ލިވަޕޫލް އާއެކު ރާއްޖެ ޕްރޮމޯޓް ކުރުމުގެ ކެމްޕޭނު ފަށައިފި

މަރިޔަމް އަނާ

03 އޭޕްރީލް 2025 - 10:54

0 comments

އިނގިރޭސިވިލާތުގެ މަޝްހޫރު ފުޓްބޯޅަ ކްލަބް، ލިވަޕޫލްގެ ޓޫރިޒަމް ޑެސްޓިނޭޝަން ޕާޓްނަރެއްގެ ގޮތުގައި ރާއްޖެ ޕްރޮމޯޓްކުރުމުގެ ކެމްޕޭން ރޭ ލޯންޗްކޮށްފި އެވެ.

ލިވަޕޫލްގެ އެންފީލްޑްގައި، މި ކެމްޕޭން ފެށުމުގެ ރަސްމިއްޔާތުގައި ރައީސް ޑރ. މުހައްމަދު މުއިއްޒު ބައިވެރިވެވަޑައިގަތެވެ.

އިނގިރޭސި ޕްރިމިއާ ލީގުގައި ރޭ އެވަޓަންގެ މައްޗަށް 1-0 އިން ލިވަޕޫލުން ކުރި ހޯދި މެޗުގައި ވަނީ، މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) އާއި ލިވަޕޫލް ގުޅިގެން، ކޯ ބްރޭންޑަޑް އިނީޝިއަޓިވެއްގެ ގޮތުގައި ކުރިއަށްގެންދާ ރާއްޖޭގެ ފަތުރުވެރިކަމުގެ ކެމްޕެއިން، ރަސްމީކޮށް ފަށާފަ އެވެ.

ލިވަޕޫލްގެ އޮފިޝަލް ޓޫރިސްޓް ޑެސްޓިނޭޝަން ޕާޓްނަރަކަށް ރާއްޖެ ހަމަޖައްސައި، އެ ކްލަބާއެކު އެމްއެމްޕީއާރުސީން މިދިޔަ މަހުގެ 13 ވަނަ ދުވަހު ވަނީ އެއްބަސްވުމެއްގައި ސޮއިކޮށްފަ އެވެ.

ރާއްޖޭގައި ލިވަޕޫލްގެ އެކަޑަމީއެއް ގާއިމުކޮށް، ސްޕޯޓްސް ޓޫރިޒަމް ހަރުދަނާ ކުރުމާއި ޑެސްޓިނޭޝަން ބްރޭޑިން އިތުރުކުރުން ފަދަ ހަރަކާތްތައް ވެސް މި ކެމްޕޭންގައި ހިންގާނެ އެވެ. އެމްއެމްޕީއާރުސީން ބުނި ގޮތުގައި މި ކެމްޕޭންގެ ސަބަބުން ރާއްޖެއަށް އަލަށް 100،000 ޓޫރިސްޓުން އަންނާނެ އެވެ. އަދި 2.5 މިލިއަން ޑޮލަރު އިންވެސްޓްކުރާ މި ކެމްޕޭނުން 200 މިލިއަން ޑޮލަރުގެ އާމްދަނީއެއް ލިބޭނެ ކަމަށް ވެސް ލަފާ ކުރެ އެވެ.

އެމްއެމްޕީއާރުސީން ބުނެފައިވާ ގޮތުގައި މި ކެމްޕޭންގެ ސަބަބުން ޓޫރިޒަމާއި އިގްތިސާދީ ގޮތުން ރާއްޖެއަށް ބޮޑެތި ފައިދާތަކެއް ލިބިގެންދާނެ އެވެ.

މި ކެމްޕޭން ފެއްޓެވުމަށް ރައީސް ކުރައްވާ ދަތުރުފުޅުގައި، ލިވަޕޫލް އެކަޑަމީގެ އިސް އޮފިޝަލުންނާ ބައްދަލު ކުރައްވާނެ އެވެ. އަދި ފަތުރުވެރިކަން އިޝްތިހާރުކުރުމަށާއި ރާއްޖެ އާއި ލިވަޕޫލް ކްލަބާ ދެމެދު އޮތް ޕާޓްނާޝިޕް އިތުރަށް ހަރުދަނާ ކުރުމަށް ޖޮއިންޓް މާކެޓިން އިނީޝިއޭޓިވްސް ހަރަކާތްތައް ހިންގުމާ ގުޅޭ މަޝްވަރާތައް ކުރިއަށް ގެންދަން ވަނީ ނިންމައިފަ އެވެ.