ދަރަނި ދެއްކުމަށްޓަކައި ޑިޕޮސިޓް ފައިސާ ބޭނުންކުރުމަށް ބީއެމްއެލްއަށް މަޖުބޫރުކުރި: ނަޝީދު

އަބްދުﷲ މައުރޫފް

21 ސެޕްޓެމްބަރ 2026 - 12:43

0 comments

ސަރުކާރުން ދަރަނި ދެއްކުމަށްޓަކައި ކަސްޓަމަރުންގެ ޑިޕޮސިޓް ފައިސާ ބޭނުންކުރުމަށް ބީއެމްއެލްއަށް މަޖުބޫރުކުރުވި ކަމަށް މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ޗެއާޕާސަން ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.

މިއަދު އެކްސްގައި ކުރެއްވި ޕޯސްޓެއްގައި ނަޝީދު ވިދާޅުވި ގޮތުގައި ދައުލަތުގެ ރިޒާވުގައި މިހާރު ބޭރު ފައިސާއެއް ނެތެވެ. އެފަދަ ހާލަތެއްގައި ރިޒާވު ހުރިއިރު މިވަގުތަށް ވެސް ރާއްޖެއަށް 50 މިލިއަން ޑޮލަރު ބޭނުންވާ ކަމަށް ނަޝީދު ވިދާޅުވި އެވެ.

"ސަރުކާރުން ވަނީ ދަރަނި ދެއްކުމަށްޓަކައި ކަސްޓަމަރުންގެ ޑިޕޮސިޓް ފައިސާ ބޭނުންކުރުމަށް ބީއެމްއެލްއަށް މަޖުބޫރުކުރުވާފައި. އަދި އޭގެ ނަތީޖާއެއްގެ ގޮތުން، ފައިސާ ދޫކުރުމަށް ބޭންކު ވަނީ ނުކުޅެދިފައި،" ނަޝީދު ވިދާޅުވި އެވެ.

ނަޝީދު މިހެން ވިދާޅުވިއިރު ކުރީގެ ރައީސް އިބްރާހިމް މުހައްމަދު ސޯލިހްގެ ވެރިކަމުގައި، 2019 ވަނަ އަހަރު ސްޓޭޓް ބޭންކް އޮފް އިންޑިއާއިން ނެގި 150 މިލިއަން ޑޮލަރުގެ ޓްރެޒަރީ ބިލް (ޓީ-ބިލް) ފެސިލިޓީއަށް ދައްކަންޖެހޭ އެންމެ ފަހު އިންސްޓޯލްމަންޓް ކަމަށްވާ 50 މިލިއަން ޑޮލަރު ސަރުކާރުން އަނބުރާ ދެއްކުމާއި ބޭންކް އޮފް މޯލްޑިވްސް (ބީއެމްއެލް) އާ އެއްވެސް ގުޅުމެއް ނެތް ކަމަށް އެ ބޭންކުން ވަނީ ބުނެފަ އެވެ.