ޔާމީން ވިދާޅުވީ ބޮޑު ބަދަލަށް ތާއީދުނުކުރައްވާ ކަމަށް

ޔާމީން ވިދާޅުވީ "ބޮޑު ބަދަލަށް" ތާއީދުނުކުރައްވާ ކަމަށް!

ހުނައިދާ ޔާސިރު

08 އޯގަސްޓް 2026 - 13:17

0 comments

އިދިކޮޅު އެމްޑީޕީން ވެރިކަމުގެ ނިޒާމަށް ގެންނަން އުޅޭ "ބޮޑު ބަދަލަށް" ތާއީދުނުކުރައްވާ ކަމަށް ކުރީގެ ރައީސް އަބްދުﷲ ޔާމީން މިރޭ ވިދާޅުވެއްޖެ އެވެ.

ސަންގު ޓީވީއަށް ދެއްވި އިންޓަވިއެއްގައި ޔާމީން ވިދާޅުވީ ވެރިކަން ހިންގުމުގެ އެންމެ އިސް ބާރު އޮންނަންވާނީ އެކެއްގެ އަތްމަތީގައި ކަމަށެވެ. ބޮޑުވަޒީރަކާއި ރައީސަކު ތިބެގެން ބާރުތައް ބަހާލައިގެން ވެރިކަން ކުރުމަކީ ރާއްޖެ ފަދަ ގައުމަކަށް އެންމެ އެކަށީގެންވާ ގޮތް ނޫން ކަމަށާއި އެއީ ހަރުދަނާ ނިޒާމެއް ނޫން ކަމަށް އެ މަނިކުފާނު ސިފަކުރެއްވި އެވެ.

"އެއީ ވޯކުކުރާނެ ނިޒާމެއް ނޫން. ބޮޑުވަޒީރަކު ހުންނަންޏާ ރައީސްއަކު ހުންނާކަށް ނުޖެހޭ. ރައީސްއަކު ހުންނަންޏާ ބޮޑުވަޒީރަކު ހުންނާކަށް ނުޖެހޭ. އެއީ އެގްޒެކެޓިވް ބާރަކީ އެެކެއްގެ އަތުގައި އޮންނަ ބާރު. އެހެންވީމާ ދެ މީހެއްގެ އަތުގައި އޮންނާކަށް ނުޖެހޭ. ދެން އަޅުގަނޑެއް ގަބޫލެއް ނުކުރަން ރާއްޖެ ތައްޔާރު ކަމަކަށް ބަރުލަމާނީ ނިޒާމަކަށް،" ޔާމީން ވިދާޅުވި އެވެ.

ކުރިން ބަރުލަމާނީ ނިޒާމަކަށް ތާއީދުކުރެއްވި ނަމަވެސް މިހާރު ތާއީދުނުކުރައްވާ ސަބަބު ވެސް ޔާމީން ވިދާޅުވެދެއްވި އެވެ. އެގޮތުން ވިދާޅުވީ:

ރައްޔިތުންގެ މަޖިލިސް ތެރެއަށް ފައިސާގެ ނުފޫޒު ވަންނަވަރު މަޖިލިސް މެމްބަރެއްގެ ގޮތުގައި ހުންނެވިއިރު ފެނުނު؛ ބަރުލަމާނީ ނިޒާމަށް ތާއީދުކުރުން ހުއްޓާލީ އެހެންވެ
ރައްޔިތުންގެ މަޖިލީކީ "ސޭލް އަޅުވާފައި" އޮންނަ ތަނެއް
ރައްޔިތުންގެ މަޖިލީސް މިހާރު އޮތް ހާލަތަށް ބަލާއިރު ވެސް އެތަން އޮތީ، ގައުމުގެ ބޮޑެތި މައްސަލަތައް ހިފަހައްޓައިދެވޭ ފަދަ ގޮތަކަށް ކަމަކަށް ގަބޫލެއްނުކުރެވޭ
ގައުމުގެ މަސްލަހަތާއި ބޮޑެތި ނިންމުންތަކަކީ ސޭލް އަޅުވާފައި އޮންނަ އެއްޗަކަށްވާ ނަމަ އެއީ މަސްލަހަތު އޮތް ގޮތެއް ނޫން

ޔާމީން ވިދާޅުވިގޮތުން ގާނޫނުއަސާސީއަށް ބަދަލުތަކެއް ގެންނަންޖެހޭ ނަމަ، 'ވާނުވާ' ބަންދު ފަދަ، ރައްޔިތުންގެ ހައްގުތަކަށް އަރައިގަނެވޭ ފަދަ ކަންކަމަށް ބަދަލު ގެނައުމަކުން މައްސަލައެއްނެތެވެ. އެކަމަކު ވެރިކަމުގެ ނިޒާމާ ގުޅޭ އެއްވެސް ބަދަލަކަށް ތާއީދުނުކުރައްވާ ކަމަށް ޔާމީން ވިދާޅުވި އެެވެ.

'ބޮޑު ބަދަލު'ގެ ޕްރެޒެންޓޭޝަންގައި، ވެރިކަމުގެ ނިޒާމަށް ގެންނަން ބޭނުންވާ ބަދަލުތަކުގެ އިތުރުން ދެން އެ ހުށަހެޅުމުގައި ހުރި ފާހަގަކޮށްލެވޭ ކަންކަމަކީ:

މަޖިލީހުގެ އަދަދު ވަކިވަރެއްގައި ހިފެހެއްޓުން
މަޖިލިސް އެކުލެވިގެންވާ ގޮތަށް ބަދަލު ގެނައުން
ދާއިރާގެ މަސްލަހަތުގެ ބަދަލުގައި ގައުމީ މަސްލަހަތަށް ވަކާލާތުކުރާނެ ގައުމީ މެމްބަރުންނަށް ފުުރުސަތު ދިނުން
މެމްބަރުންގެ ރިކޯލު ވޯޓެއްގެ ނިޒާމު ގާއިމުކުރުން
އަންހެނުންނަށް މަޖިލީހަށް އާދެވޭނެ އިތުރު ގޮތްތައް ހޯދުން
ގާނޫނުއަސާސީ ތަފްސީލުކުރުން
ސުޕްރީމް ކޯޓުގެ ފަނޑިޔާރުން ވަކިކުރަން ރައްޔިތުންގެ އާންމު ވޯޓެއް ނަގަން ޖެހޭގޮތަށް ބަދަލުކުރުން
މިނިވަން މުވައްސަސާތައް ޒިންމާދާރުކުރުވަން އޯވަސައިޓް ކޮމިޝަނެއް އުފެއްދުން
އޯވަސައިޓް ކޮމިޝަނުގެ މެމްބަރުން މަޖިލީހުން އައްޔަންކުރާގޮތް ހެދުން
އެ ކޮމިޝަނުގެ މެމްބަރުން ރައްޔިތުންގެ ވޯޓުން ވަކިކުރެވޭގޮތަށް ބަދަލުކުރުން
ކައުންސިލަރުންނާއި މަޖިލިސް މެމްބަރުން ހިމެނޭގޮތަށް ނޫނީ ގާނޫނުއަސާސީއަށް ބައެއް ބަދަލުތައް ނުގެނެވޭގޮތް ހެދުން

ދެން ގެންނަން ހުށަހަޅާފައިވާ ބަދަލުތަކަކީ، ރައްޔިތުންގެ ބައިވެރިވުން އިތުރުކުރުމަށް ހުށަހަޅާ ބަދަލުތަކެކެވެ. އޭގެތެރޭގައި، ހިޔާލު ހޯދުމުގެ ވޯޓުތައް ގިނަކުރުމާއި، ދައުލަތުގެ އެންމެ މަތީވެރިޔާ ވަކިކުރެވޭނީ ރައްޔިތުންގެ ވޯޓުން ކަމަށް ހެދުމާއި މަޖިލިސް މެމްބަރުންގެ ވޯޓުން އެކަނި މިހާރު ނިންމޭ ބައެއް ކަންކަމުގައި ކައުންސިލަރުންގެ ހިއްސާބޮޑުކުރުން ވެސް ހިމެނެ އެވެ.