ފިލްމީ ފަންނާނުންގެ އަގު ވަޒަން ކުރުމަށް ބާއްވާ އެމްއެފްއޭ އެވޯޑު އޭޕްރީލްގައި ބާއްވަން ނިންމައިފިއެވެ. މޯލްޑިވްސް ފިލްމު އެސޯސިއޭޝަން (އެމްއެފްއޭ) އިން އިންތިޒާމުކޮށްގެން ކުރިން ބޭއްވި މޯލްޑިވްސް ފިލްމު އެވޯޑްސް، އެންމެފަހުން ބާއްވާފައިވަނީ 2014 ވަނަ އަހަރުއެވެ. މި އެވޯޑް ބޭއްވުމަށް، މި ފަހަރުގެ ހަފުލާ އިންތިޒާމްކުރަނީ އަ ބިޒްނަސް ކޮންސެޕްޓް (އޭބީސީ) އިންނެވެ. މިކަމުގެ އެއްބަސްވުމުގައި ސޮއި ކުރުމުގެ ހަފުލާ ސާފްވިއު ރާޅުގަނޑު ހޮޓެލްގައި ބާއްވާފައިވާ އިރު، އިވެންޓެއްގައި އެމްއެފްއޭގެ ފަރާތުން ސޮއިކުރީ، އެ އެސޯސިއޭޝަންގެ ޗެއަރޕަރސަން ޝިވާޒް އަބްދުﷲ (މާސްކޭ) އެވެ. އޭބީސީގެ ފަރާތުން ސޮއި ކުރެއްވީ މެނޭޖިންގ ޑިރެކްޓަރު މަރިޔަމް ސުހާނާ އެވެ. އެވޯޑް ބާއްވާ ސީދާ ތާރީޚު އަދި އިޢުލާނު ކޮށްފައި ނުވިނަމަވެސް ސުހާނާ ވިދާޅުވީ ރޯދައިގެ ކުރިން އެވޯޑް ބާއްވުމަށް އެމްއެފްއޭއާ އެކު މަސައްކަތް ކުރަމުން އަންނަ ކަމަށެވެ. އަދި އޭގެ ކުރިން އެވޯޑާ ގުޅުވައިގެން އެއްމަސް ދުވަހުގެ ޚާއްސަ މީޑިއާ ކެމްޕޭނެއް ކުރިއަށް ގެންދާނެ ކަމަށެވެ. އެ ދުވަސްތަކުގައި އެވޯޑާ ގުޅޭ އިތުރު މައުލޫމާތު ހިއްސާކުރުމާއި ފާޓުނަރުންނާ އެކު ސޮއިކުރުން ބާއްވާ އިރު، މި އެވޯޑަކީ މިހާތަނަށް ބޭއްވޭނެ އެންމެ ގްރޭންޑް، އެންމެ ރީތި އެވޯޑަށް ހެދޭތޯ އޭބީސީއާ އެކު މަސައްކަތް ކުރާނެކަމަށް މާސްކޭ ބުންޏެވެ. އެވޯޑް ނުބޭއްވި ގިނަ ދުވަސްތަކެއް ވުމުން ކުރިން އެވޯޑް ނުދެވި ހުރި އަހަރުތަކަށް އެވޯޑް ދިނުމުގައި ތަފާތުތަކެއް ހުންނާނެ ކަމަށް ފިލްމު އެސޯސިއޭޝަންގެ ފަރާތުން ވާހަކަދެއްކި، އެކްޓަރު މުހައްމަދު މަނިކް ބުންޏެވެ. * 2014 - 2016 ގެ ނިޔަލަށް ނިކުތް ފިލްމުތަކަށް އެވޯޑް ދޭނީ ހަތް ކެޓަގަރީއަކުން * 2017 - 2018 ގެ ނިޔަލަށް ނިކުތް ފިލްމުތަކަށް އެވޯޑް ދޭނީ 30 ކެޓަގަރީއަކުން އެވޯޑްގައި ބައިވެރިވޭނީ އެމްއެފްއޭގެ މެމްބަރުންނަށް ކަމަށާއި އެވޯޑަށް ކުރިމަތިލުމަށް އެދޭފޯމު އެސޯސިއޭޝަންގެ އޮފީހުން މިހާރުލިބެން ހުންނާނެ ކަމަށްވެސް އެސޯސިއޭޝަނުން ބުންޏެވެ. މި އެވޯޑަކީ އެމްއެފްއޭ އިން އިންތިޒާމްކުރާ އެވޯޑަކަށް ވާތީ، މީގައި ބައިވެރިވެވޭނީ ހަމައެކަނި އެމްއެފްއޭގައި ރެޖިސްޓަރވެފައިވާ މެމްބަރުންނަށެވެ. އެވޯޑަށް ވާދަކުރާ ނަމަ ފިލްމު އުފައްދާ ފަރާތްތަކާއި އެކްޓަރުންވެސް އެ އެސޯސިއޭޝަންގައި ރެޖިސްޓްރީ ވާންޖެހޭނެއެވެ. އެ އެސޯސިއޭޝަންގައި 280 އަށްވުރެ ގިނަ މެމްބަރުން ތިބެއެވެ.