ދަރަވަންދޫ އެއާޕޯޓުގެ ޓާމިނަލް ބޮޑުކޮށްދޭނެ ބަޔަކު ހޯދަނީ

އަބްދުﷲ މައުރޫފް

13 އޯގަސްޓް 2026 - 12:35

0 comments

ބ. ދަރަވަންދޫ އެއާޕޯޓުގެ ޓާމިނަލް ތަރައްގީކުރުމަށް ޝައުގުވެރިވާ ބަޔަކު ހޯދަން އަނެއްކާވެސް އިއުލާންކޮށްފިއެވެ.

އެ އިއުލާނުގައި ބުނެފައި ވަނީ، ބަލައިގަނެވޭނީ އެ މުއްދަތުގައި ޝައުގުވެރިކަން ފާޅުކުރި ފަރާތްތަކުގެ ޕްރޮޕޯސަލް އެކަނި ކަމަށެވެ. ޕްރޮޕޯސަން ހުށަހެޅުމުގެ ސުންގަޑިއަކީ އަންނަ މަހުގެ 10 ވަނަ ދުވަހެވެ.

ދަރަވަންދޫ އެއާޕޯޓަކީ މީގެ 14 އަހަރު ކުރިން، 2012 ވަނަ އަހަރު ހުޅުވި އެއާޕޯޓެކެވެ. އެ އެއާޕޯޓު އަޅާފައި ވަނީ ކޯސްޓްލައިން ހޮޓެލްސް އެންޑް ރިސޯޓްސްއިންނެވެ. އެ އަތޮޅަށް އަންނަ ފަތުރުވެރިންނާއި އަދި އެނޫންވެސް ގިނަ ބަޔަކު އެ އެއާޕޯޓް ބޭނުން ކުރެ އެވެ.

ދަރަވަންދޫ އެއާޕޯޓް އައިލޭންޑް އޭވިއޭޝަނާއި ހަވާލު ކުރުމަށް ނިންމަވާފައިވާކަން ރައީސް ޑރ. މުހައްމަދު މުއިއްޒު އިއުލާނު ކުރެއްވިއިރު، އެ އެއާޕޯޓުގެ ޕަސެންޖާ ޓާމިނަލް ބޮޑުކުރުގެ ޑިޒައިން ހެދުމަށާއި ކޮންސަލްޓެންސީ ސާވިސް ފޯރުކޮށްދިނުމަށް އައިލެންޑް އޭވިއޭޝަނުން ހަވާލުކުރީ އީޕޯޗް އެސޯސިއޭޓްސް ޕްރައިވެޓް ލިމިޓެޑާއެވެ.

ދަރަވަންދޫގެ އާ ޓާމިނަލް ތަރައްގީކުރުމުގެ މަޝްރޫއުގެ ދަށުން، މިހާރު ހުރި 959 އަކަމީޓަރުގެ ޓާމިނަލް 1،874 އަކަމީޓަރަށް ބޮޑުކުރާނެއެވެ. އެއާއެކު ހިދުމަތްދެވޭ ފަސިންޖަރުންގެ އަދަދު 80 އިން 175 އަށް އިތުރުވާނެއެވެ.