އެމްޑީޕީގެ ޕްރައިމަރީ ކާމިޔާބުކުރާނަން: ފައްޔާޒު

އަބްދުﷲ މައުރޫފް

13 އޯގަސްޓް 2026 - 12:39

0 comments

ދެހާސް އަށާވީސް ވަނަ އަހަރު ބާއްވާ ރިޔާސީ އިންތިހާބުގައި އެމްޑީޕީގެ ފަރާތުން ވާދަކުރާނެ ކެންޑިޑޭޓަކު ކަނޑައެޅުމަށް ބާއްވާ ރިޔާސީ ޕްރައިމަރީ ކާމިޔާބު ކުރައްވާނެ ކަމަށް ކުރީގެ އިކޮނޮމިކް މިނިސްޓަރު ފައްޔާޒު އިސްމާއިލް ވިދާޅުވެއްޖެ އެވެ.

ފައްޔާޒު މިހެން ވިދާޅުވީ އަމިއްލަ ޓީވީ ޗެނަލެއް ކަމަށްވާ "އަސްލު" ޓީޥީގައި ރޭ ވާހަކަދައްކަވަމުންނެވެ.

އެމްޑީޕީގެ ރިޔާސީ ޕްރައިމަރީގައި ވާދަކުރައްވާނެ ކަމަށް ފައްޔާޒު ފިޔަވާ އެއްވެސް ބޭފުޅަކު އަދި މިހާތަނަށް އިއުލާންކުރައްވާފައެއް ނުވެ އެވެ. އެކަމަކު ކުރީގެ ނައިބް ރައީސް ފައިސަލް ނަސީމު ވަނީ އެމްޑީޕީގެ ރިޔާސީ ޕްރައިމަރީގައި ވާދަކުރެއްވުމަށް ޝައުގުވެރިވެވަޑައިގަންނަވާ ކަމުގެ އިޝާރާތެއް ކުރައްވާފަ އެވެ. އަދި ކުރީގެ ފޮރިން މިނިސްޓަރު އަބްދުﷲ ޝާހިދުވެސް އެމްޑީޕީގެ ރިޔާސީ ޕްރައިމަރީގައި ވާދަކުރައްވާނެ ކަމަށް އޭނާގެ އަރިސް ބޭފުޅުން ވިދާޅުވެ އެވެ.

ފައްޔާޒު ވިދާޅުވީ އޭނާ ހެޔޮހާލުގައި ހުންނަވައިފިނަމަ ކުރިއަށް އޮތް އެމްޑީޕީގެ ރިޔާސީ ޕްރައިމަރީގައި ވާދަކުރައްވާނެ ކަމަށެވެ. އަދި ޕްރައިމަރީ ކާމިޔާބު ކުރައްވާނެ ކަމަށްވެސް ވަރަށް ޔަގީންކަމާއެކު ފައްޔާޒު ވިދާޅުވި އެވެ.

"އިރާދަފުޅުކުރެއްވިއްޔާ ކާމިޔާބުވެސް ކުރާނަން،" ފައްޔާޒު ވިދާޅުވި އެވެ.