި އިރު، ފަތޯ ދުރުން ފޮނުވާލި ހަމަލާ މަތަކުރީ އޮޑީގެ ކީޕަރު މުހައްމަދު އަޝްވާނެވެ. އެ ނުރައްކަލުގެ ތެރެއިން މާޒިޔާ މެޗުން މޮޅުވި ގޯލް، 78 ވަނަ މިނެޓުގައި ޖަހައިދިނީ ފަތޯއެވެ. އެއީ އޭރިއާ ބޭރުން ލިބުނު ބޯޅަ، ގޯލްގެ ތިރީ ކަނަށް އަމާޒުކޮށްލައިގެން އޭނާ ޖެހި ގޯލެކެވެ.

ދިވެހި ފްރިމިއާ ލީގުގެ ފަހު ޗެމްޕިއަން މާޒިޔާއިން މި ފަހަރު ސީޒަނަށް ނުކުތީ ނިސްވަތުން ޒުވާން ސްކޮޑަކާ އެކު އެވެ.

ކަޕް ވިނާސް ކަޕް މެޗުތައް ދެން އޮންނާނީ ބުރާސްފަތި ދުވަހުއެވެ. އެ ދުވަހު ހަވީރު މާޒިޔާއިން ބުރާ ދެކޮޅަށް ނުކުންނަ އިރު، އެ ރޭ ނިއު ރޭޑިއަންޓް ނުކުންނާނީ އޮޑިއާ ދެކޮޅަށެވެ.

ރާއްޖޭގެ ފުޓްބޯޅައިގައި ކުރިން ފޯރިގަދަކޮށް ކުރިއަށްގެންދިޔަ އެއް މުބާރާތް ކަމަށްވާ ކަޕް ވިނާސް ކަޕް، އެންމެ ފުރަތަމަ ބޭއްވީ މީގެ 31 އަހަރު ކުރިން، 1995 ވަނަ އަހަރު އެވެ. ކަޕް ވިނާސް ކަޕްގެ 11 މުބާރާތް ބޭއްވުމަށް ފަހު، 2009 އިން ފެށިގެން އެ މުބާރާތް ކުޅެފައިނުވެ އެވެ. އެންމެ ފަހުން، 2008 ވަނަ އަހަރު ބޭއްވި ކަޕް ވިނާސް ކަޕްގެ ޗެމްޕިއަންކަން ހޯދި ނިއު ރޭޑިއަަންޓް ސްޕޯޓްސް ކްލަބުންނެވެ.