ކުންފުންނި ހަދައިގެން ފަލާހު ޑޮލަރު ގަނެވިއްކުމުގައި!

ކުންފުންނި ހަދައިގެން ފަލާހު "ޑޮލަރު" ގަނެވިއްކުމުގައި!

އަބްދުﷲ މައުރޫފް

30 ސެޕްޓެމްބަރ 2026 - 10:13

0 comments

ރައްޔިތުންގެ މަޖިލީހުގެ މެޖޯރިޓީ ލީޑަރު އިބްރާހިމް ފަލާހުގެ ނަމުގައި ޑޮލަރު ގަނެވިއްކާ ކުންފުންޏެއް އުފައްދާފައިވާކަން އޭނާގެ މާލީ ބަޔާނުން ހާމަވެއްޖެ އެވެ.

ވިހިވަނަ ރައްޔިތުންގެ މަޖިލީހުގެ މެންބަރުންގެ ދެވަނަ އަހަރުގެ މާލީ ބަޔާން އާއްމު ކޮށްފައިވާ އިރު ފަލާހުގެ މާލީ ބަޔާނުން އެނގޭ ގޮތުގައި މިދިޔަ އަހަރުގެ ތެރޭގައި ދެ ކުންފުންޏެއް އޭނާ އުފެއްދެވި އެވެ. އެ ދެ ކުންފުނީގެ ވެސް 90 ޕަސެންޓު ހިއްސާ ފަލާހުގެ އޮވެ އެވެ. އޭނާއަކީ އިތުރު ތިން ކުންފުންޏެއްގެ ވެސް ހިއްސާދާރެކެވެ.

ބަޔާނުން ދައްކާ ގޮތުގައި ފަލާހަށް މުސާރައިގެ ގޮތުގައި މަޖިލީހުން 990،000 ރުފިޔާ ލިބުނު އިރު ވިޔަފާރީގެ ނަފާގެ ގޮތުގައި މިދިޔަ އަހަރު އޭނާއަށް 1.8 މިލިއަން ރުފިޔާ ލިބުނެވެ. އަދި ކުލީގެ ގޮތުގައި މިދިޔަ އަހަރު 2.8 މިލިއަން ރުފިޔާ ލިބުނެވެ. މިދިޔަ އަހަރުގެ ތެރޭގައި ފަލާހު ވަނީ ބޭންކް އޮފް މޯލްޑިވްސް އިން 15 މިލިއަން ރުފިޔާގެ ލޯނެއް ވެސް ނަގައިފައެވެ.

އޭނާގެ ނަމުގައި ފަސް ބިން އެބައޮތެވެ. އެއީ މިދިޔަ އަހަރު 21 މިލިއަން ރުފިޔާއަށް ހުޅުމާލެއިން ގަނެފައިވާ ބިމަކާއި އިންނަމާދޫ ފަލަކް، ފަތް، އަސުރުހިޔާގެ އިތުރުން މާލެއިން ގަނެފައިވާ މ. އަސުރުކުރިއެވެ. މާލެއިން އޭނާ ގޯތި ގަތީ ހަތަރު މިލިއަން ރުފިޔާއަށް ކަމަށް ވެސް ބަޔާނުގައިވެ އެވެ.